Okosita

E Dau Rogoca ka Sauma na Tamada Vakalomalagi na Noqu Masu

“Ia mo yalomalumalumu, raica ena tubera na ligamu na Turaga na nomu Kalou, ka vakayacora na nomu kerekere” (V&V 112:10).

Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka vakataki ira. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”

iMatai ni Macawa: E vakatavulica vei au na ivolanikalou na ivakarau ni masu.

Kila na ivunau: Taura cake na iyaloyalo ka kerei ira na gone me ra tukuna vei iko eso na ka eda vulica mai na ivolanikalou. Tukuna vei ira na gone ni dua vei ira na ka e rawa ni da vulica mai na ivolanikalou sa ikoya na ivakarau ni masu.

O ira sara ga na gone era iyaya mana ni ivakatakarakara vakaiyaloyalo. Ena itaviqaravi oqo, e tu kina vei ira na gone na madigi me ra vakaraitaka na ivakarau dodonu ni masu.

Vakauqeta na kila ka kei na kena vakayagataki (vakarogoca e dua na italanoa vakaivolanikalou): Tukuna na italanoa kei Alama kei Amuleki ni rau vakatavulici ira tiko na Soramu (raica na Alama 31; 33–34). Sureti ira na gone me ra matanataka na ivakarau dodonu ni masu. Taroga vei ira na gone se cava e vakatavuvulitaka na italanoa me baleta na masu. Tuva ena papaloaloa na nodra isau ni taro na gone. Sureti ira na gone me ra veivosakitaka se yaga vakacava vei ira na italanoa.

iKa 2 ni Macawa: E vinakati au na Tamada Vakalomalagi me’u dau masuti Koya wasoma—dua ga na gauna e rawa, dua ga na vanua e rawa.

Kila na ivunau ka Vakauqeta na kila ka (wili ivolanikalou): Tukuna vei ira na gone ni rawa ni ra masuta na Tamada Vakalomalagi ena dua ga na gauna e rawa, ena dua ga na vanua e rawa. Me ra raica na Alama 33:3–9. Ni wilika vata na tikina eso oqo me ra qai laveta na gone na ligadra ena gauna era rogoca kina e dua na vanua a dau masumasu kina o Sinosi. Vola na veivanua oqo ena papa. Vukei ira na gone me ra kila se na cava na ibalebale ni veivanua oqo vei ira nikua ena nomu caka tikinipepa ni vosa me baleta na kena ivakatautauvata ena gauna oqo (me vaka beka oqo, e dua na vanua o a lakosese voli kina ka galili me baleta na “lekutu”; lomanibai, rara ni qito, se vanua ni gade me baleta na “rara”; kei na noda kalasi kei na noda soqoni e valenilotu me baleta na “ivavakoso”). Kerei ira na gone me ra vakasotara vata na tikinipepa ni vosa kei na vosa e tautauvata ena papa.

iVakatakilakila

gone era saumi taro tiko

Vakauqeta na kena vakayagataki (veivosakitaka na masu): Wasei ira vakalalai na gone ka kerei ira me ra wasea na veika era sotava ena gauna era masu kina ena veivanua a tukuna o Sinosi.

Vakamacalataka vakamatata na ivunau era na vulica tiko na gone ena veimacawa yadua. Vakasamataka mo sureti ira me ra cavuta vata kei iko ena itekivu ni gauna ni veiwasei.

iKa 3 kei na ika 4 ni Macawa: Na isau ni masu e dau lako mai vei Tamada Vakalomalagi ena vuqa na sala.

Kila na ivunau (qitotaka e dua na qito): Ni se bera na Lalai, vola tu ena papa, “Na isau ni masu e dau lako mai vua na Tamada Vakalomalagi ena vuqa na sala,” ka ubia tu na vosa yadua ena dua tale na tiki ni pepa. Me qai cega tani e dua na gone e dua na tiki ni pepa, ka taroga vei ira na gone se cava na iyatuvosa. Tokaruataka tiko me yacova ni ra sa kila na gone na iyatuvosa, ka kerei ira me ra wilika vata.

