Noveba

Na Vakarokoroko Sai Koya na Lomana kei na Doka na Kalou

“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega” (Maciu 22:37).

Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”

iMatai ni macawa: Na vakarokoroko sai koya na lomana kei na doka na Kalou.

Vakatakila na ivunau: Vakaraitaka na kena iyaloyalo e dua na gone ni masu tiko, ka vakamacalataka ni vakaraitaka tiko na gone na nona lomana kei na nona doka na Kalou. Tukuna vei ira na gone ni o vakasamataka tiko e dua na vosa tinikarua na kena matanivola ka kena ibalebale na lomana kei na doka na Kalou. Vola e tinikarua na itoqa lala ena papa, me yadua na veimatanivola kece ni vosa vakarokoroko, ka sureti ira na gone me ra kilakila mai na matanivola. Ni ra sa tukuna mai na matanivola dodonu, vola ena kena itoqa dodonu. O na vinakata beka me vukei iko e dua na gone qase cake. Me baleti ira na gone sobu, vakaraitaka na iyaloyalo ka taroga vei ira se ra kila vakacava ni vakarokoroko tiko na gone oya. Me ra qai tukuna vata na gone, “Na vakarokoroko sai koya na lomana kei na doka na Kalou.”

Veivakauqeti me kilai: Kerei ira na gone me ra dolava na nodra ivolanikalou ka wilika na Joni 14:15. (Kevaka era a vulica ena yabaki sa oti na gone na tikina oqo, o na gadreva beka mo kerei ira me ra cavuqaqataka.) Taroga vei ira na gone na ivakarau eda vakaraitaka kina na noda lomani Jisu Karisito. Lagata “Reverence Is Love” (NVL, 31). Kerei ira na gone me ra biuta na ligadra e utodra ena veigauna era rogoca kina na vosa “vakarokorokotaka” se “vakarokoroko.”

A Primary teacher with her hand over her heart.

Railesu: Ni vakasotari e dua na ivunau ki na dua na itaviqaravi se iyaloyalo ena vukei ira na gone me ra nanuma tiko (raica na NVMLNB, 182–83). Na ikarua ni itaviqaravi ena imatai ni macawa ena vukei ira na gone me ra nanuma tiko ni vakarokoroko e semati ki na lomana na Kalou ena nodra sureti me ra biuta na ligadra ki utodra. Vakasamataka mo railesuva na ivunau oqo ena vica na vula ena nomu biuta na ligamu ki utomu ni o veivakauqeti ki na vakarokoroko.

Veivakauqeti me bulataki: Wasewasei ira na gone ki na veilala lalai, me ra veivosakitaka na sala eso e rawa ni ra vakaraitaka kina na vakarokoroko me baleta na Tamada Vakalomalagi kei Jisu Karisito ena dua vei ira na gauna oqo: ena gauna era lotu tiko kina, ni ra masu, kei na gauna era tiko kina e vale se tiko vata kei ira na nodra itokani. E rawa ni ra droinitaka na gone sobu na veika e rawa ni ra cakava. Me ra wasea na nodra vakasama eso na gone ki na ilala taucoko. Vakauqeti ira me ra wasea na nodra vakasama vata kei ira na nodra matavuvale mai vale.

iKarua ni macawa: Na vakarokoroko ena gauna ni sakaramede ena vukei au meu dau nanumi Jisu Karisito.

Veivakauqeti me kilai ka bulataki: Sureta na bisopi se peresitedi ni tabana kei na vica na Matabete i Eroni me ra vakavulica vei ira na gone me baleta na sakaramede. Kevaka e rawa, e rawa ni o kerei ira me ra kauti ira na gone ki valenilotu ka vakavulica vei ira na veika e vakatakarakarataki ena sakaramede ka vakaraitaka vei ira na teveli ni sakaramede, na vanua era tekiduru kina me ra masulaka, kei na isulu e dau ubi kina na sakaramede. Sureta e dua na Matabete i Eoni me vakamacalataka na veika e dau vakayacora me rawa ni veisoliyaka kina na sakaramede e veimacawa vei ira na ivavakoso kei na vuna e dua kina na galala tabu oqo. Taroga vei ira na gone na cava era dau cakava na matabete ka vakaraitaka na nodra doka na Kalou ena gauna era vakalougatataka kina na sakaramede (tekiduru ka masu, ubia na sakaramede ena isulu vulavula, vakaisulu ka ivalavala vakarokoroko). Sureti ira na gone me ra wasea na veika e rawa ni ra cakava me ra vakaraitaka kina na nodra dokai Jisu Karisito ena gauna e qaravi tiko kina na sakaramede.

A Primary class gathered as a group at the sacrament table learning about the sacrament.

