June
Au na Muria na iTuvatuva ni Tamada Vakalomalagi ena Noqu Papitaiso ka Vakadeitaki
“Io mo dou lako mai vei au ka papitaiso ena yacaqu, me bokoci kina na nomudou ivalavala ca, io mo dou vakasinaiti ena Yalo Tabu” (3 Nifai 30:2).
Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”
iMatai ni Macawa: Au na muri Jisu Karisito ena noqu papitaiso ka vakadeitaki ka maroroya tiko na noqu veiyalayalati ni papitaiso.
Ni bera na Lalai, kotiva e rua na we ni yava lelevu mai na roka ni pepa duidui. Vola ena dua “papitaisotaki ka vakadeitaki” kei na kena ikarua “ka maroroya tiko na noqu veiyalayalati ni papitaiso.” Vakarautaka e vica tale na we ni yava lalai mai na roka ruarua. Vola e dua na vosa oqo ena veiweniyava yadua ni matai ni roka: yabaki 8, veivutuni, vakatarogi vua na bisopi, tabadromuci, dodonu ni matabete, veiyalayalati, isulu vulavula, Yalo Tabu. Ena veiweniyava lalai yadua ni karua ni roka, vola kina e dua na ivakatagedegede mai na “Noqu iVakatagedegede Vakosipeli.” Biuta veiyawaki na weniyava lalai kece oqo ena veivanua ena loma ni rumu.
Kila na ivunau: Vola ena papa “Au na muri Jisu Karisito ena noqu …” Biuta lesu na weniyava lelevu ena papa, yadua ena dua na gauna, ka mo ni wilika vata. Vakamacalataka ni oqori na veikalawa gadrevi ena nona ituvatuva na Tamada Vakalomalagi. Kevaka e rawa, vukei ira na gone me ra kila na cava na veiyalayalati ni papitaiso.
E tu na weniyava ena sharingtime.lds.org
Vakauqeta na kila ka kei na kena vakayagataki (qitotaka e dua na qito ni veivakasotari): Kerea e dua na gone me raica e dua vei ira na weniyava ni imatai ni roka. Kerei koya me wilika na vosa se malanivosa ena weniyava ka biuta ena papa ena ruku ni weniyava levu erau tautauvata. Taroga vei ira na gone, se veiwekani vakacava oqo kei na papitaiso kei na veivakadeitaki. Tokaruataka ena veiweniyava kece ni imatai ni roka.
Kerea e dua na gone me raica e dua na weniyava ni ikarua ni roka. Kerei koya me wilika na vosa se na malanivosa ena weniyava ka biuta toka ena papa ena ruku ni weniyava levu e tautauvata. Veivosakitaka na ivakarau ena vukei ira kina na gone me ra maroroya na nodra veiyalayalati ni papitaiso na ivakatagedegede vakosipeli e tuvai tu ena weniyava. Tokaruataka ena veiweniyava tale eso.
iKa 2 ni Macawa: Kevaka au bula kilikili, ena vukei au na Yalo Tabu meu dau digia na dodonu.
Kila na ivunau (lagata e dua na sere): Taroga vei ira na gone na iloloma cava e soli vei keda ni oti na noda papitaiso. Lagata na ikarua ni qaqana “The Holy Ghost” (CS, 105). Ni bera ni o lagata, kerei ira na gone me ra vakarogoca na isau ni veitaro oqo: Na cava e dau vukei keda kina na Yalo Tabu meda vakayacora? Vukei ira na gone me ra kila ni domo malua ka lailai sa ikoya na Yalo Tabu ka dau vukei keda o Koya me da digitaka na dodonu.
Vakauqeta na kila ka (raica e dua na lesoni vakaraitaki): Vakamacalataka ni dodonu me da vulica me da dau vakarorogo ki na veivakauqeti ni Yalo Tabu ena noda rogoca na veivakanananu e dau votu mai kei na veika eda vakila e yaloda (raica na V&V 8:2). Me biuta e dua na gone e dua na ilavo kaukamea ena dua na tavaya iloilo ka kurea . Me ra qai raica na gone se vakaevei na matata ni rorogo era na rogoca. Me ra qai sova yani na gone ki na loma ni tavaya na qele, raisi, nuku se vauvau. Ni biu oti e dua na itaki sinai, me qai kurea tale na tavaya e dua na gone, me ra qai tukuna na gone se manata vakacava na rorogo na ka oqori. Me tomani tiko na kena sova na itaki sisinai me yacova ni ra sa sega ni rogoca rawa na gone na ilavo kaukamea. Vakatautauvatataka oqo kei na dredre ni noda rogoca na Yalo Tabu ni tu ena noda bula na veika dau veivagolei tani se na ivalavala ca. Vakalala na tavaya ka vakaraitaka na matata ni rorogo tale ni ilavo kaukamea. Vakadinadinataka ni dau vukei keda me da rogoca na Yalo Tabu na noda muria na ivakaro ka veivutunitaka na noda ivalavala ca.
