Epereli
Sa Vakalesuya mai o Jisu Karisito na Nona Lotu ena Veisiga e Muri Oqo
“Au sa vakatakila na noqu ivakavuvuli me vola ko Josefa na noqu tamata” (V&V 35:17).
Kuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”
iMatai ni Macawa: Ni oti na mate nei Jisu Karisito kei ira na Nona iApositolo, a yali na dina vakosipeli.
Kila na ivunau (veivosaki): Kerei ira na gone me ra tukuna eso na ka a vakavuvulitaka o Jisu Karisito ni tiko voli e vuravura. Vakaraitaka e dua na iyaloyalo kei Karisito ni tabaki ira tiko na iApositolo. Vakamacalataka ni oti na nona mate na Karisito ka vakaturi cake tale, eratou a vakatavulica na kosipeli na Nona iApositolo, ia era a sega ni via rogoci iratou e vuqa na tamata; sega ni dede, eratou sa mate na iApositolo, ka sa sega kina ni vakatavulici tale eso na veidina bibi vakosipeli. Vola ena papa “Ni oti na mate nei Jisu Karisito kei ira na Nona iApositolo, a yali na dina vakosipeli,” me ra qai cavuta vata kei iko na gone.
Na droini e rawa kina vei ira na gone me ra vakaraitaka na veika era kila me baleta na ivakavuvuli ni kosipeli. Era dau taleitaka na gone me ra raica ni vakayagataki na nodra droini me veivuke vakaiyaloyalo.
Vakauqeta na kila ka (droini iyaloyalo): Vola ena papa eso na ivakavuvuli ni kosipeli era a yali se veisautaki ena gauna ni Vukitani (me vaka beka na, papitaiso, matabete, valetabu, parofita bula, kei na sakaramede). Wasewasei ira na gone ki na veilawalawa lalai. Solia ki na veiwasewase yadua e dua na tiki ni pepa ka volai tu kina e dua na ivakavuvuli ni kosipeli, ka kerei ira na gone me ra droinitaka kina e dua na iyaloyalo me vakaraitaka na ivakavuvuli. Sureta e yadua na gone mai na veiwasewase me ra biuta na nodra iyaloyalo ena papa. Vakamacalataka ni gauna e tiko kina e vuravura na Karisito, a dau vakatavulica o Koya na veidina bibi vakosipeli oqo. Kerei ira na gone me ra bobo. Kauta tani na droini kece ka vunitaka. Qai kerei ira na gone me ra rai. Vakamacalataka ni ra a yali na veidina vakosipeli ni ratou sa mate o Jisu Karisito kei na Nona iApositolo. Tukuna vei ira na gone ni a vakalesui mai na kosipeli mai vei Josefa Simici. Biuta lesu tale na iyaloyalo, ka vakadinadinataka ni sa tu ena Lotu i Jisu Karisito ni Yalododonu Edaidai na veidina sa yali ena dua na gauna. (Maroroya na iyaloyalo me vakayagataki ena iKa 4 ni macawa.)
iKa 2 ni Macawa: A rairai vei Josefa Simici na Tamada Vakalomalagi kei Jisu Karisito.
Kila na ivunau (raica e dua na iyaloyalo): Ubia e dua na iyaloyalo ni iMatai ni Raivotu ena vica na tikinipepa lalai. Sureti ira na gone me ra kauta tani yadudua na tikinipepa. Kerei ira na gone me ra laveta galugalu na ligadra ni ra sa kila na iyaloyalo. Ni sa kau tani kece na tikinipepa, kerei ira na gone me ra tukuna vei iko na cava sa yaco tiko.
Vakauqeta na kila ka (wili ivolanikalou): Vakaraitaka vei ira na gone na vanua ena ivolanikalou e rawa ni da wilika kina na nona ivakamacala o Josefa Simici me baleta na veika a sotava ena Veikau Tabu (Josefa Simici—Ai Tukutuku Makawa 1:14–19). Wilika se kerea eso na gone me ra wilika e vica na tikina ka vakamacalataki kina na veika a yaco. O na vinakata beka mo kerea eso na gone sobu me ra cakava eso na ka rawarawa, me vaka na tucake ka vakadreta cake na ligadra me vaka na vunikau se roqota na ligadra me vaka beka ni ra masu tiko. Taroga vei ira na gone se na vakacava beka na veika era vakila kevaka a rawa me ra sarava na Tamada Vakalomalagi kei Jisu Karisito ena nodrau rairai ka vosa vei Josefa Simici. Veitalanoataka na bibi ni veika oqo.
Vakauqeta na kena vakayagataki (wasei na ivakadinadina): Me ra lagata na gone na “The Sacred Grove” (NVL, 87). Qai wasea na nomu ivakadinadina ni rau a rairai vei Josefa Simici na Tamada Vakalomalagi kei Jisu Karisito. Sureta e vica na gone me ra wasea na nodra ivakadinadina ni iMatai ni Raivotu.
iKa 3 ni Macawa: A vakalesui mai na dodonu ni matabete mai vei ira na italai vakalomalagi.
