Janueri

Na iVolanikalou Era Vosa ni Kalou

Sere: “Kevaka Au Vakarorogo e Yaloqu”

(tabana e 28 ena ituvatuva oqo)

“Dou tugana ki lomamudou na vosa i Karisito; raica na vosa i Karisito sa tukuna vei kemudou na veika kece mo dou kitaka” (2 Nifai 32:3).

Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”

iMatai ni macawa: Na ivolanikalou era vosa ni Kalou.

Vakatakila na ivunau: Kauta mai na ivola duidui eso (me vaka na ivola ni vakasaqa, dua na ivola ni talanoa, kei na dua na ivola ni vuli) ki na Lalai, ka sureti iratou e vica na gone me ratou vakaraitaka na ivola eso oqo kei na ivolanikalou ki na Lalai. Sureti ira na gone me ra veitalanoataka na veika era tautauvata kei na veika era duidui kina, oka kina o koya e vola. Dusimaka ni ra duatani na ivolanikalou baleta ni ra vola o ira na parofita ni Kalou ka ra sa vosa ni Kalou.

Veivakauqeti me kilai: Tukuna vei ira na gone ni va na ivola ni ivolanikalou eda dau vakayagataka ena Lotu: na iVolatabu, na iVola i Momani, na Vunau kei na Veiyalayalati, kei na Mataniciva Talei. Vakamacalataka ni da vakatoka oqo me ra “ivolayavu ni cakacaka.” Vakavulica vei ira na gone me baleta na ivola yadua. Okata kina e vica na italanoa se ivakavuvuli e kune ena ivola yadua. Qitotaka e dua na qito ni veidutaitaki (raica na NVMLNB, 169) vata kei na yaca ni ivolayavu ni cakacaka kei na iyaloyalo ka matataka e dua na italanoa se ivakavuvuli ena ivola yadua.

Veivakauqeti me bulataki: Sureta e vica vei ira na gone me ra wasea na nodra ivolanikalou taleitaki se italanoa mai na ivolanikalou. Wasea na nomu ivakadinadina ni ivolanikalou.

2016 Outline for Sharing Time/Children's Sacrament Meeting Program

Na Bolebole Vakayabaki: Ena loma taucoko ni yabaki, solia vei ira na gone na madigi me ra wasea na veika era sa vulica ena nodra vulica na ivolanikalou. Oqo ena soli kina vei ira na gone e dua na gauna vinaka me ra wasea na veika era sa sotava ka vukea me ra dau veivakauqeti vei ira na tani me ra dau wilika na nodra ivolanikalou mai vale.

iKarua ni macawa: Me da kanamagiti mai na vosa i Karisito.

Veivakauqeti me kilai ka bulataki: Vakamacalataka ni dau vakayagataka na Turaga na vosa cakacakataki me vakamacalataka na sala me da vulica kina na ivolanikalou. Vakaraitaka na veivosa oqo kei na malanivosa ena ivolakabi ena loma ni rumu: kanamagiti (raica na 2 Nifai 32:3); vakaiyau (raica na V&V 84:85); vakasaqaqara vagumatua (raica na Mosaia 1:7); tautauri matua (raica na 1 Nifai 15:24). Tuvalaka eso na ivakarau ni vuli ko nanuma ni rawa ni vakatakila ka vakamacalataka vei ira na gone na vakasama eso oqo. Me vakaoqo, e rawa ni o sureti ira na gone me ra vakaraitaka na duidui ni katia toka ga vakalalai kei na noda kanamagiti ka qai veitalanoataka na sala e sema kina oqo ki na noda vulica na ivolanikalou. E rawa talega ni o kerea vei ira na gone na vuna me ra na “tautauri matua” toka kina ki na ligadra na nodra itubutubu ena dua na vanua osooso ni veivoli ka qai vakamacalataka na sala e rawa kina vei ira me ra tautauri matua toka kina ena ivolanikalou kei na vuna e tautauvata kina na kena bibi kei na nodra taura matua toka na ligadra na nodra itubutubu.

Veivakauqeti me bulataki: Bolei ira na gone kei ira na qasenivuli me ra tauyavutaka e dua na itovo ni vuli ivolanikalou e veisiga. Vakamacalataka ni ena veimacawa, o ira na gone era sa wiliwili se ra vakarorogo ki na ivolanikalou era na rawa ni vola na yacadra ena dua na tikinipepa ka semata yani ena dua na sinucodo pepa. Tukuna vei ira ni sa toso tiko na sinucodo oqo, ena vakakina na nodra kila na ivolanikalou. Vakasamataka mo maroroya na sinucodo oqori ena dua na kato ni “iyau” (na kato oqo ena rawa talega ni vakayagataki me vakavuvulitaki kina na ibalebale ni “vakaiyau” ena itaviqaravi e cake). Vakauqeti ira na gonelalai me ra wasea na nodra takete ni vuli ivolanikalou vata kei ira ena nodra matavuvale.