Ni ra sureti mai na vulagi ki na Lalai, vakananuma vei ira me rawarawa toka ga na nodra itukutuku me rawa ni ra kila na gone. Na vulagi sureti kece e dodonu me na vakadonui mai vei iratou na matabisopi.

iKatolu ni macawa: E rawa niu vakaraitaka na noqu vakarokorokotaka na veivanua kei na veika tabu.

Vakatakila na ivunau: Vola ena papa, “E rawa niu vakaraitaka na noqu vakarokorokotaka na veivanua kei na veika tabu” ka kerea e dua na gone me wilika ki na Lalai taucoko. Kerei ira na gone me ra bobo ka laveta na ligadra kevaka e rawa ni ra rogoca ni o vakalutuma e dua na sede se ibulukau. Tukuna vei ira ni vanua tabu na valenilotu ka dua na ivakarau me da vakaraitaka kina na noda vakarokorokotaka na noda dabe toka vakadua ka vakarorogo vinaka. Sureti ira na gone me ra wasea mai e vuqa tale na ka e rawa ni ra cakava e valenilotu me vakaraitaki kina na vakarokoroko.

Veivakauqeti me kilai: Vakaraitaka e dua na iyaloyalo kei Mosese kei na veikau kama, ka tukuna na italanoa ena Na Lako Yani 3:1–10. Wilika i cake na tikina e 5 ka me ra vakarogoca na gone na vuna e kaya kina na Turaga vei Mosese me luvata tani na nona ivava. Vakamacalataka ni sega ni gadrevi me da kauta tani na noda ivava me da vakarokoroko kina, ia e vuqa tu na ka e rawa ni da cakava me da vakaraitaka kina na noda vakarokorokotaka na veivanua kei na veika tabu.

Veivakauqeti me bulataki: Vakaraitaka eso vei ira na iyaloyalo oqo: e dua na valetabu se dua na valenilotu, dua na vale, matavuvale, dua e masu tiko, dua na gone, na ivolanikalou, dua na ilala gone, dua na kalasi ena Lalai, kei na sakaramede. Laveta cake e dua na isulu me tabonaka na iyaloyalo kece ka kauta tani e dua na iyaloyalo. Kauta tani tale na isulu me ra qai tukuna vei iko na gone na iyaloyalo cava sa yali tiko. Vakaraitaka na iyaloyalo e yali tiko ka sureti ira na gone me ra wasea e dua na sala e rawa ni ra vakaraitaka kina na vakarokoroko me baleta na vanua se ka e tu ena iyaloyalo. Tokaruataka ena iyaloyalo tale eso.

A teacher and children standing in front of a group of children. They are lowering a blanket to reveal pictures on the bulletin board.

Na cava me ra cakava na gone me ra vuli kina? Na nomu taroga oqo ena vukei ira na gone me ra vuli ni ra vakaitavitaki. Me vakaoqo, na ikatolu ni itaviqaravi ena ika 3 ni macawa e rawa kina vei ira kece na gone me ra vakaitavi ena veivosaki, raica na iyaloyalo, ka wasei na vakasama.

iKava ni macawa: Na noqu vakarokorokotaka na Kalou e vukei au meu dokai ira ka lomani ira na tani.

Veivakauqeti me kilai: Lagata na sere eso oqo. Ni sa oti na sere yadua, veivosakitaka na kena taro e sala vata kaya.

• “Na Vakarokoroko na Loloma” (NVL, 31). Tokaruataka na laini e kaya, “Niu vakarokoroko, ena vakaraitaki ena noqu vosa kei na noqu ivalavala.” Taroga: Na cava eso na vosa se malanivosa e vakaraitaka na veidokai vei Tamada Vakalomalagi kei ira na tani? Na cava eso na ka eda rawa ni cakava me vakaraitaka na noda dokai ira na tani?

• “Kindness Begins with Me” (NVL, 145). Taroga: Na cava eso na sala e rawa ni da vakaraitaka kina na noda yalo vinaka vei ira na noda itokani?

• “I’ll Walk with You” (NVL, 140–41). Taroga: O cei soti na tamata era gadreva na noda dau yaloyalo vinaka? E rawa vakacava ni da vakaraitaka na noda loloma vei ira?

Two Primary leaders looking at a copy of the Gospel Art Book.

Vakavulica ena nomu ivakaraitaki na ivakarau me da vakaraitaka kina na noda loloma ena vukudra na tani (raica na NVMLNB, 18–19). Veiqaravi ena vukudra na qasenivuli ena Lalai ena nomu veivakayaloqaqataki ka veitokoni. Qai vukei ira na gone me ra raica na sala e rawa ni ra veilomani ka veivakauqeti kina vakataki ira.