Ni vakasotari vata na ivunau ki na dua na iyaloyalo ena vukei ira na gone me ra nanuma na lesoni e vakatavulici tiko.
Vakauqeta na kena vakayagataki (wasea na veivakasama): Wasei ira na gone ki na veiwasewase me ra qai veisoliyaka na iwasewase yadua e dua na iyaya lailai ni o lagata se cavuta tiko na qaqa ni “The Holy Ghost.” Cegu ena veigauna eso ka me tukuna na gone e taura tu na iyaya e dua na ka e rawa ni cakava me rogoca vakamatata cake kina na Yalo Tabu. Tinia ena nomuni lagata vata “The Holy Ghost.”
iKa 3 ni Macawa: Au sa vakavoutaka na noqu veiyalayalati ni papitaiso ena gauna au vakayagataka kina na sakaramede.
Kila na ivunau (raica na veiyaloyalo): Vakaraitaka e dua na iyaloyalo ni papitaiso kei na iyaloyalo ni sakaramede ka taroga se rau sema vakacava na iyaloyalo e rua oqo. Vakananuma tiko vei ira na gone ni da dau veiyalayalati kei na Tamada Vakalomalagi ena gauna eda papitaiso kina, ka vakamacalataka ni gauna eda vakaivotavota kina ena sakaramede eda sa vakavouya tiko na noda veiyalayalati ni papitaiso.
Vakauqeta na kila ka (vakarorogo ka veivosaki): Sureti ira na gone me ra dusi ira se dusi ki lomalagi me kilai kina o koya e yalayala tiko ni o wilika na veiyatuvosa oqo mai na masu ni sakaramede (raica na V&V 20:77): “taura na yaca ni Luvemuni”; “dau nanumi koya”; “muria na vunau”; “tikoga kei ira na nona Yalo Tabu.” Veivosakitaka na ibalebale ni veimalanivosa.
Vakauqeta na kena vakayagataki (matanataka): Kerei ira na gone me ra vakasamataka e dua na mata ni tiki ni veiyalayalati yadua eda rogoca ena masu ni sakaramede, me vaka na biuta na ligadra e utodra (taura na yaca ni Luvemuni); dusia na yadredra (dau nanumi Koya); dolava na ligadra me vaka na ivola (muria na vunau); ka mokoti ira e ligadra (me tiko ga kei ira na nona Yalo Tabu). Taleva vakavica na yalayala e va kei na matana. Vakayaloqaqataki ira na gone me ra dau railesuva ena nodra vakasama na veimatana oqori ni ra rogoca na masu ni sakaramede.
iKa 4 ni Macawa: Ni’u sa veivutuni, au sa rawa ni vosoti.
Kila na ivunau (tuva vosa vakadodonu): Kerei ira na gone me ra vakamacalataka na ibalebale ni vosa na veivutuni kei na veivosoti. Solia ki na kalasi yadua e dua na waqanivola me tiko e loma na vosa eso oqo, yadua ena tiki ni pepa duatani: Ni’u, veivutuni, au, rawa, ni, vosoti. Sureta na kalasi yadua me ra tuva vakadodonu na nodra vosa. Ni ra sa oti, me ra qai tokaruataka vata na iyatuvosa na gone.
Vakauqeta na kila ka (matanataka e dua na italanoa vakaivolanikalou): Tukuna na kena italanoa na gone cidroi (raica na Luke 15:11–24) ena nomu vosa, vakayagataka na levu ga ni matana e rawa (me vaka beka oqo, vakaduria e rua na iqaqalo me baleti rau na luvena tagane, ka masia na ketemu me ivakaraitaki ni waloloi). Sureti ira na gone me ra rogoca na italanoa ka vakatotomuria galugalu na nomu matana. Vakaraitaka e dua na iyaloyalo me baleta na gone cidroi ka taroga se sala cava e vakakina na Tamada Vakalomalagi o koya na tama ena italanoa. Vakamacalataka me vaka ga na tamana, e lomani keda na Tamada Vakalomalagi ka vinakata me da lesu tale yani Vua; ena vosoti keda ko Koya ena veika cala kece eda vakayacora kevaka eda veivutuni.
Vakauqeta na kena vakayagataki (wilika e dua na ivolanikalou): Sureta e dua na gone me wilika Mosaia 26:30. Kerei ira na gone me ra vakarogoca se rawa ni vosoti vakavica e dua na tamata. Sureti ira me ra vakasamataka galugalu toka na veika me ra cakava ena gauna tale era cakava kina e dua na cala.