Tiseba

Au Kila ni na Lako Tale Mai o Jisu Karisito

“Ni’u sa kila sa bula tiko na noqu iVakabula, ena tu talega e vuravura ena siga mai muri” (Jope 19:25).

Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”

iMatai ni Macawa: Era sa tukuna rawa tu na parofita ni na lako tale mai ki vuravura o Jisu Karisito.

Vakauqeta na kila ka (wili ivolanikalou): Vakaraitaka na iyaloyalo kei Aisea, Nifai, Tui o Penijamini, Abinadai, Alama, kei Samuela na Leimani mai na iVola ni iYaloyalo Vakosipeli kei na pakete ni iyaloyalo ena Lalai 4. Wasewasei ira na gone ka solia ki na iwasewase yadua e dua vei ira na ivolanikalou oqo me ra raica: (1) Aisea 7:14; 9:6; (2) 1 Nifai 11:14–15, 20–21; (3) Mosaia 3:5–8; (4) Mosaia 15:1; (5) Alama 7:10–12; kei na (6) Ilamani 14:1–3. Kerei ira na gone me ra raica se o cei na parofita e vosa tiko kei cei e parofisaitaka tiko. Kerea na iwasewase yadua me ra vakaraitaka na kena iyaloyalo na parofita ka tukuna vei ira na vo ni gone se o cei oya kei na cava a tukuna. (Me baleti ira na gone sobu, vukei iratou e ono na gone me ratou vakaisulu ni drama rawarawa ga me ratou vakatakarakarataki iratou kina na ono na parofita. Tukuna vakalekaleka na veika me baleti ira na parofita yadua kei na veika era dui tukuna me baleta na nona sucu kei na nona veiqaravi o Jisu Karisito.) Vakamacalataka ni o ira yadua na parofita oqo era a tukuna ni na lako mai ki vuravura o Jisu Karisito. Lagata na “Samuel Tells of the Baby Jesus” (CS, 36). Vakadinadinataka ni a lako mai ki vuravura o Jisu Karisito me vaka era a tukuna na parofita.

iKa 2 ni Macawa: Ena lako tale mai ki vuravura o Jisu Karisito.

Kila na ivunau: Vakaraitaka e dua na iyaloyalo ni iKarua ni Lako Mai (VYV, naba 66). Vakananuma vei ira na gone ni a lako taumada mai ki vuravura o Jisu Karisito me vaka e dua na gonelailai mai Peceliema. Vakamacalataka ni da vulica ena ivolanikalou ni na lesu tale mai ki vuravura o Koya.

Vakauqeta na kila ka (qitotaka e dua na qito ni veivakasotari): cakava e rua na iwasewase me rawa ni vakasotari na veiivolanikalou oqo, dua na idusidusi ena dua na tikinipepa: Maciu 16:27; Maciu 24:30, 36, 42; Cakacaka 1:9–11; V&V 36:8; V&V 45:57–59; V&V 88:95–98. Vakatoboicutaka na pepa ena papa. Me ra veivukevuke na gone ena kena digitaki e rua na tikinipepa. Vukici rau cake me laurai kevaka erau sota. Kevaka erau sega ni veisotari, vakatobuicutaki rau tale. Kevaka erau sota, laiva me laurai tu na ivolanikalou ka kerei ira na gone me ra raica na kena idusidusi ka saga mera kila na cava e vakatavuvulitaka me baleta na nona lako tale mai na Karisito. Tokaruataki tiko me yacova ni ra sa vakasotari kece.

iKa 3 ni macawa: Au na vakavakarau meu bula vata tale kei Tamada Vakalomalagi kei Jisu Karisito.

Kila na ivunau (qitotaka e dua na qito ni kilakila mada): Sureta e rua se tolu na gone me ra matanataka na nodra vakavakarau me ra laki davo, laki lotu, se dua na ilakolako balavu. Me ratou qai vakilakila na ilawalawa kadua na ka eratou matanataka tiko. Veivosakitaka vata kei ira na gone na veika ena yaco kevaka eda a sega ni vakavakarau me da cakava na veika oqo. Vakamacalataka ni dua na ka bibi e dodonu me da vakarautaki keda kina sai koya na laki bula vata tale kei na Tamada Vakalomalagi kei Jisu Karisito.

iTaviqaravi ni vakarorogo, me vaka na matanataki, e rawa ni vakayagataki me vakavurea na yalo nanamaki ka vukei ira na gone me ra vagolea na nodra vakasama ki na ulutaga ni lesoni. O ira era sega ni vakaitavi era na vakaogai ena nodra saravi ira tiko na vo ni gone.

