Feperueri
A Buli na Vuravura me Baleti Ira na Luvena na Tamada Vakalomalagi
“Ia me da kauta yani na veika kece ka bulia na vuravura me ra tawana ko ira oqo; Io me da vakatovolei ira mada kina, era na muria na veika kece sa vakarota vei ira na Turaga na nodra Kalou se sega” (Eparaama 3:24–25).
Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”
iMatai ni Macawa: A bulia na vuravura o Jisu Karisito ena veidusimaki ni Tamada Vakalomalagi.
Kila na ivunau (raica na iyaloyalo): Vakaraitaka e dua na iyaloyalo ni vuravura ka taroga vei ira na gone se o cei e bulia na vuravura. Vakamacalataka ni a bulia o Jisu Karisito na vuravura ena veidusimaki ni Tamada Vakalomalagi. Qai vakaraitaka e dua na iyaloyalo kei Jisu Karisito ka sureti ira na gone me ra kaya, “A bulia na vuravura o Jisu Karisito.”
Vakauqeta na kila ka (droini iyaloyalo): Tukuna vei ira na gone ni tiki ni nona ituvatuva ni marau na Tamada Vakalomalagi sa ikoya me na mai buli e dua na vuravura me da taukena kina e dua na yago me rawa ni da tubu ka vuli kina. Droinitaka e ono na iwirini naba taki ena papaloaloa. Wasei ira vakaono na gone, ka kerea na veiwasewase yadua me wilika e dua vei ira na ivolanikalou oqo me baleta na ono na siga ni Veibuli: Nai Vakatekivu 1:1–5 (imatai ni siga); Nai Vakatekivu 1:6–8 (iKa 2 ni siga); Nai Vakatekivu 1:9–13 (iKa 3 ni siga); Nai Vakatekivu 1:14–19 (iKa 4 ni siga); Nai Vakatekivu 1:20–23 (iKa 5 ni siga); Nai Vakatekivu 1:24–31 (ika 6 ni siga). Sureta na iwasewase yadua me ra lako yadudua mai ki liu, tukuna vei ira na vo ni gone na veika a yaco ena siga era wilika, ka droinitaka e dua na iyaloyalo me baleta na siga oya ena kena iwirini. Wilika vata Nai Vakatekivu 2:1–3. Railesuva vata kei ira na gone na veika a yaco ena veisiga yadua ni Veibuli.
iKa 2 ni Macawa: Na Lutu e tiki ni nona ituvatuva na Kalou.
Kila na ivunau (raica e dua na iyaloyalo): Vakaraitaka e dua na iyaloyalo i Atama kei Ivi. Tukuna vei ira na gone ni o Atama kei Ivi erau imatai ni tamata me rau lako mai ki vuravura ka vakayago; erau a mai biu ena dua na were ka vakatokai ko Iteni. Vakamacalataka ni gauna erau biuta kina na were, sa yaco me rawa kina vei keda me da lako mai ki vuravura; na nodrau biuta na were sa ikoya na ka e vakatokai me Lutu. Vola “Na Lutu e tiki ni nona ituvatuva na Kalou,” ka me ra tukuna vata kei iko na gone.
Vakauqeta na kila ka (veivosakitaki na ivunau): Droinitaka e rua na iwirini ena papa, ka vakatoka e dua me vuravura ni yalo kei na kena kadua me vuravura. Vakamacalataka ni gauna erau tiko kina o Atama kei Ivi ena Were ko Iteni, eda a tiko ena vuravura ni yalo. Vakaraitaka e dua na kedra iyaloyalo eso na gone, ka vakabira ena papa ena loma ni iwirini ni “vuravura ni yalo.” Vakamacalataka ni gauna erau sa biuta kina na were o Atama kei Ivi, sa rawa ni da lako mai ki vuravura. Sureta e dua na gone me tosoya na kedra iyaloyalo na gone ki na iwirini ni “vuravura.” Kerei ira na gone me ra dulaka cake na nodra idovidovi ni kakana kevaka era nanuma ni vinaka na Lutu, ka sureta e dua na gone me vakamacalataka na vuna.
Vakauqeta na kena vakayagataki (cakava e dua na qito ni vakasotara vata): Vakarautaka e vica na malanivosa me vakasotari vata me matataka na veivakalougatataki eda sotava ena bula oqo (me vaka beka oqo, dua na yago, matavuvale, veidigidigi ena vinaka kei na ca, madigi ni bula, bula vinaka kei na tauvimate, marau kei na rarawa, reki kei na mosi). Vakatoboicutaka tu na pepa ena papa. Sureti ira na gone me ra veivukevuke ena kena digitaki e rua na pepa ka raica kevaka e rau veisotari kei na malanivosa e tu kina. Ni sa veisotari rawa, me qai veitalanoataki se cava e okati kina me veivakalougatataki.
iKa 3 ni Macawa: Au sa talai mai ki vuravura me’u mai vakayago ka vakatovolei.
