« Te ho’ira’a i Ierusalema », Te mau ’ā’amu o te Buka a Moromona (2023)
« Te ho’ira’a i Ierusalema », Te mau ’ā’amu o te Buka a Moromona
Te hō’ira’a i Ierusalema
Te tere e ti’i te mau ’api veo
’Ua tere te ’utuāfare ’o Lehi ’e ’o Saria i roto i te mēdēbara. I roto i te hō’ē moemoeā, ’ua parau te Fatu ia Lehi nō ni’a i te mau pāpa’ira’a mo’a tei pāpa’ihia i ni’a i te mau ’api veo. ’O te hō’ē ta’ata ’o Labana te i’oa tē mau ra i te reira. ’Ua parau te Fatu i te ’utuāfare ’o Lehi ’ia ’āfa’i i te mau ’api veo nā muri iho ia rātou i roto i tō rātou tere.
’Ua parau te Fatu ia Lehi ’ia fa’aho’i i tāna mau tamaiti i Ierusalema nō te ti’i mai i te mau ’api veo. ’Ua amuamu nā taea’e o Nephi. ’Ua parau rāua ia Lehi ē, e mea fifi roa ’ia rave i te ’ohipa tāna e parau nei. ’Aita rāua i hina’aro ’ia haere.
E ’ohipa fifi mau ’ia rave, ’ua hina’aro rā Nephi e ha’apa’o. ’Ua ’ite ’oia ē, e tauturu te Fatu iāna ’e tōna mau taea’e. ’Ua parau Nephi ia Lehi ē, e ho’i ’oia i Ierusalema ’e e ti’i i te mau ’api veo.
’Ua ho’i Lamana, Lemuela, Samu ’e ’o Nephi i Ierusalema. I tō rātou taera’a atu i reira, ’ua fa’aoti a’era rātou ē, e haere Lamana i te fare o Labana ’e e ani i te mau ’api veo.
I tō Lamana anira’a i te mau ’api veo, ’ua pi’i Labana iāna ’ei ta’ata ’eiā. ’Ua parau Labana ē, e taparahi pohe ’oia ia Lamana.
’Ua horo ’ē ’o Lamana ’e ’ua parau atu i tōna nā taea’e i te ’ohipa i tupu.
’Ua pe’ape’a nā taea’e e maha. ’Ua hina’aro Lamana, Lemuela ’e ’o Samu e ho’i i tō rātou nā metua i roto i te mēdēbara, e mana’o ’āpī rā tō Nephi. ’Ua parau ’oia ē, e nehenehe tā rātou e ’aitaui e ’o Labana ’ia roa’a mai i te mau ’api veo. ’Ua ho’i fa’ahou rātou i tō rātou fare i roto i te ’oire ’e ’ua ’ohi mai i te tā’āto’ara’a o tā rātou ’auro ’e te ’ario nō te ’aitauira’a.
I tō rātou fa’a’itera’a atu i te ’auro ’e te ’ārio ia Labana ra, ’ua hina’aro ’oia i te tā’āto’ara’a o te reira. Terā rā, ’aita ā ’oia e hōro’a ia rātou i te mau ’api veo. ’Ua parau rā ’oia i tōna mau tāvini ’ia taparahi pohe i nā taea’e ’ia ti’a iāna ’ia rave i tā rātou ’auro ’e te ’ārio.
’Ua horo nā taea’e e maha ’ia ’ore ’ia pohe ’e ’ua fa’aru’e i tā rātou ’auro ’e te ’ārio i muri. ’Aita rā rātou i roa’a i te haruhia e te mau tāvini a Labana. ’Ua huna ihora te mau taea’e i roto i te hō’ē ana.
I muri a’e i teie mau fa’atāfifira’a ato’a, ’ua riri Lamana ’e ’o Lemuela ia Nephi. ’Ua tā’iri rāua ia Nephi ’e ia Samu i te rā’au.
Haere mai nei te hō’ē melahi ma te ui mai ē, nō te aha rāua e taparahi ai ia Nephi. ’Ua parau te melahi ē ’ua mā’itihia ’o Nephi nō te arata’i ia rātou. I muri iho, ’ua parau te melahi ia rātou ’ia ho’i fa’ahou i Ierusalema. E fa’aineine te Fatu i te hō’ē rāve’a nō rātou nō te rave mai i te mau ’api veo.