2016 Outline for Sharing Time/Children's Sacrament Meeting Program

Na sinucodo oqo e rawa ni yaco me ivakananumi ni tubu ena yaco mai ena noda wili ivolanikalou.

Nacani

Ana

Jone

Adriu

Me baleti ira kece sara na gone: Vakasamataka na sala eso mo vukei ira kina na gone taucoko sara ena nomu Lalai me ra qaqa ena nodra wilika na nodra ivolanikalou ena loma ni yabaki taucoko. Me vaka beka oqo, o ira na gone era sega ni dau tokoni mai vale e rawa ni soli vei ira na madigi me ra wiliwili ena gauna ni lotu ka ra qai tomana na yacadra ki na sinucodo pepa.

iKatolu ni macawa: Na vosa i Karisito ena tukuna vei keda na veika kece e dodonu me da cakava.

Veivakauqeti me kilai: Vesuka na matana e dua na gone. Me dua tale na gone me taura toka e dua na iyaloyalo kei Jisu Karisito ena dua na vanua ena loma ni rumu ni Lalai. Na gone e vesu tu na matana me qai tovolea me raica na vanua e tiko kina na iyaloyalo me kakua ni dua e vukei koya kina. Tokaruataka na itaviqaravi, ia oqo kerei rau e rua na gone me rau taura tu e dua na kau balavu, dali, se dua na wa ka vakatakarakataka na itautauri kaukamea me dodo mai vua na gone e vesu tu na matana ki na iyaloyalo kei Karisito. Me qai vakamuria na gone na dali ki na iyaloyalo. Taroga: “na sala cava e vaka kina na tautauri toka ena dali na wili ivolanikalou?” (Raica 1 Nifai 8:10–12). Vakavulica vei ira na gone na italetale ni “Na iToko Kaukamea” (Sere ni Lotu, naba 167). Wasea e vica na ivakaraitaki mai na nomu bula ena gauna e vakavulica kina vei iko na ivolanikalou na veika mo vakayacora. Vakamacalataka na sala e kauti iko vakavoleka mai kina vua na iVakabula na nomu muria na ivakavuvuli ni ivolanikalou.

A blindfolded boy following a string towards a girl holding a picture of Jesus.

Na lesoni vakaraitaki ena vukei ira na gone me ra kila na vakasama eso ena kena gaunisala rawarawa ka matalia (raica na NVMLNB, 164).

iKava ni macawa: Au rawa ni kila ni dina na ivolanikalou.

Veivakauqeti me kilai: Kauta mai e dua se me vica tale na ka e rawa ni ra vulica na gone ena nodra vakayagataka na nodra wakilakila e lima. Me vakaoqo e rawa ni o kauta mai e dua na vuanikau se senikau, se e rawa ni o vakatagitaka eso na ivakatagi. Solia vei iratou e vica na gone me ratou raica, boica, tara, tovolea, se rogoca na ka o sa kauta mai. (Vakasamataka mo ni cakava vakailawalawa lalai na itaviqaravi oqo me rawa kina vei ira kece na gone me ra vakaitavi.) Vakaraitaka ni rawa talega ni da raica, tara, boica, ka rogoca na ivolanikalou, ia e da na rawata e dua na kena ivakadinadina bula mai na veituberi ni Yalotabu. Sureti ira na gone me ra lagata na “Search, Ponder, and Pray” (NVL, 109). Kerei ira me ra vakarorogo, ni ra lagasere tiko, ki na tolu na ka e rawa ni da cakava me da sureta kina na Yalotabu me vakadinadinataka vei keda ni ra dina na ivolanikalou. Sureti ira na gone me ra bulia eso na matana na veivosa me vaka na vakasaqara, vakananuma, ka masu. Tokaruataka na sere, vakayagataka na matana me isosomi ni vosa eso oqo.

A young girl looking at a bouquet of flowers held by her teacher in a classroom setting.

iLawalawa lalai: Na nodra vakaitavi na gone ena veilawalawa lalai ena soli kina vei ira na iwiliwili levu cake ni gone me ra vakaitavi (raica NVMLNB, 161). O ira na gone era sa dabe tiko ena ilawalawa vakalasi. Era na vakayagataki na ilawalawa oqo ki na itaviqaravi vakailawalawa. Me ra raica na qasenivuli ni vakayacori na vakaitavi kei na vakanomodi.

Veivakauqeti me bulataki: Vakaraitaka e dua na iyaloyalo kei Moronai, ka wilika Moronai 10:4–5. Sureti iratou e vica na gone me ratou wasea na nodratou nanuma me baleta na ivolanikalou. E rawa talega ni ra wasea na veika era sa cakava tiko me ra wilika kina na ivolanikalou mai vale. (Kerea rawa e vica na gone me levu kina na gauna ni vakavakarau.) Vakauqeti ira na gone me ra wasea na nodra ivakadinadina me baleta na ivolanikalou vata kei ira na nodra itubutubu mai vale.