Kila na ivunau (lagata e dua na sere): Taroga vei ira na gone se na ivakarau cava beka o na kacivaka kina e dua na ka bibi sara. Vakamacalataka ni veigauna makawa sa oti ena dau vakatagitaki na biukila ni kacivaki e dua na ka bibi. Kerei ira na gone me ra bobo ka vakatayaloyalotaka ni ra rogoca na biukila ena gauna e vakatagitaka kina na daunipiano “Sa Vakalesui mai na Matabete” (NVL, 89). Kerei ira na gone me ra lagata na sere ka saga mera kila na itukutuku bibi cava e kacivaka tiko na sere oqo. Kerei iratou e vica na gone me ratou vakamacalataka na ibalebale ni sere.
Vakauqeta na kila ka (vakarorogo vei ira na vulagi sureti): Vakaraitaka vei ira na gone na iyaloyalo ni kena vakalesui mai na Matabete i Eroni kei na vakalesui mai ni Matabete i Melikiseteki. Sureta e dua na Matabete i Eroni me wasea vakalekaleka na italanoa ni kena vakalesui mai na Matabete i Eroni (raica na V&V 13; Josefa Simici—Ai Tukutuku 1:68–72). Qai sureta e dua na Matabete i Melikiseteki me tukuna vei ira na gone na kena vakalesui mai na Matabete i Melikiseteki (raica na V&V 27:12–13; Josefa Simici—Ai Tukutuku 1:72). Vakaraitaka tale na veiyaloyalo, qai kerei ira na gone me ra cavuta na yacadra na tamata era tu kina.
E rawa ni ra kauta mai na vulagi sureti na veika e duatani kei na yalo nanamaki ki na Lalai.
Vakauqeta na kena vakayagataki (wasei na ivakadinadina): Me ra vola na kalasi yadua ena dua na tiki ni pepa e dua na ka sa tu vei keda nikua baleta ni a vakalesui mai na Matabete i Eroni (me vaka beka oqo, papitaiso kei na sakaramede) kei na dua na ka sa tu vei keda nikua baleta ni sa vakalesui mai na Matabete i Melikiseteki (me vaka beka, na veivakadeitaki kei na veivakalougatataki vei ira na tauvimate). Kerea eso na gone me ra wasea na veika era sa vola. Vakaraitaka na nomu vakavinavinaka me baleta na veivakalougatataki e lako mai vei Tamada Vakalomalagi ena vuku ni kena sa vakalesui mai na matabete.
iKa 4 ni macawa: Vakadewataka o Josefa Simici na iVola i Momani kei na veidina ni kosipeli vakalesui mai.
Kila na ivunau ka Vakauqeta na kila ka (veivosakitaki): Ni bera na Lalai, vola na “Vakadewataka o Josefa Simici na iVola i Momani kei na veidina ni kosipeli vakalesui mai” ena dua na pepa, ka kotiva na pepa me rawa ni qai vakasotari vata tale. Ena daku ni veitikina yadua, vola na yaca ni tamata se dua na ka e semati ki na vakadewataki ni iVola i Momani (me vaka na, Josefa Simici, Urimi kei na Cumimi, agilosi o Moronai, peleti koula, kaukauwa ni Kalou, kei Oliver Cowdery). Solia vei ira yadua na kalasi e dua na tiki ni pepa ni kilakila, ka kerei ira me ra veivosakitaka na ivakarau e semati kina na iyaya se na tamata ena daku ni tikinipepa ki na kena vakadewataki na iVola i Momani. Sureta na kalasi yadua me ra lako mai ki liu, wasea na veika era sa veivosakitaka, ka biuta na nodra tikinipepa ni kilakila ena papa. Ni sa taucoko na pepa ni kilakila, qai wiliki vata na iyatuvosa.
Sa tu na pepa ni kilakila vaqo ena sharingtime.lds.org
Vakauqeta na kila ka (vakarorogo vua e dua na vulagi sureti): Sureta e dua na matabete me vakatayaloyalotaki Josefa Simici ka tukuna e dua na italanoa me baleta na nona vakadewataka na iVola i Momani. Solia vua e vica na iyaloyalo era a droinitaka na gone ena imatai ni macawa ka kerea me wasea na ivakarau a vakalesui mai kina na ivakavuvuli ni kosipeli mai vei Josefa Simici. E rawa ni daramaka e dua na isulu rawarawa, me vaka e dua na neketai bebe reveni loaloa. Sureti koya me luvata na isulu oqori ka wasea na nona ivakadinadina kei Josefa Simici.
Vakauqeta na kena vakayagataki (wasei ni veivakasama): Kerei ira na gone me ra tucake kevaka e rawa ni ra cavuta e dua na dina ni kosipeli sa yali mada ka sa vakalesui tale mai, mai vei Josefa Simici. Sureta e vica na gone me ra wasea na nodra nanuma. Wasea na nomu ivakadinadina ni kosipeli vakalesui mai kei na iVola i Momani.