« E pahī nō te tere nā ni’a i te miti », Te mau ’ā’amu o te Buka a Moromona (2023)
« E pahī nō te tere nā ni’a i te miti », Te mau ’ā’amu o te Buka a Moromona
E pahī nō te tere nā ni’a i te miti
Fa’aineine nō te tere i te fenua i parauhia ra
Te fenua ’Auhune ’ua ’ī ïa i te mā’a hotu ’e te meri. E vāhi nehenehe mau ā. ’Ua ora na te ’utuāfare ’o Lehi ’e ’o Saria i te pae miti ’e ’ua fa’ari’i i te mau mea ato’a tā rātou i hina’aro.
I muri a’e e rave rahi mahana, ’ua parau te Fatu ia Nephi ’ia haere i te hō’ē mou’a nō te pure. I reira, ’ua parau te Fatu iāna ’ia hāmani i te hō’ē pahī nō te ’āfa’i i tōna ’utuāfare nā ni’a i te moana.
’Ua ha’api’i te Fatu iāna nāhea ’ia hāmani i te pahī. ’Aita rā Nephi i ’ite i hea e ’imi ai i te ’āuri nō te hāmani i te mau mauiha’a. ’Ua fa’a’ite te Fatu ia Nephi i hea e hi’o atu i te ’āuri.
I muri iho, ’ua patu Nephi i te hō’ē auahi nō te hāmani e rave rahi mauiha’a. ’Ua māta’ita’i Lamana ’e ’o Lemuela i tō rāua taea’e ’o Nephi. ’Aita rāua i hina’aro e tauturu iāna ’ia hāmani i te pahī. ’Ua mana’o rātua ē, e ’ere i te mea maita’i ’ia tāmata i te haere nā ni’a i te miti.
’Aita Lamana ’e ’o Lemuela i ti’aturi ē, ’ua parau te Fatu ia Nephi ’ia hāmani i te hō’ē pahī. ’Ua ui Nephi ia rāua nō te aha ’aita ā tō rāua e fa’aro’o i te Fatu. ’Ua fa’aha’amana’o ’oia i tōna mau taea’e ē ’ua ’ite rāua i te hō’ē melahi ’e ’ua ’ite rāua i te mana o te Fatu. Nō te ’ino’ino rahi o Lamana ’e o Lemuela, ’ua hina’aro rāua e taparahi pohe ia Nephi.
’Ua ’ī rā Nephi i te mana o te Atua. ’Ua fa’aara Nephi ia Lamana ’e ia Lemuela ’eiaha e tāpe’a iāna. ’Ua ri’ari’a rāua ’e ’aita rāua i hina’aro e tāpe’a fa’ahou ia Nephi e rave rahi mahana i muri iho. I muri iho, ’ua parau te Fatu ia Nephi ’ia toro i tōna rima i tōna mau taea’e. I tō Nephi torora’a i te rima ia rāua, ’ua fa’a’āueuehia rāua e te mana o te Fatu.
’Ua ha’amori Lamana ’e ’o Lemuela i te Fatu ’e ’ua tauturu i te hāmanira’a i te pahī. ’Ua pure Nephi i te Fatu e rave rahi taime nō te tauturu. Te pahī tā te ’utuāfare o Nephi i patu, e mea nehenehe roa ïa. I muri a’e e rave rahi mahana, ’ua oti te pahī, ’e ’ua fa’ari’i rātou ē, e ’ohipa maita’i te reira. ’Ua ’ite te ’utuāfare o Nephi ē, ’ua tauturu te Fatu ia rātou.