Sepiteba
Au na Qarava na Kalou ena Yaloqu Taucoko, noqu Kaukauwa, noqu Vakasama, kei na Noqu iGu
“Mo lomana na Turaga na nomu Kalou ena lomamu taucoko, kei na yalomu taucoko kei na nomu kaukauwa taucoko; io mo qaravi koya ena yaca i Jisu Karisito” (V&V 59:5).
Vakuria ki na veivakasama oqo eso na nomu. Ena veimacawa, mo tuvanaka na sala me (1) kilai na ivunau, (2) vukei ira na gone mera kila vakavinaka, ka (3) vukei ira mera bulataka vakataki ira. Tarogi iko, “Na cava me ra cakava na gone me ra vuli kina, kei na sala me’u vukei ira kina me ra vakila na Yalotabu?”
iMatai ni Macawa: E vakatavulici keda o Jisu Karisito ena ivakarau me da veiqaravi kina ena vukudra na tani.
Kila na ivunau (raica na iyaloyalo eso): Vakaraitaka e vica na iyaloyalo kei Jisu Karisito ni qaravi ira tiko eso tale. Me vaka beka oqo, vakayagataka na VYV iyaloyalo 41, 42, 46, 47, kei na 55. Kerei ira na gone me ra vakamacalataka na ka e yaco tiko ena iyaloyalo yadua. Dusia ni qaravi ira tiko na tani o Jisu ena iyaloyalo yadua. Vola ena papa, “e vakatavulica vei keimami o Jisu na ivakarau me keimami veiqaravi kina ena vukudra na tani.”
Vakauqeta na kila ka (wili ivolanikalou ka matanataka): Kerei ira na gone me ra veivukevuke ena kena matanataki e dua na gagadre e vakamacalataki ena Maciu 25:35–36. Me vaka beka oqo, e rawa ni vakalecalecava e dua na gone ni viakana, viagunu, ni vulagi, se tauvimate. Kerei ira eso tale na gone me ra kilakila mai na veika e gadrevi ka qai matanataka na ivakarau e rawa ni ra qarava kina e dua ena gagadre oya. Wilika vata na Maciu 25:35–40, ka kerei ira na gone me ra vakaraica se o cei e tukuna o Jisu Karisito ni da sa qarava tiko ena noda qaravi ira na tani.
Vakauqeta na kena vakayagataki: Solia vei ira na gone e yadua na tiki ni pepa ka kerei ira me ra vola na yacadra se droinitaka na kedra iyaloyalo na tamata e rawa ni ra qarava kei na veicakacaka ni veiqaravi e rawa ni ra cakava ena vukudra na tamata oqori. Kerei ira me ra wasea na nodra pepa kei na nodra matavuvale mai vale.
iKa 2 ni Macawa: Era vakaraitaka vei keda na parofita kei na iapositolo na ivakarau ni veiqaravi.
Kila na ivunau: Vakaraitaka na iyaloyalo kei Mosese, Tui o Penijamini, Josefa Simici, kei Thomas S. Monson. Tukuna vei ira na gone ni o ira na parofita oqo, me vakataki ira na veiparofita kei na iapositolo kecega, era vakaraitaka vei keda na ivakarau ni veiqaravi ena vukudra na tani.
Vakauqeta na kila ka (qitotaka e dua na qito ni kilakila mada): Vakarautaka na veivuke eso me baleti Mosese, Tui o Penijamini, Josefa Simici, kei Thomas S. Monson. Me vakaoqo, eso na veivuke me baleti Peresitedi Monson “Au dau sikovi ira vakavuqa na yada ena noqu tabanalevu,” “Ni’u se gonetagane voli au a solia vua e dua tale na gonetagane e dua na noqu iyaya ni vakatatalo taleitaki,” ka’u “Dau veisiko vakavuqa vei ira na tamata era tu e valenibula.” O na vinakata beka mo vakayagataka na idusidusi eso oqo mo vakarautaka kina na veivuke. Mosese: Na Lako Yani 2:16–17; 1 Nifai 17:24–29. Tui o Penijamini: Mosaia 2:12–19. Josefa Simici: Josefa Simici—Ai Tukutuku 1:62, 67; V&V 135:3. Thomas S. Monson: Ensign, Sepi. 1994, 12–17; Tise. 1995, 2–4; Nove. 2006, 56–59.
