Tiseba
Na iVolanikalou e Vakavulica Vei Au na Nona Sucu na iVakabula kei na iKarua ni Lako Mai
“Ni na lako mai na Luve ni tamata ena iukuuku nei Tamana kei ira vata kaya na nona agilose, ena qai sauma ko koya vei ira na tamata yadua me vaka na nodra ivalavala” (Maciu 16:27).
Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”
iMatai ni macawa: Era parofisaitaka na parofita na sucu nei Jisu Karisito.
Veivakauqeti me kilai: Wasei ira vakalima na gone. Solia ki na veilala yadua e dua vei ira na ivolanikalou oqo kei na so na iyaya ni vakatasuasua se dua na isulu ni vakatasuasua rawarawa me vakatakilakilataka na parofita ko ya: Aisea 7:14; 9:6 (Aisea); 1 Nifai 11:14–21 (Nifai); Mosaia 3:5, 8 (Tui ko Penijamini); Alama 7:9–10 (Alama); Ilamani 14:2–6 (Samuela). Sureta na ilala yadua me ra wilika ka veitalanoataka na ka e tukuna na parofita me baleta na sucu i Karisito. Me dua na gone mai na ilala yadua me vakayagataka na iyaya se isulu ni vakatasuasua me matataka kina na parofita ka tukuna vei ira na vo ni gone o cei na parofita e matataka tiko ka wilika se tukuna na ka e tukuna na parofita me baleta na sucu i Jisu. Lagata “He Sent His Son” (NVL, 34–35) se “Samuel Tells of the Baby Jesus” (NVL, 36).
iKarua ni macawa: A sucu ko Jisu Karisito.
Veivakauqeti me kilai: Lagata vata na imatai ni qaqana ni “The Nativity Song” (NVL, 52–53). Wasei ira vaka va na gone, ka lesia vei ira na ilala yadua na vo ni qaqana (2–5). Kerei ira na gone me ra droinitaka na iyaloyalo me lako vata kei na nodra qaqana. Lagata taucoko na sere, me ra qai laveta cake na nodra iyaloyalo na gone ni yaco mai na nodra itavi ena sere.
iKatolu ni macawa: Ena lesu tale mai o Jisu Karisito ki vuravura ena dua na siga.
Vakatakila na ivunau: Vola na veimalanivosa oqo ena tikinipepa ni vosa: Ni na lako, mai na Luve ni tamata, ena lagilagi, nei Tamana. (Era sa tu na tikinipepa ni vosa ena sharingtime.lds.org.) Dui biubiuta tu na veitikinipepa ni vosa ena papa, ka sureti ira na gone me ra vukei iko mo biuta vata. (O na vinakata beka mo cakava eso na tikinipepa ni vosa ka me ra qai cakacaka vata vakailala na gone.) Ni ra sa biuta vata na gone na veimalanivosa ena kena ituvatuva dodonu, me ra dikeva na nodra isau ni taro ena nodra wilika na Maciu 16:27.
Veivakauqeti me kilai: Kerei iratou e lewe va na gone me ratou lako mai ki liu ka taura cake tu na iyaloyalo kei Samuela na Lemanaiti, na sucu i Jisu, veivakavulici tiko o Jisu, kei na iKarua ni Lako Mai. Veivosakitaka na iyaloyalo yadua vata kei ira na gone. Kerei ira na gone era taura tu na iyaloyalo me ra dui tutu. Sureti ira ena Lalai me ra tukuna vei ira na gone na vanua me ra toso kina me rawa ni dodonu kina na ituvatuva vagauna ni iyaloyalo.
Ni vakayagataki na iyaloyalo se itaba ena vukei ira na gone me ra semata e dua na ivakavuvuli se ivunau ki na dua na ka e vakatayaloyalotaki tu ena nodra vakasama, ka na vakalevutaka cake na nodra rawata me ra kila ka nanuma tu na veika era sa vulica.