Vakauqeta na kila ka (lagasere): Lagata na iKa 3 ni qaqa ni “Au Luve ni Kalou” (NVL, 2), ka sureti ira na gone me ra vakarogoca na sala e rawa ni da vakarautaki keda kina me da laki bula tale kei Tamada Vakalomalagi. Sureti ira na gone me ra tucake ka lagata tale na malanivosa “Meu dau muria na ivunau”. Vakamacalataka ni so na sere ni Lalai e vakananuma vei keda na veika e rawa ni da cakava me da vakavakarau kina me da laki bula tale kei na Tamada Vakalomalagi kei Jisu Karisito (me vaka beka oqo, “I Will Follow God’s Plan” [CS, 164–65], “Keep the Commandments” [CS, 146–47], “Kindness Begins with Me” [CS, 145], kei na “When I Am Baptized” [CS, 103]). Me tabaka na daunipiano e vica na qaqa ni dua vei ira na sere oqori, me ra qai kilakila na gone se sere cava. Sureti ira na gone me ra lagata na sere ka me ra tucake ni ra lagata e dua na sala e rawa ni ra vakarautaki ira kina me ra laki bula vata kei Tamada Vakalomalagi. Tokaruataka ena vo ni sere.

Vakauqeta na kena vakayagataki (droini): Me ra droinitaka na gone na sala eso e rawa ni ra vakavakarau kina me ra laki bula vata kei Tamada Vakalomalagi kei Jisu Karisito. Solia vei ira yadua na gone e dua na tikinipepa, ka sureti ira me ra droinitaka na ligadra. Qai kerei ira me ra vola se droinitaka ena veiqaqalo yadua ni droini ni ligadra e dua na ka era rawa ni cakava me ra vakavakarau kina. Kerei ira na gone me ra digia e dua vei ira na ka oqori me ra cakacakataka ena loma ni macawa. Tukuna vei ira ni o na kerei ira me ra wasea na veika era na cakava ena Sigatabu, mai oqo.

iVakatakilakila

era soqoni wavolita na piano na gone ka ra lagasere

iKa 4 ni macawa: Au vakadinadinataka ni o au e dua na luve ni Kalou.

Kila na ivunau (qitotaka e dua na qito ni kilakila mada): Vola ena papa, “E dua tiko na noqu ______________.” Tukuna vei ira na gone me ra vakarorogo ki na veivuke eso oqo ka me ra roqota na ligadra ka tucake ni ra kila ni rawa ni ra vakalewena na vanua e lala tu:

Oqo ena vukei keda me vinaka na lomada, mamarau, ka raragi na yaloda.
E solia vei keda oqo na Yalo Tabu.
Oqo ena vukei keda me da vinakata me da digidigi dodonu.
E rawa ni da wasea kei ira tale eso na ka oqo ena noda vosa ena Lalai, ena lotu vakamatavuvale, kei na soqoni ni lolo kei na soli ivakadinadina.

Taroga: “Na cava na ka vakasakiti oqo?” Vakalewena na vanua e lala tu ena vosa ivakadinadina, ka tukuna vei ira na gone ni rawa ni ra rawata e dua na ivakadinadina ni ra luvena na Kalou.

Ni volai e dua na ivakavuvuli ni kosipeli ena vukei ira na gone me ra nanuma tiko.

Vakauqeta na kila ka (lagati e dua na sere): Sureti ira na gone me ra lagata “Au Luve ni Kalou” (NVL, 2–3), ka kerei ira me ra vakasamataka na ivakarau ni lomadra ni ra lagasere tiko. Kerei iratou e vica na gone me ratou wasea na veika eratou vakila. Vakamacalataka ni veika vinaka eratou vakila e taka mai na Yalo Tabu, ka tukuna vei ira ni ra luvena dina na Kalou. Vakamacalataka ni noda kila ni dina na veika oqo sai koya na kena ibalebale me tiko na noda ivakadinadina. Vakamacalataka ni vuqa tu na sala me da kila kina ni da luvena na Kalou. Taroga: “O kila vakacava ni o luvena na Kalou?”

Vakauqeta na kena vakayagataki (rogoca na ivakadinadina): Taroga vei ira na gone: “Na cava sa rui bibi kina me tiko e dua na noda ivakadinadina ni da luvena na Kalou? E vukei keda vakacava me da digidigi donu na taukeni ni noda ivakadinadina?” Wasea na nomu ivakadinadina ka sureta e vica na gone kei na uabula me ra wasea na nodra ivakadinadina ni da luvena kece na Kalou.