Okotova

Au na Wasea na Kosipeli Vei Ira Kece na Luve ni Kalou

“Me caudre vakakina na nomudou rarama e matadra na tamata, me ra raica na nomudou ivalavala vinaka ka vakarokorokotaka na tamamudou sa tiko mai lomalagi” (Maciu 5:16).

Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”

Railesuva: nanuma mo solia vei ira na gone na madigi me ra wasea na veika era sa vulica ni ra sarava se rogoca na koniferedi raraba (raica na Sepiteba, iKa 2 ni Macawa).

iMatai ni Macawa: na bulataki ni kosipeli e vukei au meu dua na daukaulotu ena gauna oqo.

Kila na ivunau ka Vakauqeta na kila ka (rogoca e dua na italanoa): Vakaraitaka e dua na iyaloyalo ni daukaulotu. Taroga vei ira na gone se cava era dau cakava na daukaulotu. Wasea na italanoa eso oqo se dua mai na Friend se Liaona: “Ena dua na siga erau a tukituki e rua na daukaulotu ena katuba ni dua na vale. A dolava na katuba e dua na marama na yacana o Mrs. James. Erau tukuna vua na daukaulotu ni rau lako mai na Lotu i Jisu Karisito ni Yalododonu Edaidai. A sureti rau na daukaulotu ki loma ni vale o Mrs. James ka tukuna vei rau ni vinakata me kila eso tale na ka me baleta na Lotu. … E tukuna vei rau na daukaulotu o Mrs. James ni a dau tiko veivolekati kei na dua na matavuvale eratou lewena na Lotu. E kaya o koya ni ratou dau ivalavala malua ka yalovinaka na matavuvale oya. Eratou dau caka dodonu ki na tamata yadua ka rokova na nodra iyaya na tamata kecega. E kaya o Mrs. James ni vinakata me kila na veika e baleta na lotu ka vakatavulici ira na gone oya me ra itokani vinaka” (Lalai 2, 52). Taroga: “Na sala cava era daukaulotu kina na gone era a tiko volekati Mrs. James?” Vakamacalataka ni veigauna kecega eda bulataka kina na kosipeli eda sa daukaulotu. Sureti ira na gone me ra cavuta vata kei iko “Na bulataki ni kosipeli e vukei au meu dua na daukaulotu ena gauna oqo,” vakabibitaka na vosa ena gauna oqo.

iKa 2 ni Macawa: na bulataki ni kosipeli e vukei au meu dua na daukaulotu ena gauna oqo.

Vakauqeta na kila ka (lagati e dua na sere ka veivosakitaki na ivakatagedegede vakosipeli): Cakava e 13 na kadi, me volai toka ena kadi yadua e dua na “Noqu iVakatagedegede Vakosipeli” (raica na “Gauna ni Veiwasei: Muria na iVunau,” Friend, June 2006, 36). Solia yani eso na kadi vei ira na gone, me ra qai veisolitaka yani ni ra lagata kece tiko na “I Want to Be a Missionary Now” (CS, 168). Ni sa tini na sere, me qai wilika i cake na ivakatagedegede o koya na gone e taura tu na kadi ka wasea na sala ena vukei koya kina na nona bulataka na ivakatagedegede oya me dua na daukaulotu ena gauna oqo. Me tokaruataki, na vakayagataki ni dua tale na kadi ena veigauna yadua.

era lagasere tiko na gone

Ni ra lagata e dua na ivunau ena vukei ira na gone me ra vulica ka dau nanuma tiko. Era dau vuli talega vakavinaka na gone kevaka era raica e dua na iyaloyalo se cakava e dua na itaviqaravi me salavata kei na sere se ivakatagi.

Vakauqeta na kena vakayagataki (vakadavo takete): Kerei ira na gone yadua me ra digitaka e dua na ivakatagedegede vakosipeli era na tovolea me ra bulataka vakavinaka cake ena macawa mai oqo. Me ra vola se droinitaka e dua na iyaloyalo ni ivakatagedegede ena dua na tiki ni pepa ka me ra dau raica e veisiga yadua me ivakananumi. Sureti ira me ra mai tukuna na veika era sotava ena Lalai ena macawa ka tarava.

iVakasala: Eso na macawa e levu cake na vakasama e koto kina mai na kena e rawa ni o vakavulica ena dua na gauna ni veiwasei. Digitaka ena yalomasumasu na itaviqaravi ena vinaka duadua vei ira na gone ena nomu Lalai.

iKa 3 ni macawa: Au rawa ni wasea na kosipeli vei ira na noqu matavuvale kei na noqu itokani.

