« Iakoba ’e ’o Serema », Te mau ’ā’amu o te Buka a Moromona (2023)
Iakoba ’e ’o Serema
Te ’itera’a pāpū o te hō’ē peropheta nō Iesu Mesia
E peropheta Iakoba tei ’ite mata ia Iesu Mesia. ’Ua hina’aro ’oia ’ia ti’aturi te nūna’a ia Iesu. ’Ua ha’api’i Iakoba i te nūna’a ’ia ha’apa’o i te mau fa’auera’a a te Atua. ’Ua ’ohipa itoito ’oia nō te ha’api’i i te nūna’a nō ni’a ia Iesu.
2 Nephi 11:2–3 ; Iakoba 1:1–8, 17–19
I te hō’ē mahana, ’ua ha’amata te hō’ē ta’ata ’o Serema te i’oa i te ha’api’i i te nūna’a. ’Ua ha’api’i rā Serema ē, e ’ere Iesu i te ta’ata mau. E ta’ata ’ite ’o Serema i te paraparau, ’e e rave rahi ’āti Nephi tei ti’aturi i te mea tāna i parau. Nōna, e rave rahi ta’ata tei fa’aea i te ti’aturi ia Iesu. ’Ua hina’aro ato’a Serema, ’ia fa’aea Iakoba i te ti’aturi ia Iesu.
’Ua parau Serema ē, ’aita e ta’ata e nehenehe e ’ite e aha te mea e tupu i te mau tau i muri nei. ’Ua parau ’oia tōna aura’a, ’aita e ta’ata e nehenehe e ’ite e mea mau ānei Iesu, nō te mea ’aita ā Iesu i haere mai i te fenua nei. ’Ua parau rā Iakoba, tē ha’api’i nei te mau pāpa’ira’a mo’a ’e te mau peropheta nō ni’a ia Iesu. ’Ua fa’a’ite te Atua ia Iakoba ē, e haere mai Iesu i ni’a i te fenua nei.
’Aita iho ā ’o Serema e hina’aro e ti’aturi. ’Ua hina’aro ’oia ’ia fa’a’ite Iakoba iāna i te hō’ē tāpa’o ē, e mea mau Iesu.
’Ua parau Iakoba ē, ’ua ’ite Serema e haere mai Iesu ’e ’aita e tītauhia te hō’ē tāpa’o. ’Ua parau rā Iakoba ē, e tā’iri te Atua ia Serema nō te fa’a’ite e mana tō te Atua ’e e mea mau o Iesu.
I reira iho ā, ma’i-roa-hia Serema ’e ma’iri iho ra i raro i te repo. I muri a’e e rave rahi mahana, ’ua ’ite ’oia tē pohe ra ’oia. ’Ua parau ’oia i te nūna’a ē, ’ua ha’avarehia ’oia e Sātane. ’Ua parau ’oia ē, ’ua ha’avare ’oia i te Atua. ’Ua ’ite ’oia mai te ’ōmuara’a mai ē, e mea mau ’o Iesu. E pohe iho ra Serema. ’Ua tai’o te nūna’a i te mau pāpa’ira’a mo’a ’e ’ua ti’aturi ia Iesu.