Era Vakatavulici Keda na Parofita me da Bulataka na Kosipeli Vakalesui Mai

“E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” Emosi 3:7

Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”

iMatai kei na iKa 2 ni macawa: E liutaka tiko na Lotu na parofita bula ena nona veidusimaki o Jisu Karisito.

Kila na ivunau (sarava na iyaloyalo ka qitotaka e dua na qito): Vakaraitaka e dua na kena iyaloyalo na parofita bula. Kerei iratou e vica na gone me ratou veivukevuke ena nodratou liutaki ira na Lalai ena dua na ivalavala rawarawa ga me vaka na kiso se vakasausau. Dusia na kena iyaloyalo na parofita ka vakamacalataka ni o koya na Peresitedi ni Lotu ka dodonu me da muria na veika e kerea vei keda me da cakava. Taroga: “E vakamuri cei na parofita?” Vakaraitaka e dua na iyaloyalo kei Jisu Karisito, ka vakamacalataka ni parofita e cakacaka tiko ena Nona veidusimaki.

Vakauqeta na kila ka (veivosakitaka na ivakavuvuli ni parofita): Vakaraitaka vei ira na gone na Ensign se Liaona ni iotioti ni koniferedi raraba a vakayacori. Vakamacalataka ni gauna ni koniferedi raraba, e dau vakatavulici keda na parofita ena veika e vinakata o Jisu Karisito me da cakava. Digia eso na iyatuvosa mai na nona vosa na parofita ena koniferedi, ka sureti ira na gone me ra wilika vakarogolevu. Mo ni cakacaka vata, ka tuva na veika e rawa ni ra cakava na gone me ra muria kina na parofita.

Vakauqeta na kena vakayagataki (droinitaka e dua na iyaloyalo): Solia yadua vei ira na gone e dua na tiki ni pepa. Sureti ira me ra lobika veimama. Kerei ira me ra droinitaka na parofita ena dua na veimama ka me ra qai vola se droinitaka ena ikarua ni veimama e dua na ivakarau me ra na muria kina na parofita. Sureti ira na gone me ra tucake ka taura tu na nodra iyaloyalo ni ra lagata na italetale ni “Follow the Prophet” (CS, 110–11).

Me baleta na iKa 2 ni Macawa, vakatavulica vei ira na gone e dua na ka me baleta na veika sa vakatavuvulitaka na parofita ena dua na koniferedi raraba se qai oti walega. Ni o tuvalaka na itaviqaravi mo na vakayagataka, vakasamataka na sala mo na raica kina na ivakavuvuli ni parofita ka vukei ira na gone me ra kila vinaka ka bulataka vakataki ira.

iKa 3 ni macawa: Era vakavulici au na parofita me’u dau saumi ikatini.

Kila na ivunau (wilika e dua na ivolanikalou ka rogoca e dua na italanoa): Vakamacalataka ni o Malakai e dua na parofita ni Veiyalayalati Makawa ka a vakatavulici ira na tamata me ra dau sauma na nodra ikatini. Kerea e dua na gone me wilika na Malakai 3:10 ni ra vakarorogo na vo ni gone ena veika e yalataka vei keda na Turaga kevaka eda sauma na noda ikatini. Vakamacalataka ni “se’u na dolava, se segai na katuba ni lomalagi” e baleta na veivakalougatataki eda na rawata ni da sauma na ikatini.

Vakauqeta na kila ka (raica e dua na lesoni vakaraitaki): Sureta mai ki liu e 10 na gone. Solia vei ira e yadua na apolo (se dua tale na vuanikau) ka kerei ira me ra taura cake tu na nodra apolo me vaka ni ra vu ni apolo. Me dua tale na gone me “betia” na apolo ka biuta ena loma ni basikete. Vakamacalataka ni ikatini sa ikoya na dua na ikatini ni veika eda rawata ka dau saumi vakailavo, ia ena so na gauna e liu era dau solia na tamata na veika ga e tu vei ira. Taroga e vica na apolo me na solia na gone vua na bisopi me ikatini.

iVakatakilakila

ira na gone vaka me ra beti apolo tiko

Vakauqeta na kena vakayagataki (veivosakitaki na ikatini): Vakaraitaka e dua na risiti ni soli ikatini kei na waqanivola. Veivosakitaka na iwalewale ni soli ikatini. Sureti ira na gone me ra wasea na sala sa vakalougatataki kina na nodra matavuvale ena saumi ikatini. Wasea na ivakadinadina me baleta na veivakalougatataki e dau yaco mai ena noda talairawarawa ki na nona ivakasala na parofita ni saumi ikatini.

iKa 4 ni macawa: Era vakavulici au na parofita me’u bulataka na Vosa ni Vuku.

