Noveba
Me da Vakavinavinakataka na Kalou ena Ka Kecega
“Sa vakaroti ira … me ra dau vakavinavinaka talega ena veisiga vua na Turaga na nodra Kalou” (Mosaia 18:23).
Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka vakataki ira. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”
iMatai ni Macawa: Au vakavinavinakataka na yagoqu, ka’u kila ni dua na valetabu.
Kila na ivunau (raica na iyaloyalo ka wilika e dua na ivolanikalou): Vakaraitaka na kena iyaloyalo e dua na gone kei na dua na iyaloyalo ni dua na valetabu. Wilika vata i cake na 1 Korinica 3:16. Taroga: “Na cava eda vulica me baleta na yagoda mai na ivolanikalou oqo?” Vola “Na yagoqu e dua na valetabu” ena papa.
Vakauqeta na kila ka (wili ivolanikalou): Veivosakitaka na veisala eso eda vakaraitaka kina vei Tamada Vakalomalagi ni da vakavinavinakataka na yagoda; me vaka beka oqo, eda dau qarauna ka dau vakasavasavataka. Vakamacalataka ni ra sa vakasalataki keda na parofita me da qarauna na yagoda ena noda sega ni dau vakatavako, vakayagataka na alakaolo se waigaga vakatabui eso, se samuqawetaka. Wasewasei ira na gone, ka kerea na veiwasewase yadua me ra wilika ka veivosakitaka e dua se sivia na ivolanikalou oqo: Vunau kei na Veiyalayalati 88:124; 89:7, 8, 9, 10–11, 12, 16–17. Sureta na iwasewase yadua me ra wasea na veika era vulica mai na ivolanikalou eso oqo me baleta na sala e rawa ni ra qarauna kina na yagodra.
Vakauqeta na kena vakayagataki (vakadavora e dua na takete): me ra vola se droinitaka na gone e dua na ka era na cakava ena loma ni macawa me ra qarauna kina na yagodra.
iKa 2 ni Macawa: Au vakavinavinakataka na veivakalougatataki vakayago.
Kila na ivunau: Vola ena papa, “Au vakavinavinakataka na veivakalougatataki vakayago.” Kerei ira na gone me ra tokaruataka na iyatuvosa. Vakamacalataka ni veivakalougatataki vakayago sai koya na veivakalougatataki eda rawa ni raica, tara, rogoca, tovolea, se boica.
Vakauqeta na kila ka (qitotaka e dua na qito ni kilakila mada): vakaraitaka na iyaya eso se iyaloyalo e vakaraitaka eso na noda veivakalougatataki vakayago (me vaka beka na, yago, vale, kakana, wai, isulu, noda bula, matanisiga, na vula, kalokalo, na vuravura, manumanu, kautei, matavuvale, itokani, iyaya ni vakatatalo, ivola, kei na koronivuli). Solia eso na veivuke ka vakamacalataki kina e dua na veivakalougatataki, ka kerea vei ira na gone me ra kilakila mai se veivakalougatataki cava o vakamacalataka tiko. Me baleti ira na gone qase cake, vola na veivakalougatataki yadua ena dua na tiki ni pepa ka biuta na pepa ena dua na koniteina. Sureta e dua na gone me digitaka e dua ka solia eso na veivuke me rawa ni kilai kina vei ira na vo ni gone. Ni ra sa kila rawa na gone e dua na veivakalougatataki, vola ena papa, ka kerea e dua na gone me wasea se cava e vakavinakavinakataka kina.
Vakauqeta na kena vakayagataki (veiwasei vakasama): Kerei ira na gone me ra vakasamataka se cava e rawa ni ra cakava me ra vakaraitaka kina na nodra vakavinavinaka me baleta e dua na veivakalougatataki o ni veivosakitaka. Kerei ira e vica na gone me ra wasea na nodra vakasama.
Ena mana na nodra vuli na gone ni levu na iwalewale ni vuli e taurivaki. Digitaka na itaviqaravi kei na iwalewale ni veivakavulici ka ra vakaitavitaki kina na gone kece.
iKa 3 ni macawa: Au vakavinavinakataka na veivakalougatataki vakayalo.
Kila na ivunau ka Vakauqeta na kila ka (wili ivolanikalou): Vakarautaka e dua na iloloma kei na dua na kena iyaloyalo na iVakabula kei na idusidusi vakaivolanikalou oqo e loma: Moronai 10:8–17. Vola ena papa, “Au vakavinavinakataka na veivakalougatataki vakayalo.” Vakamacalataka ni levu tu na veivakalougatataki vakayalo e rawa ni solia vei keda na Turaga; e solia vei keda o Koya na veivakalougatataki oqo ena kaukauwa ni Yalo Tabu . Me dolava e dua na gone na iloloma ka vakaraitaka na veika e tu e loma. Kerei ira na gone me ra raica na ivolanikalou ka kunea na veivakalougatataki vakayalo e rawa ni solia vei keda na Turaga, ka vola ena papa. Veivosakitaka eso na veivakalougatataki oqori, ka vakamacalataka ni dodonu me da vakayagataka me da vukei ira kina na tani.
iKa 4 ni macawa: Sa dodonu me da vakavinavinakataka vei Tamada Vakalomalagi na noda veivakalougatataki kece sara.
Kila na ivunau: Vakaraitaka vei ira na gone e dua se rua na ka a solia vei iko e dua. Vakamacalataka ni ra sa bibi sara vei iko na iloloma oqori ka kaya kina “Vinaka vakalevu.” Kerei ira na gone me ra wasea eso tale na sala e rawa ni da vakaraitaka kina na noda vakavinavinaka me baleta na iloloma eda ciqoma. Taroga vei ira na gone se o cei e dodonu me da vakavinavinakataka ena vuku ni noda veivakalougatataki kece sara. Veivosakitaka na vuna me da vakavinavinaka kina vei Tamada Vakalomalagi me baleta na noda veivakalougatataki kece sara.
Ena nodra sureti na gone me ra veiwasei vakailawalawa ena yaco me ra vakaitavi kece kina. Me ra veivuke na qasenivuli ni vakayacori na veitavi eso ka qarauna na nodra vakanomodi.
Vakauqeta na kila ka (tuvatuvalaki): Biuta ena lima na taga duidui e yadua na tikinipepa, dua na peni, kei na dua vei ira na iyaya oqo: iyaloyalo ni dua na valenisoqoni ni Lotu, dua na isulu, ivolanikalou, iyaloyalo ni dua na matavuvale, kei na dua na kena iyaloyalo nai iVakabula. Wasewasei ira na gone, ka solia ki na iwasewase yadua e dua vei ira na taga. Me ra raica na iwasewase yadua na iyaya e tu ena loma ni taga ka vola ena pepa e dua na sala e rawa ni ra vakavinavinakataka kina. Qai kerei ira me ra biuta lesu na iyaya, pepa kei na peni ki na loma ni taga ka solia yani ki na dua tale na iwasewase. Me ra raica na iwasewase yadua na taga kece sara, qai sureti ira na iwasewase yadua me ra wasea na veika e volai tu ena lisi e loma ni nodra taga.
Vakauqeta na kena vakayagataki (veiwasei vakasama): Kerei iratou e vica na gone me ratou wasea na veika eratou sa vulica mai na itaviqaravi kei na cava eratou na cakava me ratou vakayagataka kina ena nodratou bula.