Sa tu na droini ena sharingtime.lds.org
Veivakauqeti me bulataki: Droinitaka sobu e dua na laini ena lomadonu ni papa. Vola e cake ena papa na “Ena lesu tale mai o Jisu Karisito ki vuravura ena dua na siga.” Ena dua na veimama ni papa vola kina na taro eso oqo. Ena ikarua ni veimama vola kina na idusidusi vakaivolanikalou ka me duitutu.
-
Na cava eso na ka vakasakiti ena yaco ena gauna ni sa lesu tale mai na Karisito? (Josefa Simici—Maciu 1:33, 36–37)
-
Ena lako tale mai ni naica na iVakabula? (Josefa Simici—Maciu 1:38–40)
-
Na cava na vuna me da vakavakarau kina me baleta na iKarua ni Lako Mai? V&V 38:30
-
Ena vakacava na balavu ni gauna ena mai tiko kina e vuravura na iVakabula? (V&V 29:11).
Kerei ira na gone me ra cakacaka vata kei ira na nodra qasenivuli me ra vakasotara vata na taro kei na kena isau. Ni veitalanoataka vata na kena isau. (raica na Tudei ena Vakabauta [2004], 141–42). Taroga vei ira na gone na sala cava e rawa ni ra vakavakarau kina ki na iKarua ni Lako Mai.
iKava ni macawa: Meu vakavakarau ki na iKarua ni Lako Mai, au na muri Jisu Karisito.
Veivakauqeti me kilai: Tukuna vei ira na gone ni dau veivakavulici vakavuqa ko Jisu ena italanoa vakaibalebale, ka dau vakayagataka na veiyaya kei na veigauna kilai levu me vakavuvulitaka kina na dina vakayalo. Talanoataka vakalekaleka na italanoa ni lewe tini na goneyalewa (raica na Maciu 25:1–13; raica talega “The Parable of the Ten Virgins,” Ensign, Maji 2009, 48–49). Vakamacalataka ni italanoa vakaibalebale oqo e vakatautauvatataki kina na iKarua ni Lako mai nei Jisu Karisito ki na dua na vakamau. Sureti ira eso na gone me ra dramataka na italanoa. Tarogi ira na gone era matataki iratou na goneyalewa vuku se vakaevei na nodra nanuma ni ra kila ni ra sa vakarau tu, ka veitalanoataka na kena bibi ni vakavakarau me baleta na Nona lako tale mai na iVakabula.
Veivakauqeti me bulataki: Dronitaka e dua na cina ena papa. Veitalanotaka ni tautauvata kei na noda sova tiko na waiwai ki na noda cina na noda muri Jisu Karisito ena noda cakava na veika vinaka e veisiga yadua. Me ra cavuta na gone eso na sala e rawa ni ra muri Jisu Karisito kina, me vaka na veiqaravi ena vukudra na tani, saumi ikatini, kei na masu. Vakamacalataka ni oqo na veika me ra dui cakava ga vakataki ira; ena sega ni rawa ni mai cakava ena vukudra na veika oqo e dua tale. Solia vei ira yadua na gone e dua na tiki ni pepa ka koti me vaka na ibulibuli ni dua na turu ni waiwai levu. Kerei ira (se nodra qasenivuli) me ra vola ena nodra pepa “Meu vakavakarau ki na iKarua ni Lako Mai, au na muri Jisu Karisito ena noqu ” ena nodra pepa. Kerei ira na gone me ra vakalewena na lomanibai e lala tiko se droinitaka e dua na iyaloyalo ni dua na ka e rawa ni ra cakava me ra vakavakarau kina ki na iKarua ni Lako Mai. Vakauqeti ira na gone me ra kauta ki vale na nodra pepa ka wasea na veika era sa vulica kei ira na nodra matavuvale.
Na cina kei na tuturu sa tu ena sharingtime.lds.org
Meu vakavakarau ki na iKarua ni Lako Mai, au na muri Jisu Karisito ena noqu