Julai
Na Matavuvale Era Tiki ni Nona iTuvatuva na Tamada Vakalomalagi
“Na matavuvale sa lesi mai vua na Kalou” (“Na Matavuvale: Ai Vakaro ki Vuravura Raraba,” parakaravu 7).
Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka vakataki ira. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”
iMatai ni Macawa: A tuva vei au na Tamada Vakalomalagi me’u lako mai ki na dua na matavuvale.
Kila na ivunau: Vakaraitaka vei ira na gone “Na Matavuvale: Ai Vakaro ki Vuravura Raraba,” ka vakamacalataka ni nona ituvatuva na Tamada Vakalomalagi me da lako mai vakamatavuvale ki vuravura na Luvena.
Vakauqeta na kila ka (raica na iyaloyalo): Wasewasei ira na gone ka solia ki na veiwasewase yadua na itaba ni dua na matavuvale (me vaka beka oqo, rau vakavulici ira tiko na luvedrau o Atama kei Ivi [VYV, naba 5], Vakabula na luvei Jairo na Karisito [VYV, naba 41], tadu yani ki na vanua yalataki na matavuvale nei Liai [VYV, naba 71], kei na dua na matavuvale e masu tiko [VYV, naba 112]). Sureta na iwasewase yadua me ra raici ira na lewe ni matavuvale ena nodra itaba. Me ra qai vakaraitaka na veiwasewase yadua na nodra itaba vei ira na vo ni gone ka dusia na tama, tina, kei ira na gone. Kerei ira na gone me ra vakaraitaka ena iqaqalo ni ligadra se vica na tamata e tiko ena nodra dui matavuvale. Tukuna vei ira ni nodra matavuvale e tiki ni nona ituvatuva na Tamada Vakalomalagi.
Vakauqeta na kena vakayagataki: kerei ira na tagane me ra tucake. Vakamacalataka ni rawa me ra na tama ni dua na matavuvale buladodonu ena dua na siga. Sureta e vica na gonetagane me ratou tukuna e dua na ka e rawa ni ra cakava me rawa ni ra tama vinaka kina. Kerei ira na goneyalewa me ra tucake, ka vakamacalataka ni na rawa vei ira yadua me ra tina ni dua na matavuvale buladodonu. Kerea e vica vei ira me ra tukuna e dua na ka e rawa ni ra cakava me ra tina vinaka kina. Sureti ira kece na gone me ra wasea e dua na ka e rawa ni ra cakava me ra kauta mai kina na marau ki na matavuvale era taukena tu ena gauna oqo.
Era na dau nanuma vakadede ka vuli vakavinaka na gone ni ko vakaraitaka na veivakasama eso ena iyaloyalo kei na ivakaraitaki tale eso (raica na
iKa 2 ni Macawa: Na masumasu vakamatavuvale, vuli ivolanikalou vakamatavuvale, kei na lotu vakamatavuvale e rawa ni vaqaqacotaka na noqu matavuvale.
Na lesoni vakaraitaki e rawa ni vakayagataki me vakavurea na yalo nanamaki, vagolea na nodra vakasama na gone, ka vakamacalataka e dua na ivakavuvuli ni kosipeli.
Kila na ivunau ka Vakauqeta na kila ka (raica e dua na lesoni vakaraitaki): Me taura tu e dua na gone e dua na ivesu kau. Vakamacalataka ni kau e matataki ira na lewe ni dua na matavuvale. Vola na “masu vakamatavuvale,” “vuli ivolanikalou vakamatavuvale,” kei na “lotu vakamatavuvale” ena tolu na tiki ni pepa. Tarogi ira na gone se sala cava e vaqaqacotaka ka taura vata tu kina na matavuvale na veiitaviqaravi oqo. Sureti ira na gone me ra ologa na ivesu kau ena pepa. Vakamacalataka na veiitaviqaravi oqo e dau sureta na Yalotabu ki na noda veivale kei na noda bula ka kauti keda vakavoleka mai vei Tamada Vakalomalagi kei Jisu Karisito, oqo e dau vakaukauwataka na noda matavuvale.