Vakauqeta na kila ka (wili ivolanikalou): Tukuna vei ira na gone ni a masu o Josefa Simici me kila se lotu cava me lewena. Wilika vata Josefa Simici—Ai Tukutuku 1:17 mo raica kina na ivakarau a saumi kina na nona masu (ena dua na veisiko mai vei Tamada Vakalomalagi kei Jisu Karisito). Tukuna vei ira na gone ni a masuta o Alama me kila na dina na luvena, o Alama lailai. Ni wilika vata Mosaia 27:11 me kilai na sala a saumi kina na masu nei Alama (a rairai e dua na agilosi vei Alama Lailai). Vakamacalataka ni vuqa na isau ni masu e dau yaco mai ena so tale na sala. Ena veitikinipepa tale eso vola na ivolanikalou eso oqo ka vakamacalataka na sala eso e rawa ni saumi kina na masu: V&V 6:22–23 (mai na veika e vakilai ka kauta mai na yalovakacegu); V&V 8:2 (mai na vakanananu ena noda vakasama kei na veika eda vakila e yaloda); Mosaia 27:36 (mai na nodra cakacaka eso tale na tamata); kei na 2 Nifai 32:3 (mai na ivolanikalou). Biuta na tikinipepa ena dua na koniteina. Me ucuna mai e dua na gone ka wilika. Raica na idusidusi vakaivolanikalou, ni wilika vata, qai taroga vei ira na gone se cava e vakatavulica na ivolanikalou yadua me baleta na nona dau sauma na Tamada Vakalomalagi na masu.

Vakauqeta na kena vakayagataki (rogo italanoa): Sureti iratou e va na gone me ratou tukuna e dua na italanoa ka vakaraitaki kina e dua na sala e dau saumi kina na masu. Ena yaco beka mai na kena ivakaraitaki mai na veika sa dau sotavi yadua, na mekasini ni Lotu, se na ivolanikalou. Sureti ira na gone me ra tarogi ira na nodra matavuvale mai vale me baleta na veigauna eso sa saumi kina na nodra masu.

Veivuke vei iliuliu ni sere.

Me vukei ira na gone me ra vulica na “A Child’s Prayer” (CS, 12–13), vakasamataka na veika oqo:

Kerei ira na gone me ra vakatayaloyalotaka ni ra tu tani vakabalavu sara mai na nodra matavuvale ka ra sa qai lesu mai ki vale; ra dolava na katuba ka qai vakavolivoliti ira na vakacegu kei na loloma. Vakamacalataka ni masu e vaka ni da dolava e dua na katuba vei Tamada Vakalomalagi; e tu dina mai kina o Koya me vakacegui keda ka lomani keda, ka dau vinakata o Koya me rogoca ka sauma na nodra masu na gone vakayadua.
Kerei ira na gone me ra rogoca na veivosa me vaka na “e kea” kei na “masu” ena nomu lagata na imatai ni rua na laini ni “A Child’s Prayer.” Me ra tara na daligadra na gone ni ra rogoca na vosa. Sureti ira me ra lagata vata kei iko na veilaini oqori. Tomana ena veisere tale eso, me ra vakarogoca na gone na vosa e tautauvata na kedra rorogo ena veilaini yadua.
Lagata na ikarua ni qaqana me dua na malanivosa ena dua na gauna, qai kerei ira na gone me ra tokaruataka na veimalanivosa yadua ni o dusi ira. Qai wasei ira vakarua na gone ka kerea e dua na iwasewase me lagata na imatai ni tikina ni dua na malanivosa (me vaka beka oqo, “Pray”) me qai vakaotia na iKa 2 ni tikina ena malanivosa (“he is there”). Sureti ira kece na gone me ra tucake me ra lagata, “Of such is the kingdom, the kingdom of heaven.”

iVakatakilakila

lagasere o ira na gone