« Te mau tumu ’ōlive », Te mau ’ā’amu o te Buka a Moromona (2023)
Te mau tumu ’ōlive
Te here o te Atua nō tōna nūna’a
E peropheta Iakoba nā te Atua. ’Ua hina’aro ’oia e ha’api’i i te ’āti Nephi nō ni’a i te here rahi o te Atua i tōna nūna’a. ’Ua fa’ati’a Iakoba ia rātou i te hō’ē ’ā’amu nō ni’a i te mau tumu ’ōlive o te hō’ē ’ō vine. ’Ua ’ohipa ’āmui te Fatu o te ’ō vine ’e tāna tāvini nō te ’atu’atu i te ’ō vine.
E tumu ’ōlive ta’a ’ē tā te Fatu ’o te hōro’a mai i te mā’a maita’i. ’Ua parau Iakoba ē, teie tumu rā’au mai te nūna’a ïa o te Atua, ’aore rā te ’utuāfare o ’Īserā’ela. Te hotu, mai te mau ’ohipa ïa a te ta’ata. ’Ua ’atu’atu maita’i roa te Fatu i teie tumu rā’au. ’Ua tauturu ’oia ’ia tupu maita’i te reira, ma te fa’a’amura’a i tōna mau a’a ’e te topera’a i tōna mau ’āma’a. ’Ua hōro’a ’oia iāna i te mea e tītauhia nō te ora.
I muri a’e i te hō’ē taime, ’ua ha’amata tāna tumu rā’au ta’a ’ē i te pohe. E mea iti roa te mau ’āma’a maita’i. ’Ua ’oto te Fatu nō te reira. ’Ua hina’aro ’oia ’ia tāmau noa te reira i te hōro’a mai i te hotu maita’i.
Nō te fa’aora i te mau ’āma’a maita’i, ’ua ’īriti mai te Fatu i te reira ’e ’ua tā’amu i te reira i te tahi atu mau tumu rā’au. I muri iho, ’ua mono atu ’oia i te reira i te mau ’āma’a maita’i nō te tahi atu mau tumu rā’au.
’Ua ma’iri te hō’ē taime roa. Pinepine te Fatu ’e te tāvini i te haere mai i te ’ō vine ra. ’Ua aupuru rāua i te tumu rā’au ta’a ’ē a te Fatu. ’Ua aupuru ato’a rāua i te mau ’āma’a ta’a ’ē tei ha’apurarahia nā roto i te mau tumu rā’au nā roto i te ’ō vine. Te rahira’a o te mau hotu tei tupu mai e mea maita’i ïa. ’Ua fa’a’oa’oa te hotu maita’i i te Fatu ’e i tāna tāvini.
Tau taime i muri mai, ’ua rahi atu ā te hotu o te mau tumu tāta’itahi. I teienei rā, e mea ’ino te mau hotu ato’a. ’Ua ’oto roa te Fatu. ’Aita ’oia i hina’aro ’ia mou tāna ’ō vine ’aore rā tōna hotu ! ’Ua rave itoito ’oia i te ’ohipa nō te tauturu i tāna mau tumu rā’au. ’Ua uiui ’oia e aha atu ā tāna e nehenehe e rave. ’Ua paraparau ’oia ’e te tāvini ’e ’ua mā’iti e tāmau noa i te tāmata.
Nō te fa’aora i tāna ’ō vine, ’ua parau te Fatu ’ia ha’aputuputuhia te mau ’āma’a ’o tāna i ’īriti mai i te tumu rā’au ta’a ’ē. ’Ua parau ’oia ’ia tā’amu fa’ahou atu te reira i ni’a i te tumu rā’au ta’a ’ē.
Teie te taime hope’a te Fatu e ’ohipa ai i roto i tāna ’ō vine. ’Ua pi’i ’oia i te tahi atu mau tāvini ’ia tauturu mai. ’Ua ha’a ’āmui te mau ta’ata ato’a nō te ha’aputuputu ’e nō te tā’amu i te mau ’āma’a.
’Ua aupuru maita’i rātou i te mau tumu rā’au ato’a. ’Ua tātara rātou i te mau ’āma’a ’ino ’e ’ua tāpe’a mai i te mea maita’i. Tau taime i muri mai, ’ua hōro’a fa’ahou mai te tumu rā’au ta’a ’ē a te Fatu i te mau hotu maita’i. ’Ua hōro’a ato’a mai te tahi atu mau tumu rā’au i te mau hotu, maita’i a’e i tera tō te tumu rā’au ta’a ’ē. ’Ua ’oa’oa te Fatu. ’Ua fa’aorahia tāna mau tumu rā’au ! ’Ua hōro’a pā’āto’a mai te reira i te hotu ’o tāna i hina’aro ’ia roa’a mai.
’Ua ha’amāuruuru te Fatu i te mau tāvini. ’Ua parau ’oia ia rātou ē, ’ua ha’amaita’ihia rātou nō te rave-itoito-ra’a i te ’ohipa ’e te ha’apa’ora’a i tāna mau fa’auera’a. ’Ua ’ōpere ’oia i te mau hotu nā rātou, ’e ’ua fa’a’oa’oa roa te reira ia rātou. Nō te hō’ē tau roa, ’ua fa’ahiahia te Fatu i te hotu.
’Ua fa’aoti Iakoba i te ’ā’amu o te mau tumu ’ōlive. ’Ua ha’api’i ’oia i te nūna’a ē, tē aupuru nei te Atua ia rātou mai tā te Fatu o te ’ō vine i ’atu’atu i tāna mau tumu rā’au. ’Ua ani Iakoba i te mau ta’ata ato’a ’ia tātarahapa ’e ’ia ha’afātata atu i te Atua. ’Ua ha’api’i ’oia ia rātou ’ia here ’e ’ia tāvini i te Atua, nō te mea tē toro noa nei te Atua i te rima nō te tauturu ia rātou.