Maji
Ko Jisu Karisito na Noda iVakabula.
“Mo dou rogoca sara na vosa oqo. Raica, koi au ko Jisu Karisito na iVakabula kei vuravura” (V&V 43:34).
Vakuria ki na veivakasama oqo eso na nomu. Ena veimacawa, tuvanaka na sala mo (1) kila kina na ivunau, (2) vukei ira na gone mera kila vakavinaka, ka (3) vukei ira mera bulataka. Tarogi iko, “Na cava me ra cakava na gone me ra vuli kina, kei na sala cava me’u vukei ira kina me ra vakila na Yalotabu?”
iMatai ni Macawa: Vakatavulica o Jisu Karisito na kosipeli ka vakotora vei keda e dua na ivakaraitaki.
Kila na ivunau (lagata e dua na sere): Lagata vata vakavica “Do As I’m Doing” (CS, 276), ka sureti ira na gone eso me ra digitaka na matana me ra cakava. Vakamacalataka ni gauna eda vakatotomuria kina e dua tale, eda sa vakatotomuria tiko na nona ivakaraitaki. Taroga se o cei sa mai vakotora na ivakaraitaki uasivi sara me da muri (Jisu Karisito). Sureti ira na gone me ra tukuna vata, “a vakotora o Jisu Karisito e dua na ivakaraitaki vei keda.”
Vakauqeta na kila ka (wili ivolanikalou): Biuta na iyaloyalo ni veika a yaco ena papa: Papitaisotaki o Karisito, Karisito kei ira na gone, masu tiko na Karisito, kei na veivakatavulici i Karisito. Ni wilika vata e dua vei ira na ivolanikalou oqo, ka kerei ira na gone me ra vakamacalataka se cava e vakatavuvulitaka tiko na Karisito ena ivolanikalou oya: Marika 16:15; Joni 13:34–35; 3 Nifai 11:37; 3 Nifai 18:19. Dusia vakamalua na iyaloyalo yadua ka sureti ira na gone me ra tucake ni o dusia na iyaloyalo ka vakaraitaki vakavinaka duadua kina ni cakava tiko na Karisito na ka e vakatavuvulitaka me da cakava ena ivolanikalou o wilika. Tokaruataka ena vo ni iyaloyalo.
E na rawarawa ni ra vakarokoroko na gone ni ra vakaitavi tiko ena vuli. Ena itaviqaravi oqo, ni ra tucake ka dabe sobu ena vakarokoroko na gone ena vukea na kena maroroi tiko na nodra vakarorogo.
Vakauqeta na kena vakayagataki (droini iyaloyalo): Solia yadua vei ira na gone e dua na tiki ni pepa, ka sureti ira me ra droinitaka e dua na kedra iyaloyalo ni ra muria tiko na ivakaraitaki nei Karisito. Me vaka oqo, e rawa ni droinitaki e dua na gone ni papitaisotaki, vakatavuvulitaka tiko na kosipeli vua e dua na itokani, se vukea tiko e dua. Sureta e vica na gone me ra wasea na nodra iyaloyalo vata kei ira na vo ni gone, ka vakayaloqaqataki ira me ra laki wasea na nodra droini ena nodra matavuvale.
iKa 2 ni Macawa: Ena vuku ni Veisorovaki i Karisito, sa rawa kina ni’u veivutuni ka laki bula tale kei na Kalou.
Kila na ivunau (vakalewena na vanua e lala tu): Vola rawa tu ena papa ni se bera na Lalai, “Ena vuku ni _______ i Karisito, sa rawa kina ni’u ______ ka laki bula tale kei na _____.” Vola na vosa Veisorovaki, veivutuni, kei na Kalou ena veitikinipepa duidui ka vakabira ena ruku ni tolu na idabedabe ena loma ni rumu. Sureti ira na gone me ra vaqara na tikinipepa ka laki vakabira ena papa ena kedra itutu dodonu. Wilika vata na iyatuvosa.
Vakauqeta na kila ka (wilika na ivolanikalou ka sauma na taro): Biuta ena papa na iyaloyalo kei Karisito mai Kecisemani kei na Veivakamatei ena Kauveilatai. Ubia na iyaloyalo ena vica tale na tikinipepa lalai. Ena veitikinipepa yadua vola kina e dua na taro me baleta na ka e yaco tiko ena iyaloyalo kei na dua na idusidusi vakaivolanikalou mai na Maciu 26–27 se Luke 22–23 ena vanua e rawa ni kune kina. (Me vaka beka oqo: Na cava na yaca ni vanua a laki masu kina o Jisu? Maciu 26:36.) Wasewasei ira na gone, ka kerea na veiwasewase yadua me ra raica e dua vei ira na ivolanikalou ka raica kina na isau ni taro. Me ra qai wasea na iwasewase na isau ni nodra taro ka kauta laivi na kena tikinipepa ka veiganiti vata me vakaraitaka mai na veiyaloyalo.
Me moici na itaviqaravi ni wili ivolanikalou me ganiti ira na gone sobu, kerei ira me ra vakarorogo ni o wiliwili ka me ra qai tucake ni ra rogoca e dua na vosa se malanivosa bibi.