Kila na ivunau (wilika e dua na ivolanikalou): Kerei ira na gone me ra tukuna e dua na gauna a vakasalataki ira kina na nodra itubutubu me ra qaqarauni mai na veika rerevaki. Taroga se cava na vuna e vakasalataki ira kina na nodra itubutubu me ra qaqarauni. Vakamacalataka ni Tamada Vakalomalagi e lomani keda ka vakasalataki keda mai vua na Nona parofita me da qaqarauni mai na veika rerevaki. Kerea e dua na gone me wilika na Vunau kei na Veiyalayalati 89:4, ka me ra vakarogoca na gone na yaca e vakatokai kina na ivakasala ni qaqarauni oqo. Vakamacalataka ni a ciqoma na Parofita o Josefa Simici na ivakasala ni qaqarauni oqo, na Vosa ni Vuku, ena ivakatakila mai vua na Kalou.

Vakauqeta na kila ka (wili ivolanikalou): Ni bera na Lalai, kabira na veidusidusi vakaivolanikalou oqo ena boto ni veidabedabe duidui eso: V&V 89:7, V&V 89:8, V&V 89:9, V&V 89:10, V&V 89:12, V&V 89:16. Vakamacalataka ni a solia vei keda na Tamada Vakalomalagi na yagoda ka vinakata o Koya me da dau qarauna; sa solia vei keda o Koya na Vosa ni Vuku me vukei keda me da kila na veika ena vukea na yagoda kei na veika ena vakararawataki kina. Kerei ira na gone me ra rai ena boto ni nodra idabedabe me ra raica na nodra idusidusi vakaivolanikalou. Sureti ira yadua na gone era kunea e dua na idusidusi me wilika mai cake na ivolanikalou oqori. Veivosakitaka na ibalebale ni veitikina yadua. Vakamatatataka ni “gunu kaukauwa” sa ikoya na alakaolo kei na “gunu katakata” sa ikoya na kofe kei na ti.

Vakauqeta na kena vakayagataki (qitotaka e dua na qito): Biuta ena dua na kato eso na iyaloyalo ni veikakana eso, gunu, kei na veika tale eso e vinaka se ca ki na yago. Sureta e dua na gone me digitaka e dua na iyaloyalo mai na kato ka vakaraitaka vei ira na vo ni gone. Kerei ira na gone me ra dolava na gusudra kevaka e vinaka ka tabonaka na gusudra kevaka e ca. Wilika na Vunau kei na Veiyalayalati 89:18–21 ka veivosakitaka na veivakalougatataki eda na rawata ni da muria na nona ivakasala na parofita me da bulataka na Vosa ni Vuku.

E rawa ni ra vuli na gone mai na veitaviqaravi lasa kei na yavavala ka tikori tikoga na ivalavala e vakarokoroko.

Veivuke vei iliuliu ni sere.

E rawa ni dua na sere ni vula oqo na “Turaga Keitou Vuabale” (Sere ni Lotu, naba 10). Oqo eso na vakasama e rawa ni vakayagataki me vakatavulici kina e dua ga na sere e rawa. E dina ni vakayagataki ena ivakaraitaki oqo na tikinipepa ni vosa, ena so na sere e rawa ni vakayagataki na iyaloyalo me ra vakavulici kina na gonelalai.

Vola na veimalanivosa yadua ni sere ena dua tale na tikinipepa roka duatani (se vola na veimalanivosa yadua ena dua tale na roka). Wasea vakarua na malanivosa yadua. Vakayagataka e dua ga vei ira na iwalewale oqo mo vakatavulica kina na sere:

Biuta veiyawaki na veitikinipepa ni vosa ena loma ni rumu. Laiva vei iratou e vica na gone me ratou biuta na veimalanivosa ena kena ituvatuva dodonu ni o lagata vata vakavica kei ira na gone na sere. Lagata ka veitalanoataka na malanivosa yadua, oti qai lagata taucoko na sere.
Tekivu ena tikinipepa ni vosa sa tuvai tu ena papa. Lagata na sere vata kei ira na gone. Kerea e dua na gone me kauta tani e dua na tikinipepa ni vosa, ka lagata tale na sere. Taleva tiko me yacova ni sa kau tani kece na tikinipepa ni vosa.
Biuta na imatai ni tikina ni veimalanivosa yadua ena papa ena kena ituvatuva dodonu ka dui biubiuta ena yasa kadua tale ni papa. Lagata na imatai ni tikina ni malanivosa ka kerei ira na gone me ra vaqara na tikina kadua ka vakamacalataka na ibalebale ni malanivosa.
Wasei ira vakarua na gone. Me lagata e dua na iwasewase na imatai ni tikina ni veimalanivosa yadua ka lagata na iwasewase e dua tale na ikarua ni tikina. Me veisau na iwasewase ka lagati tale.

iVakatakilakila

tikinipepa ni vosa

Sa tu na tikinipepa ni vosa ena sharingtime.lds.org