Vakauqeta na kena vakayagataki (droini iyaloyalo): Solia vei ira na gone na tiki ni pepa, ka sureti ira me ra droinitaka na iyaloyalo ni veiitaviqaravi vakamatavuvale ka sa vaqaqacotaki ira. Sureti ira me ra wasea na veika era sa droinitaka vei ira na lewe ni nodra matavuvale.
iKa 3 ni Macawa: E rawa ni vakalougatataka ka vaqaqacotaka na noqu matavuvale na matabete.
Kila na ivunau (qitotaka e dua na qito ni kilakila mada): Tukuna vei ira na gone ni o na solia vei ira eso na veivuke me baleta e dua na ka e dau veivakalougatataki ka vaqaqacotaka na matavuvale. Kerei ira me ra laveta na ligadra ni ra sa kila na isau ni taro. Solia eso na veivuke me baleta na matabete, me vaka beka oqo “Na Tama e tu vua oqo e rawa ni vakalougatataka na nona matavuvale” kei ira na “gonetagane yabaki 12 e rawa ni soli vei ira.” Ni ra sa tukuna na gone na isau ni taro dodonu, mo ni qai kaya vata, “Na matabete e rawa ni vakalougatataka ka vaqaqacotaka na matavuvale.”
Vakauqeta na kila ka (veivosakitaki na matabete): Kerei ira na gone me ra tukuna eso na ka e rawa ni ra cakava na matabete (me vaka beka oqo, veipapitaisotaki, solia na isolisoli ni Yalo Tabu, vakalougatataki ira na tauvimate, ka veisoliyaka na sakaramede). Vakaraitaka eso na iyaloyalo ni veicakacaka vakalotu oqo kei na kena veivakalougatataki ni o ni veivosakitaka tiko, ka vukei ira na gone me ra kila na sala era vakalougatataka ka vaqaqacotaka kina na matavuvale. Vakaraitaka e dua na iyaloyalo ni dua na valetabu. Vakamacalataka ni dua na veivakalougatataki cecere duadua ni matabete sa ikoya ni rawa kina me da na lako ki na valetabu ka vauci vata me da matavuvale tudei tikoga.
Vakauqeta na kena vakayagataki (veiwasei vakasama): Sureti iratou e vica na gone me ratou tucake ka wasea e dua se rua na sala sa vakalougatataka ka vaqaqacotaka kina na nodra matavuvale na matabete. Vakayaloqaqataki ira me ra wasea na veivakasama oqo vata kei nodra matavuvale ena nodra itikotiko.
iKa 4 ni macawa: E vinakata na Tamada Vakalomalagi me’u vakamau ena valetabu ka taukena e dua na matavuvale tawamudu.
Kila na ivunau (raica e dua na iyaloyalo): Vakaraitaka e dua na iyaloyalo ni dua na veiwatini erau tucake tu ena mata ni valetabu ena nodrau isulu ni vakamau. Taroga vei ira na gone na vuna e vinakata kina na Tamada Vakalomalagi me da vakawati ena valetabu. Vakamacalataka ni gauna eda vakamau kina ena valetabu, sa rawa me tawamudu na matavuvale.
Vakauqeta na kila ka (rogo ivakadinadina): Sureta e vica na qasenivuli, oka kina eso na veiwatini, me ra wasea na veivakalougatataki era sa ciqoma ena vuku ni valetabu kei na vakamau ena valetabu. Kerei ira na gone me ra vakarogoca eso na ivakadinadina ni ra wasea na qasenivuli na nodra vakasama. Cakava e dua na lisi ni veivakalougatataki oqo ena papa.
Vakauqeta na kena vakayagataki: Kerea e vica na gone me ra tucake ka wasea na vuna era na vinakata kina me ra vakamau ena valetabu kei na veika e rawa ni ra cakava ena gauna oqo me ra vakarautaki ira kina ki na veivakalougatataki oqori.