Digia e va na gone me ratou matataki ira na parofita oqo, ka sureta e dua vei ira me wilika na veivuke o sa vakarautaka tu. Kerei ira na gone tale eso me ra laveta na ligadra kevaka era kila o cei na parofita o ya. Me ra qai vaqara na iyaloyalo ni parofita oya. Mo vakayacora vakakina vei iratou na vo ni veiparofita.
Na isulu rawarawa ni drama me vaka na icurucuru balavu kei na isala ena dau taleitaki cake kina na drama. Na drama e dau vukei ira na gone me ra kila vakavinaka cake na ivakavuvuli ni kosipeli kei na itukutuku eso mai na ivolanikalou.
Vakauqeta na kena vakayagataki (vakarorogo ki na koniferedi): Sureti ira na gone me ra sarava se vakarorogo ki na koniferedi raraba ena vula mai qo. Vakauqeti ira me ra rogoca na veitalanoa me baleta na ivakarau ni veiqaravi vei ira na tani. Solia vei ira na madigi me ra wasea na veika era vulica.
iKa 3 kei na iKa 4 ni Macawa: Ni’u qaravi ira na tani, au sa qarava tiko na Kalou.
Kila na ivunau (cavuqaqataka e dua na ivolanikalou): Me ra rawa ni cavuqaqataka na gone na iotioti ni tikina ni Mosaia 2:17 ena nomu vola ena papaloaloa, “Ni ko ni sa qaravi koya tiko na nomuni Kalou, ena nomuni qaravi ira tiko na wekamuni.” Sureti ira na gone me ra tokaruataka na malanivosa vakarua se vakatolu. Kerea e dua na gone me bokoca e dua se rua na vosa, me ra qai tokaruataka tale na malanivosa. Tomana tiko me yacova ni sa sega tale ni dua na vosa e vo tu ena papaloaloa.
Vakauqeta na kila ka (rogoca na kisi dikevi): Ena vakavakarau, vulica ena masumasu na vosa nei Peresitedi Dieter F. Uchtdorf ena koniferedi ni Epereli 2010, “Sai Kemudou na Ligaqu” (raica na Ensign se na Liaona, Me 2010, 68–70, 75). Taroga vei ira na gone se da sa qarava tiko vakacava na Kalou ena noda qaravi ira na tani era tu wavoliti keda (eda sa cakava tiko na veika ena cakava o Koya kevaka e tiko eke). Wasea e dua na italanoa se dua na ka o sotava me baleta na veiqaravi, ka vakamacalataka na sala e vakalougatataki rau ruarua kina o koya e solia kei koya e ciqoma. (E rawa ni o kunea na italanoa me baleta na veiqaravi ena Friend se Liaona.) Vakarautaka eso na kisi dikevi ka vakaraitaka na ivakarau e rawa ni ra veiqaravi kina vei ira na tani o ira na gone. Me vaka oqo: “A tacaqe o Annie ka lutu ena nona lesu tiko ki vale mai na vuli, ka kabuwacara e dela ni qele na nona ivola kei na pepa. A vukei koya cake o Tevita ka tomika cake na nona ivola.” “A oca vakalevu ena nona tubera tiko na nona iyayavoli ki nona vale na itokani nei Mere ka lako vata ni tagitagi tiko na luvena. A vukei koya o Mere ena kena kau na nona iyayavoli.” Kerei ira na gone me ra matanataka na kisi dikevi ka tukuna se o cei a qaravi (oi rau ruarua erau a qaravi kei na Kalou).
Vakauqeta na kila ka kei na kena vakayagataki (qitotaka e dua na qito ni veivakasotari): Raica se droinitaka na kedra iyaloyalo na tamata e rawa ni ra veiqaravi ena vukudra, o ira na gone, me vaka e dua na itubutubu, e dua na tacidra, dua na tubudra, dua na itokani, se dua era tiko veivolekati. Cakava e dua tale na ilavelave ni iyaloyalo oqo ka qitotaka e dua na qito ni veivakasotari. Ni vakasotara vata e rua na iyaloyalo e dua na gone, sureti koya me tukuna e dua na sala e rawa ni qarava kina na tamata ena iyaloyalo. Vola ena papanivolavola na nodra nanuma na gone. Me baleta eso na vakasama ena ivakarau ni veiqaravi, raica na Lalai 4, 166.
Qito: Na qito e vakabulabulataka na lesoni ka rawa vei ira na gone mera veimaliwai vinaka ka vaqaqacotaka na ivakavuvuli ni kosipeli ni vakavulici me marautaki.