iDusidusi ni Gauna ni Veiwasei kei na Nodra Vakaitavi na Gone ena Soqoni ni Sakaramede

Kemuni na Mataveiliutaki ni Lalai kei na iLiuliu ni Sere,

Na ivolanikalou era vosa ni Kalou. Ni o wilika na ivolanikalou ena yalomasumasu ka bulataka na ivakavuvuli eso era vakavuvulitaki kina kei na kena ena idusidusi oqo, o sa vakarautaki tiko kina vakayalo mo vakavulica na kosipeli i Jisu Karisito vei ira na gone ena nomu Lalai. Ena rawa talega vakakina vei iko mo vakayagataka na ivolanikalou mo vukei ira kina na gone me ra kila na ivakavuvuli ni kosipeli o na vakavuvulitaka ena yabaki oqo, me vaka na nona ituvatuva na Tamada Vakalomalagi, na itavi nei Jisu Karisito, na nodra itavi na parofita, na Vakalesui mai ni Lotu, kei na veivakalougatataki ni valetabu. Na ivolanikalou ena vukei iko mo sureta na Yalo ki na nomu Lalai ka tara cake e dua na draki e rawa ni ra vakila kina na gone na veivakauqeti ni Yalo Tabu. Na veivakauqeti oqori ena rawa kina vua e dua na gone ena Lalai me kaya, “Au kila ni dina na ivolanikalou.”

Sa vakavinavinakataki na nomuni veiqaravi tiko ena yalodina. Keimami masulaki kemuni ka nuidei ena nomuni rawata mo ni lomani ira na gonelalai ka vakavulica vei ira na kosipeli i Jisu Karisito.

Na Mataveiliutaki Raraba ni Lalai

iDusidusi ni Gauna ni Veiwasei

iDusidusi Vakosipeli

Vakayagataka na ivolalailai oqo ni ko vakarau vakavulica e dua na lesoni 15 na miniti ena veimacawa ena gauna ni veiwasei. Sa rawa mo semata ki na lesoni ni macawa vata kei na so tale na ivola veituberi ni Lotu, me vakataka na iTokani se na Liaona. Na idusidusi e tarava ena vukei iko mo tuvanaka ka vakavulica na lesoni.

Lomani Ira o Vakavulica. Vakaraitaka ni ko lomani ira na gone ena nomu kila na yacadra ka kila na veika era dau taleitaka, na nodra dui taledi, kei na veika era gadreva.

Vakavulica na iVakavuvuli ena Yalotabu. Ni ko vakarautaka na lesoni, masu mo dusimaki ka saga mo vaqaqacotaka na nomu ivakadinadina ni ivakavuvuli ko na vakavulica. Oqo ena vukea mo veivakavulici ena veituberi ni Yalotabu.

Sureta na Vuli. Na ivolalailai oqo e vakarautaki me vukei iko mo sega ni kila walega na cava mo vakavulica ia na iwalewale talega ni veivakavulici ka na vakauqeta na vuli vagumatua. Ena laulau sara na nomu vakavulica na ivunau ni ko vakayacora e tolu na ka oqo ena veilesoni yadua:

1. Vakatakila na ivunau. Vakamacalataka vakamatata na ivunau era na vulica tiko na gone.Vakasamataka na sala mo vakayacora kina oqo ena vosa kei na iyaloyalo. (Raica eso na kena ivakaraitaki, era tiko ena lesoni ni imatai ni macawa ni vula o Maji kei na imatai ni macawa ni Julai.)

2. Veivakauqeti me kilai. Raica me titobu na nodra kila na gone na ivunau ena iwalewale eso ni veivakavulici me ra na vuli kina, me vakataka na lagalagasere, drama, kei na wili ivolanikalou.

3. Veivakauqeti me bulataki. Vakarautaka na gauna me ra na dau bulataka kina na gone na ivunau ena nodra bula. Vakasamataka na sala eso e rawa ni ra vakamacalataka kina na veika era vakila me baleta se biuta e dua na takete me vaka na ivunau.

