Alama 1

Gideona, Alama ’e ’o Nehora

Pārurura’a i te parau mau nā roto i te mau parau a te Atua

Alama tamaiti e fa’aro’o ra i tōna metua tāne

’Ua mā’iti te ’āti Nephi ia Alama tamaiti ’ia riro ’ei ha’avā rahi nō rātou. ’Ua riro ato’a ’o Alama ’ei tahu’a rahi nō te ’Ēkālesia.

Mosia 29:41–44

Nehora e fa’atoro ra i ni’a i te ra’i

’Ua ha’amata te hō’ē ta’ata ’o Nehora te i’oa i te ha’api’i i te ta’ata i te hō’ē mea tāna i pi’i te parau a te Atua. ’Ua ha’api’i rā ’oia i te nūna’a ē, ’aita rātou e tītauhia ’ia ha’apa’o i te parau a te Atua ’aore rā ’ia tātarahapa.

Alama 1:2–4, 15

mau ta’ata e ’āfa’i ra i te moni nā Nehora

E rave rahi ta’ata tei au ’e tei ti’aturi i te mea tā Nehora e parau ra. ’Ua hina’aro ’oia ’ia hōro’a te ta’ata i te moni nāna ’e ’ia ’ārue iāna. ’Ua mana’o ’oia ē, ’ua hau a’e tōna maita’i i tō te tahi atu mau ta’ata. ’Ua fa’ati’a ’oia i tāna iho ’ēkālesia, ’e e rave rahi ta’ata tei fa’aro’o iāna.

Alama 1:3, 5–6

Nehora e mārō ra ia Gideona

I te hō’ē mahana, ’ua fārerei atu Nehora i te hō’ē ta’ata pa’ari ’o Gideona te i’oa. E ’orometua ha’api’i ’o Gideona i roto i te ’Ēkālēsia a te Atua ’e ’ua rave e rave rahi ’ohipa maita’i. ’Ua hina’aro Nehora i te mau ta’ata ’ia fa’aru’e i te ’Ēkālēsia, nō reira ’ua ’aimārō ’oia ’e ’o Gideona. ’Ua fa’a’ohipa Gideona i te mau parau a te Atua nō te fa’a’ite ē, ’aita Nehora e ha’api’i nei i te parau mau. ’Ua riri ’o Nehora ! ’Ua taparahi pohe roa ’oia ia Gideona i tāna ’o’e.

Alama 1:7–9, 13

Tē mārō ra Nehora ia Alama

’Ua ’āfa’i atu te nūna’a ia Nehora ia Alama ra, ’ia ha’avāhia. ’Ua tāmata Nehora i te pāruru i te mea tāna i rave. ’Aita ’oia i hina’aro ’ia fa’autu’ahia ’oia.

Alama 1:10–11

Alama e hōro’a ra i te fa’aotira’a o te ha’avāra’a

’Ua parau Alama ē, e mau ha’api’ira’a hape tā Nehora ’e e nehenehe ’oia e ha’apēpē i te ta’ata. ’Ua pe’e Alama i te ture. Nō tō Nehora taparahi pohera’a ia Gideona, ’ua fa’autu’ahia ’oia i te utu’a pohe.

Alama 1:12–15

Alama e feruri ra nō ni’a i te nūna’a

Hou ’oia ’a pohe ai, ’ua parau Nehora i te nūna’a ē, ’ua ha’avare ’oia. ’Aita ’oia i ha’api’i i te parau a te Atua. Noa atu ā ’ua parau Nehora ē, ’ua hape ’oia, e rave rahi ta’ata tei pe’e i tōna hi’ora’a. ’Ua ha’avare rātou i te ta’ata ’ia fa’ateiteihia rātou ’e ’ia roa’a tā rātou moni. ’Ua fa’aro’o rā te tahi atu mau ta’ata ia Alama. ’Ua ’atu’atu rātou i te feiā veve ’e ’ua ha’apa’o i te mau fa’auera’a a te Atua.

Alama 1:15–16, 25–30