Okotova

Na Masu Sai Koya na Neirau Veitaratara ena Vakarokoroko kei na Kalou

“Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.

Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”

iMatai ni macawa: E Rawa Niu Masu vei Tamada Vakalomalagi

Vakatakila na ivunau: Kerea e dua na itubutubu kei na dua na gone me tucake e matadra na gone. Sureta na gone me taroga vua na nona itubutubu e dua na taro, ka me sauma na itubutubu. Qai kerea na itubutubu me biuta na rumu ka sogota na katuba. Taroga vei ira na gone na sala cava e rawa ni ra veitaratara kina kei na nodra itubutubu ni ra sega ni tiko vata (me vaka beka oqo, volavola se veivosaki ena talevoni). Vakamacalataka ni Tamada na Kalou ka da Luvena o keda; baleta ni da sega ni tiko ena Nona iserau, sa solia vei keda o Koya e dua na sala me da vosa kina Vua. Taroga vei ira na gone kevaka era kila na sala eda dau vosa kina Vua na Kalou. Me ra cavuta muri iko na gone, “Au rawa ni masu vei Tamada Vakalomalagi.”

Veivakauqeti me kilai: Lagata na “I Pray in Faith” (NVL, 14). Cakava e dua na ilavelave ni ivolacegai ena tabana e 19 ni ivolavakarau ni isususu, Dou Raici Ira na Nomudou Lalai, me baleti ira yadua na gone. Sureti ira na gone me ra rokataka na nodra iyaloyalo. (O ira na gone qase cake e rawa ni ra vola ena taqana eso na ka era vakavinavinakataka kei na so na ka e rawa ni ra kerea vei Tamada Vakalomalagi. E rawa ni o qai kerei ira me ra wasea na nodra vakasama ena Lalai taucoko.) Me ra qai lagata tale na gone na sere ni ra cega tiko na nodra ivola.

Na kena tuvalaki na itaviqaravi ka ra vakaitavi kina na gone ena veisala duidui eso ena vakavinakataka cake na kena kilai kei na kena bulataki. Me vaka beka oqo, ena itaviqaravi oqo, o ira na gone era na raica, lagata, rokataka, vola, rogoca, ka wasea.

iKarua ni macawa: E vakavulica vei au na ivolanikalou na ivakarau kei na gauna meu masu kina.

Vakatakila na ivunau: Vukei ira na gone me ra cavuqaqataka na iyatuvosa eso oqo mai na Alama 13:28: “Dou vakamalumalumutaki kemudou vua na Turaga, ka masuta na yacana tabu, dou vakatawa ka masu tikoga me kakua ni rawai kemudou na vere.” Veitalanoataka na veika e vakavuvulitaka na ivolanikalou me baleta na ivakarau kei na gauna me da masu kina.

Veivakauqeti me kilai: Vukei ira na gone me ra kila ni rawa ni da dau masu vuni vei Tamada Vakalomalagi e yaloda ena dua ga na gauna e rawa, ena dua ga na vanua e rawa ka dodonu me da vakavinavinaka Vua ena noda veivakalougatataki ka kerei Koya me veivuke. Vola na idusidusi vakaivolanikalou eso oqo ena papa: 3 Nifai 18:19; 3 Nifai 19:6–8; 3 Nifai 18:15. Vola talega na vosa na kena ivakarau kei na gauna ena papa. Sureti ira na gone me ra raica na ivolanikalou ka veivosakitaka na veika e vakavuvulitaka vei keda me baleta na ivakarau kei na gauna e dodonu me da masu kina. Tukuna me baleta na nodrau vakavulici ira na Soramu o Alama kei Amuleki ena ivakarau ni masu (raica na Alama 31; 34:17–27; raica talega na Lalai 4, lesoni 21). O na gadreva beka me ratou dramataka toka e vica na gone na italanoa ni o talanoataka tiko.

Veivakauqeti me bulataki: Sureta e vica na gone me ra wasea na ivakarau ni lomadra ena gauna era masu kina. Kerei ira na gone me ra vakatura eso na sere ni Lalai ka vakavuvulitaki kina na masu. Lagata e vica vei ira na sere oqori, ka sureti ira na gone me ra vakatura eso na matana rawarawa me sosomitaka e dua se rua na vosa ena sere yadua. Me vaka beka oqo, me ra kakua ni lagata na vosa “me da masu” se “na masu” e rawa ni ra roqota na ligadra.

iKatolu kei na ikava ni macawa: Sa dau rogoca ka sauma na noda masu na Tamada Vakalomalagi.

Vakatakila na ivunau: Me ra raica na gone na 3 Nifai 14:7 kei na Jemesa 1:5. Sureti ira me ra vakasaqara na veika e vakavuvulitaka na ivolanikalou me baleta na masu. Ni wilika vata i cake na ivolanikalou, ka me ra wasea na gone na veika era sa vulica. Sureti ira na gone me ra kaya vata kei iko “Sa dau rogoca ka sauma na masu na Tamada Vakalomalagi.”

Veivakauqeti me kilai ka bulataki: Wasewasei ira vakailala na gone, ka me ra veivukevuke ena nodra sikova na veivanua oqo (raica na NVMLNB, 179). Ena veisiteseni yadua, me vakamacalataka e dua na qasenivuli e dua na sala e dau sauma kina na Tamada Vakalomalagi na noda masu ka laiva me wasea na ivakarau sa saumi mai kina na nodra masu. O na vinakata beka mo tuvalaka me rua na siteseni ena dua na macawa kei na vo ni rua ena macawa ka tarava.

iMatai ni siteseni: Ena so na gauna e dau saumi mai na masu ena vakasama se na vakanananu ka rawa ni votu mai ki na noda vakasama kei na yaloda (raica na V&V 8:2). Wasea e dua na ka o sa sotava ka a yaco ena nomu bula, se tukuna na italanoa kei Inosi (raica na Inosi 1:4–5, 10; raica talega na Dou Raici Ira na Nomudou Lalai, 17).
iKarua ni siteseni: E rawa ni vakayagataki ira na tani na Tamada Vakalomalagi me sauma kina na masu. Wasea e dua na gauna a saumi kina na nomu masu mai vua tale e dua, se talanoataka na italanoa kei Peresitedi Thomas S. Monson ena nona sauma na nodrau masu o Ben kei Emily Fullmer (raica na Conference Report, Okot. 2003, 63; se Ensign, Nove. 2003, 58–59).
iKatolu ni siteseni: Na isau ni masu e rawa ni yaco mai ena vosa i Karisito, ka na kunei ena ivolanikalou (raica na 2 Nifai 32:3). Wasea na ka o sa sotava ena kena saumi mai na nomu masu ena nomu wilika na ivolanikalou.
iKava ni siteseni: Na isau ni masu e rawa ni yaco mai ena nodra ivakavuvuli na parofita ni gauna oqo (raica na V&V 1:38). Vakaraitaka vei ira na gone e dua na Ensign se na Friend, ka tukna vei ira ni rawa ni ra raica na nodra ivakavuvuli na parofita ena mekasini ni Lotu. Wasea na kena sa saumi mai e dua na nomu masu ena nomu vakarorogo ena koniferedi raraba se na nomu wilika na nodra vosa na parofita ni gauna oqo.