Na ivolalailai oqo e vakarautaki tu kina na taucoko ni lesoni me baleta eso na macawa ena loma ni yabaki. Era oka talega ki na veimacawa e tarava na veivakasama, ka sega ni lesoni taucoko. Kuria na veivakasama oqori ena nomu o vakarautaka. Sa rawa me soli vakasama vei iko ena nomu wilika na lesoni tale eso ena ivolalailai oqo. Ni yaco mai na ikalima ni Sigatabu, vakayagataka na gauna oqo mo raicalesu kina na veilesoni taumada. Ena dusimaki iko na Yalotabu ni ko tuvanaka ka vakarautaka na itaviqaravi ni lesoni.

Cakacaka vata kei iliuliu ni sere ni ko vakarautaka na nomu lesoni. Ni lagati na sere ena vukea na kena vaqaqacotaki na ivunau o vakavulica tiko. Sa rawa talega mo sureti ira na qasenivuli kei na nodra kalasi me ra vukei iko ena so na idusidusi vakosipeli.

Eso na lesoni e vakaturi tiko kina me ra sureti mai na vulagi dokai me ra mai vakaitavi ena Lalai. Me na vakadonuya taumada o nomu bisopi se peresitedi ni tabana ni bera ni ra sureti mai me ra mai vakaitavi.

E semati tiko ena lesoni eso na iwalewale ni veivakavulici ena vukei iko mo kenadau ena veivakavulici. Na lesoni ena oka tiko kina na iyaloyalo eso ka na vukei iko mo raica na ituvaki yadua ni itaviqaravi. E dina ga ni ka bibi na kena vakatorocaketaki na kila ni veivakavulici, na nomu vakavakarau vakayalo kei na nomu ivakadinadina ga ena sureta mai na Yalotabu me mai vakadeitaka na ivunau oqori ki na yalodra na gone.

iVolanikalou: Ni ra sureti na gone me ra vulica na ivolanikalou ena vukei ira me ra tekivu taleitaka ena nodra bula taucoko na vosa ni Kalou. Tuvalaka na sala eso ena veimacawa me ra sureti na gone me ra vakayagataka ka vuli mai na ivolanikalou. Eso na gone ena sega na nodra ivolanikalou. Eso era se bera ni kila na wilivola. Na itaviqaravi ni vuli ena idusidusi oqo kei na ivakasala ni veivakavulici ena tabana e 8, 13, kei na 24 ena solia vei iko na vakatutu eso ena ivakarau ni veivakavulici ni vakayagataki na ivolanikalou.

iYaloyalo: E vuqa na iyaloyalo ena ivolalailai oqo era tu ena initaneti ena sharingtime.lds.org. Mo vakaraica talega e dua na ituvatuva ni ivurevure eso me baleta na iulutaga vakosipeli mai na iTokani ena friend.lds.org. Na ivurevure eso oqo e rawa ni tabaki ka vakayagataki ena nodra vakavulici na gonelalai.

Gauna ni Lagasere

Na lagasere ena Lalai e dodonu me vakavurea e dua na draki ni vakarokoroko, vakavulica na kosipeli, ka vukei ira na gonelalai me ra vakila tiko na veivakauqeti ni Yalo Tabu kei na marau e kauta mai na lagasere. Sa dodonu me na vagolei vakatabakidua e 20 na miniti ni gauna ni veiwasei ki na lagasere kei na vakavulici ni ivakatagi. Oqo ena vakadeitaka ni veirauti na gauna mo vakavulica kina na sere vovou ka vukei ira na gone me ra taleitaka na lagasere.

Na ivolalailai oqo e oka tiko kina e dua na nodra sere vou na gone me ra vulica ena yabaki oqo (raica na tabana 28). E oka talega kina e dua na iwase e vakatokai “Na iVakarau ni Kena Vakayagataki na iVakatagi ena Lalai” (raica na tabana e 26–27 ) kei na ikuri ni vakasama ni kena vakavulici na sere vei ira na gone (raica na tabana e 7).