Vakauqeta na kena vakayagataki (raica e dua na lesoni vakaraitaki): Veitalanoataka vata kei ira na gone na ibalebale ni vosa Veisorovaki kei na veivutuni, ka vakamacalataka na ivakarau e rawa ni vakalougatataki keda kina na Veisorovaki (raica na Tudei ena Vakabauta: E Dua na iDusidusi Vakosipeli [2004], 14–20, 132–35). Vakaraitaka vei ira na gone e dua na iloloma. Kerea e dua na gone me tovolea me solia na iloloma vua e dua tale na gone, ka kerea na ikarua ni gone me bese ni taura. Vakamacalataka ni da sega ni taura e dua na iloloma e soli vei keda, eda na sega ni rawa ni marautaka na veivakalougatataki ni loloma oqori. Me ra vakarorogo na gone ki na veika e dodonu me ra cakava me ra ciqoma kina na iloloma ni Veisorovaki ni o ni wilika vata tiko na Vunau kei na Veiyalayalati 19:16.
iKa 3 ni Macawa: Ni a vakaturicake tale ko Jisu, ena vakakina koi au.
Kila na ivunau (rogoca e dua na italanoa): Vakayagataka na ivakaraitaki mai na tabana e 123 ena ivolavakarau ni isususu (raica na idusidusi ena tabana e 121) mo tukuna kina na italanoa ni Tucaketale mai na Mate (raica na Joni 19:41–42; 20:1, 11–18). Vakamacalataka ni gauna a vakaturicake kina mai na mate o Jisu Karisito, erau a cokoti vata tale na yagona kei na yalona; oqori sa rawa kina ki na tamata kecega me tucaketale mai na mate. Me ra tukuna na gone, “Baleta ni a vakaturicake tale mai na mate o Jisu Karisito, ena vakakina koi au.”
Vakauqeta na kila ka (veitalanoataki na veika eda vakila): Tuva ena papa na vosa ena vakamacalataka na veika eratou a vakila na tisaipeli ena siga a mate kina o Jisu (me vaka na mosi ni yalo, yalobibi, rarawa, kei na yaluma). Me ra vakatura mai na gone na vosa e veibasai kei na veivosa oqo (me vaka na mamarau, reki, inuinui, kei na vakabauta), ka vola ena papa. Vakamacalataka ni veika oqori eratou a vakila na tisaipeli ena gauna sa vakaturicake kina o Jisu. Veitalanoataka eso na veivakalougatataki e yaco mai ena noda kila ni da na vakaturicake tale (raica na Aisea 25:8; Alama 22:14).
Vakauqeta na kena vakayagataki (wasea na veika eda vakila): Vola ena papa, “Au vakavinavinakataka ni a vakaturicake o Jisu baleta …” Sureta e dua na lewe ni tabanalevu sa mate e dua na nona daulomani me lako mai ki na Lalai ka mai wasea vakalailai na vuna e vakavinavinakataka kina na Tucaketale mai na Mate. Taroga vei ira na gone kevaka era kila e dua na tamata sa mate, ka sureti ira me ra bobo ka vakananuma na tamata oya. Sureta eso na gone me ra tucake ka vakacavara na iyatuvosa ena papa ka wasea na kena ibalebale vei ira na Tucaketale mai na Mate.
iKa 4 ni Macawa: Ko Jisu Karisito na noda iVakabula.
Kila na ivunau (veitalanoataka na vosa “iVakabula”): Vakaraitaka eso na iyaya se na iyaloyalo baleti ira na tamata e rawa ni ra vakabulai keda (me vaka e dua na vuniwai, e dua na ovisa, se dua na dauveitaqomaki), ka veitalanoataka na ivakarau e rawa ni ra vakabulai keda kina. Vakaraitaka e dua na iyaloyalo kei Jisu, ka vakamacalataka ni o Koya duadua ga e tu vua na kaukauwa me vakabulai keda mai na revurevu tawamudu ni mate kei na ivalavala ca. Vola ena papa, “O Jisu Karisito na noda iVakabula,” ka wilika vata kei ira na gone, ka vakabibitaka na vosa “iVakabula.”
Vakauqeta na kila ka kei na kena vakayagataki (rogoca na italanoa vakaivolanikalou): Tukuna vei ira na gone eso na italanoa vakaivolanikalou me baleta eso na tamata ka ra a vakabulai ena nodra ivalavala ca mai vua na iVakabula (me vakataki, Alama Lailai [raica na Alama 36:6–24], Inosi [raica na Inosi 1:1–8], Sisoromi [raica na Alama 15:3-12], tamai Lamonai [raica na Alama 22:1–26], se na tamata a kau mai vei Jisu [raica na Luke 5:17–26]). Vakamacalataka ena vuku ni nona Veisorovaki o Jisu Karisito, sa rawa kina vei keda kecega me da vakabulai mai na ivalavala ca. Vakadinadinataka ni o Jisu Karisito sa noda iVakabula, ka sureta e vica na gone me ra wasea na nodra ivakadinadina me baleti Koya.