Kila na ivunau (rogoca e dua na italanoa): Ni se bera na Lalai, wilika na vosa nei Elder Robert C. Oaks ena koniferedi ni Okotova 2000, “Wasea na Kosipeli” (raica na Ensign, Nove. 2000, 81–82). Tukuna vei ira na gone na italanoa ni wainimoli. Vakamacalataka ni kosipeli e kamica cake sara mai na wainimoli ka dodonu me da wasea yani vei ira na tani. Me ra kaya na gone, “E rawa ni’u wasea na kosipeli vei ira na noqu matavuvale kei ira na noqu itokani.”

Vakauqeta na kila ka (vakarorogo vua e dua na vulagi sureti): Sureta e dua na daukaulotu se dua e sa lesu mai na kaulotu me tukuna na sala eso e rawa ni ra wasea kina na gone na kosipeli vei ira na tani (me vaka na nodra ivakaraitaki vinaka, nodra sureti mai na gone ki na Lalai, kei na nodra wasea na nodra ivakadinadina) kei na sala ena vukea kina na Tamada Vakalomalagi kei ira na daukaulotu na nodra sasaga.

Vakauqeta na kena vakayagataki (rogoca e dua na italanoa ka wasea na vakasama eso): Vakananuma vei ira na gone ni rawa ni ra daukaulotu ena gauna oqo. Tukuna e dua na gauna o wasea kina na kosipeli o iko se dua o kila. Me ra tucake yadudua na gone ka cavuta e dua na vosa mai na iyatuvosa “Au rawa ni wasea na kosipeli.” Sureta na gone e cavuta na “kosipeli” me vakasamataka e dua na sala ena rawa kina vua me wasea na kosipeli vei ira na nona matavuvale se nona itokani. Vakayacori tale ke balavu na gauna.

iKa 4 ni macawa: E vaqaqacotaki na noqu ivakadinadina ni’u wasea na kosipeli.

tavaya wai se roka ni kakana

Na lesoni vakaraitaki e vakavurea na kauwai ka vagolea na nodra vakasama na gone ki na dua na ivakavuvuli ni kosipeli.

Kila na ivunau (raica e dua na lesoni vakaraitaki): vakatawana e dua na koniteina makare ena wai. Vakamacalataka ni veigauna eda wasea kina na kosipeli, ena qaqaco cake na noda ivakadinadina. Vakaturuma vakadua na roka ni kakana ena loma ni koniteina. Solia e vica na ivakaraitaki ni sala e rawa ni da wasea kina na kosipeli, ka vakaturuma e dua tale na roka vata ga ni kakana ena veiivakaraitaki yadua. Dusimaka ni, me vaka ga na kena kata vakalevu cake na roka ena veituru yadua ni roka ni kakana, ena qaqa cake na noda ivakadinadina ena veigauna yadua eda wasea kina.

papaloaloa

Vakauqeta na kila ka (veivosakitaki na ivakadinadina): Biuta na veika oqo ena dua na kato: dua na iyaloyalo kei Jisu Karisito, dua na iyaloyalo kei Josefa Simici, dua na kena iyaloyalo na parofita nikua, dua na iVola i Momani, kei na vosa “Lotu dina.” Vola na vosa ivakadinadina ena papa, ka tarogi ira na gone se cava na ivakadinadina. Veivosakitaka na kena isau era tukuna. Tukuna na italanoa eso oqo: “A rere e dua na goneyalewa me wasea na nona ivakadinadina baleta ni sega ni dei na yalona. Ia e kila ni bibi, ena dua na siga a tu ena yaloqaqa ka wasea na nona ivakadinadina, ka tuva e lima na ka e vakabauta. Ni sa oti, a vakila ni vinaka na yalona ka kila ni sa qaqaco cake na nona ivakadinadina.” Me ra raica na gone na lima na ka e vakadinadinataka ena nomu dreta mai na taga o sa vakarautaka tu. Veivosakitaka na veika yadua oqori, ka vakaraitaka tu mai liu.

Vakauqeta na kena vakayagataki (wasea na ivakaraitaki): Vakatara vei ira na gone me ra wasea e dua na ivakaraitaki ni sala ena rawa kina vua me wasea na kosipeli. Ena veigauna e cavuta kina e dua na gone e dua na ka, vakaturuma vakadua na roka ni kakana ki na koniteina wai me vakaraitaka ni kena wasei na kosipeli e rawa ni vaqaqacotaka na ivakadinadina. (Kevaka era lewe levu sara na nomu, Lalai, o na gadreva beka mo cakava vakaiwasewase, me rawa ni soli kina na madigi vei ira yadua na gone me ra wasea nodra vakasama.)

Sureta na vakasama: Ni ra wasea na gone na sala era dau bulataka kina e dua na vunau, ena vakadeitaki kina e lomadra na itukutuku o ya ka sureta na Yalotabu. Ni ko vakatavulica oti e dua na vunau, solia na gauna vei ira na gone me ra wasea na nodra rawa ni laki bulataka ena nodra bula.