iVola Vakarau ni Lalai kei na Gauna ni Veiwasei
Vakatavulici ni Gone Era Vakaleqai Tu Vakayago

Vakatavulici ni Gone Era Vakaleqai Tu Vakayago

E vakatavulica na iVakabula, “A luvemu kecega ena vakavulici ira na Turaga; ena ka levu talega na nodra vakacegu na luvemu” (3 Nifai 22:13).

Sa nodra itavi bibi na iliuliu ni Lalai me ra vakatavulica na kosipeli i Jisu Karisito vei ira kece na gone, oka kina o ira e vakaleqai tu na yagodra. Na Lalai e vanua me ra ciqomi, lomani, susugi, ka taleitaki kina na gone kece sara. Ena draki ni bula oqori ena rawarawa kina vei ira kece na gone me ra kila na nona loloma na Tamada Vakalomalagi kei Jisu Karisito ka vakila ka vakadinadinataka na veivakauqeti ni Yalo Tabu.

Sa ka talei vua na Kalou na gone kecega. Era gadreva yadua na loloma, veidokai, kei na veitokoni.

Taro ivakasala vei ira tale eso ni o cakacaka tiko mo sotava na nodra gagadre na gone ena nomu Lalai ka ra vakaleqai tu vakayago.

  1. Veitalanoa kei na nona itubutubu na gone. E vakavuqa ni o ira ga na itubutubu era na kilai ira vakavinaka cake na luvedra mai vei keda kece. E rawa ni ra vakatavulici iko ena ivakarau mo sotava kina na nodra gagadre, na balavu ni gauna e rawa ni vakarorogo tiko kina, kei na ivakarau e dau taleitaka me vakavulici kina. Me vaka oqo, eso na gone era dau vakarorogo vakavinaka ki na ivakatagi, eso tale ki na italanoa, iyaloyalo, na ivolanikalou, se veitosoyaki. Vakayagataka na iwalewale duidui ni veivakatavulici, ka vakadeitaka me vakayagataki na sala era na vuli vakavinaka duadua kina na gone yadua.

    iVakatakilakila
    ivukivuki raici

    Eso na gone era vakaleqai tu vakayago ka ra dau vakaitavi vakavinaka ni tuvai vei ira na iyaloyalo. Vakayagataka na ituvatuva me vaka e vakaraitaki eke me vakatakilai kina na gauna ni masu, gauna ni vakadigagalu, se gauna ni lagasere.

    Sa vakarautaki tu na iyaloyalo ena sharingtime.lds.org

    Tabaka eke me baleta na iyaloyalo.

  2. Veitalanoa vata kei ira na iliuliu tale eso ni Lalai kei ira na qasenivuli. Ni masu ka cakacaka vata me laurai na sala me ra vukei kina na gone kece sara me ra vulica na kosipeli i Jisu Karisito ka ra vakila ni ra lomani.

  3. Veitalanoa kei ira ena matabose ni tabanalevu. Ena tu beka vei ira na veiliutaki ni matabete kei na mataisoqosoqo tale eso na vakasama ena ivakarau me ra vukei kina na gone e tu na nodra gagadre bibi. Ena dua na tabanalevu, eratou vakarautaka na bete levu e dua na “tukadra na Lalai” e veimacawa me dau dabe vata tiko kei na dua na gonetagane sega ni tu vinaka nona vakasama. (E vinaka, kevaka me o koya tikoga e veimacawa.) Oqo ena vukea na gonetagane oqo me vagolea na nona vakasama ki na lesoni ka vakila ni lomani.

E vakatavuvulitaka o Elder M.Russell Ballard, “E matata, ni o keda eda sa vakaitavitaki me baleti ira na gone vakamareqeti sa soli vei keda e dua na itavi tabu ka vakaturaga, ni sai keda sa lesia na Kalou me da ologi ira na gone nikua ena loloma kei na bukawaqa ni vakabauta ka me ra kila o cei o ira” (“Great Shall Be the Peace of Thy Children,” Ensign, Epe. 1994, 60).

iVakatakilakila
gone