« Vāhine i roto i te mēdēbara », Te mau ’ā’amu o te Buka a Moromona (2023)
Nā vāhine i roto i te mēdēbara
Hāhaere ’e te Fatu
’Ua rātere te mau tamāhine a Isema’ela ’e tō rātou ’utuāfare i roto i te mēdēbara. E mea fifi roa te tere. I muri a’e i te tahi taime, ’ua fa’aipoipo rātou i te mau tamaiti a Lehi ’e a Saria.
I te hō’ē mahana, ’ua pohe ’o Isema’ela. ’Ua ’oto rahi tāna mau tamāhine. ’Ua mihi rātou i tō rātou metua tāne. ’Ua ha’ape’ape’a nā tamāhine ē e pohe ato’a rātou ’e tō rātou mau ’utuāfare i roto i te mēdēbara. ’Ua riri rātou ia Lehi ’e ia Nephi, ’e ’ua hina’aro rātou e ho’i i Ierusalema.
’Ua parau te reo o te Fatu i te mau tamāhine a Isema’ela ’e tō rātou nā ’utuāfare. ’Ua tātarahapa rātou, ’e ’ua ha’amaita’i te Fatu ia rātou.
’Ua fānau te mau vahine i te mau pēpe i roto i te mēdēbara. E piti ato’a tamaiti tā Saria i fānau, ’o Iakoba ’e ’o Iosepha.
’Ua tauturu te Fatu i te mau vāhine i roto i tō rātou tere. ’Ua ha’amaita’i ’oia ia rātou, ’ua tahe rahi te ū nō tā rātou mau ’aiū. ’Ua tauturu ’oia i te mau vāhine ’ia roa’a te pūai ’a rātere noa ai rātou.
’Ua parau te Fatu ē, tē arata’i nei ’oia i te mau tamāhine ’e tō rātou mau ’utuāfare i te fenua i parauhia. ’Ua fafau te Fatu i te mau ’utuāfare ē, e fa’ari’i rātou i te mau mea ato’a e hina’arohia e rātou ’a rātere ai rātou. ’Ua ha’amaita’i ’oia i te mā’a ’ia au nō te ’amu, ’e ’ua arata’i ’oia ia rātou.
I muri a’e e va’u matahiti i roto i te mēdēbara, ’ua tāpae te mau ’utuāfare i te pae miti. ’Ua ’oa’oa te mau vāhine ’e tō rātou ’utuāfare. Te fenua i te pae miti, e mea ruperupe maita’i ïa. ’Ua pi’i rātou i te reira vāhi ’o ’Auhune nō te mea ’ua ’ī i te mā’a hotu ’e te meri nō te ’amu. ’Ua fa’aineine te Fatu i te tā’āto’ara’a o te reira nō rātou.