Vakavakarau: Masuta na veidusimaki ka vakasaqara na veivakauqeti ni Yalotabu ni ko vakavakarau tiko ki na gauna ni veiwasei. Ni ko vakavakarau ka veivakavulici ena Yalotabu, ena vakadeitaka o Koya na dina ni veika o vakavulica. (Raica na NVMLNB, 13.)

iDusidusi me Baleta na iTavi ena Soqoni ni Sakaramede

Ena nona veidusimaki na bisopi se peresitedi ni tabana, me na dau vakayacori ena ikava ni vulatolu ni dua na yabaki na nodra vakaitavi na gone ena soqoni ni sakaramede. Ena itekivu ni yabaki mo veivosaki kei na dua na lewe ni matabisopi se mataveiliutaki ni tabana e nona ilesilesi na Lalai me tuvanaki kina na veika me vakayacori. Ni sa tuvanaki taucoko na veika me caka mo qai kerea na nona veivakadonui.

Tuva me ra na vakaitavi na gone ena parokaramu e vakayavutaki ena ulutaga vakavula ni gauna ni veiwasei. Mo dau vola toka ena loma ni yabaki taucoko, na nodra vosa kei na veika era sa cakava kei na veika era sa vakila na gone me rawa ni vakayagataki ena nodra vakaitavi. Ni ko tuvanaka na veika me ra wasea na gone ena veika era sa vulica me baleta na itoko ni yabaki oqo, vakasamataka na sala eso me ra vukei kina na ivavakoso me ra vakanamata ki na ivakavuvuli vakosipeli era vakavulica tiko. E rawa ni tinia na soqoni ena dua na vosa lekaleka e dua vei iratou na matabisopi.

Ni ko sa vakarautaka na itavi, mo nanuma tiko na idusidusi oqo:

• Na vakatovotovo me kakua ni vakasabusabutaki tu kina na gauna ni kalasi se matavuvale.

• E sega ni vakatarai na veika vakaiyaloyalo, isulu ni drama, kei na vakaraitaki tukutuku ena gauna ni sakaramede.

Primary children and teachers sitting together as a group in the chapel.

Na sere e vakayagataki ena nodra vakaitavi oqo na gone e rawa ni ra lagata na ilawalawa levu se lalai, domodua se domorua, dua na matavuvale, se lagati vata kei na iyaya ni vakatagi vakawa. Raica me ra kila vinaka na qaqana na gone ka rawa ni ra lagata mai yalodra.

Na iVurevure Eso e Vakayagataki ena iVolalailai Oqo

Oqo na ivakaleka era vakayagataki tiko ena ivolalailai oqo:

NVLNodra iVolanisere na Lalai

NVMLNBNa Veituberi, Me iLutua ni Noda Bula

E vuqa na lesoni e oka kina na vakatutu eso ni kena vakayagataki na iyaloyalo. Ko na raica na iyaloyalo ena Kato ni Yaloyalo Vakosipeli, na pakete ni iyaloyalo ni ivolavakarau ni Lalai, kei na mekasini ni Lotu ka vakakina ena initaneti ena images.lds.org.

A page layout of Lehi with the lLahona and the title "Liahona".

A thumbnail of the front cover of the January 2010 Friend.

Thumbnail for Catalogs.

iVurevure: E rawa ni o kunea na ikuri eso ni ivurevure ni veivakavulici me vaka na rokataki ni draunipepa, italanoa, kei na itaviqaravi ena iTokani, Liaona, ivolavakarau ni isususu, kei na iVola ni iYaloyalo Vakosipeli. Vakayagataka na ivurevure oqo me ikuri ni lesoni.

Lewenivuli ni 2010

Lewenivuli Raraba

iSususu: Dou Raici Ira na Nomudou Lalai; Matanisiga: Lalai 1; DND 4–7: Lalai 2; iSausau Vou 8–11: Lalai 4

Lewenivuli Taumada

Matanisiga: Lalai 1; DND 4–7: Lalai 2; iSausau Vou 8–11: Lalai 4