E rawa me ra nomu ivukevuke vakaiyaloyalo vinaka o ira na gone.
Au sa talai mai ki vuravura me’u mai ________ ka vakatovolei.
Kila na ivunau (raica e dua na iyaloyalo): Vola ena papa, “Au sa talai mai ki vuravura me’u mai ________ ka vakatovolei.” Sureta e dua na gone me lako mai ki liu ka droinitaka na yagona ena papanivolavola se dua na tiki ni pepa levu. Kerea vei ira na gone me ra tukuna vei iko se cava e dronitaki (e dua na yago). Vakalewena na vanua e lala tu me ra qai cavuta vata na gone na iyatuvosa.
Vakauqeta na kila ka kei na kena vakayagataki (vakaitavi ena dua na itaviqaravi kaukauwa): Cakava e dua na ivakawirimadigi ka tu kina na iyaloyalo ni vica na tiki ni yago duidui (raica na ivakaraitaki e ra). Veitalanoataka e vica na ka e rawa ni cakava na yagoda, ka sureti ira na gone me ra cakava vata kei iko (me vaka beka oqo, yavalata na veiqaqalo ni ligamu, vakabutubutu e yavamu, ka cowiri). Vakamacalataka ni dua na inaki ni noda lako mai ki vuravura me da mai vakatovolei me laurai kevaka eda na vakayagataka na yagoda me da talairawarawa kina ki na ivakavuvuli ni Tamada Vakalomalagi. Sureti ira na gone me ra veivukevuke ena kena wirici na mata ni kabasi ka tukuna na ivakarau e rawa ni vakayagataki kina na tiki ni yago e dusia tu me talairawarawa kina vei Tamada Vakalomalagi. (Kevaka e sega ni rawa ni o cakava e dua na vakawirimadigi, dusia ga na veitiki ni yagomu duidui ka kerei ira na gone me ra tukuna vei iko na ivakarau e rawa ni ra vakayagataka kina na tiki ni yagodra oqori me ra talairawarawa kina vei Tamada Vakalomalagi.) Sureti ira na gone me ra lagata “I Have Two Ears” (NVL, 269).
E tu na ivakawirimadigi ena sharingtime.lds.org
iKa 4 ni Macawa: Kevaka au na talairawarawa ki na ivakaro, au na rawa ni laki bula vata tale kei Tamada Vakalomalagi.
Kila na ivunau (lagata e dua na sere): Vola ena papa, “Kevaka au na talairawarawa ki na ______________, Au na rawa ni laki bula vata tale kei na Tamada Vakalomalagi.” Vagugutaka na “Keep the Commandments” (NVL, 146). Sureti ira na gone me ra tucake ni ra sa kila na sere ka tomana mai na vagugu. Taroga: “Na cava ena gadrevi me da cakava me da laki bula vata tale kei na Tamada Vakalomalagi?” Vola “ivakaro” ena vanua e lala tu ena papa. Sureti ira na gone me ra lagata vata kei iko na sere.
Vakauqeta na kila ka (veivosakitaka na veivakaro): Sureti iratou e le vica na gone me ratou wasea eso na lawa era a cakava na nodra itubutubu ka taqomaki tiko kina na nodra matavuvale. Taroga: “Na cava e yaco ni ko talairawarawa ki na veilawa oqori?” Vola na nodra vakasama ena papa. Vakamacalataka ni ra vakaraitaka tiko na itubutubu na loloma ena nodra vakotora na lawa. Taroga: “Na cava ena yaco ni da talairawarawa ki na ivakaro ni Tamada Vakalomalagi?” Vola ena papa eso na ka era tukuna mai na gone. Vakamacalataka me vaka na kena taqomaki ira na nodra talairawarawa ki na nodra lawa na nodra itubutubu, era na taqomaki talega ena nodra talairawarawa ki na veivakaro ni Tamada Vakalomalagi. Wasea na nomu ivakadinadina ni kevaka eda talairawarawa ki na veivakaro, sa na rawa vei keda me da lesu ka laki bula vata tale kei Koya.
Vakarautaki tu ena sharingtime.lds.org
Vakauqeta na kena vakayagataki (wili ivolanikalou): Solia yadua vei ira na gone e dua na penikau kei na tikinipepa wase tu vakava, ka volai tu ena veiwasewase e dua vei ira na ivolanikalou veitokani oqo: V&V 1:37, V&V 10:5, V&V 59:9–10, kei na V&V 119:4. Kerei ira na gone me ra wilika vata na ivolanikalou yadua, veitalanoataka na ivakaro e vakamacalataki kina, ka droinitaka na iyaloyalo ni ivakaro oqori ena nodra pepa. Ni ra sa oti, sureti ira na gone me ra mai wasea se na vukei ira vakacava na nodra talairawarawa ki na ivakaro ena vakavakarau ni nodra laki bula vata tale kei na Tamada Vakalomalagi.