Maji

Dau Vosa Vei Keda na Tamada Vakalomalagi mai vei Ira na Nona Parofita

Sere: “Stand for the Right”

(NVL, 159)

“Koi au na Turaga, raica na ka ga au sa tukuna au sa tukuna, … ena vakayacori vakaidina na vosa kau sa tukuna se ra tukuna na noqu tamata” (V&V 1:38).

Kuria ki na veivakasama oqo na nomu o sa vakarautaka. Tuvanaka na sala me kilai kina na vunau baleti ira na gone ka vukei ira me ra kila vakavinaka kina ka bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira me ra vakila na Yalotabu?”

iMatai ni macawa: O ira na Parofita era dau vosa ena vukuna na Tamada Vakalomalagi.

Vakatakila na ivunau: Sureta e dua na gone me lako mai ki liu. Tukuna vei ira na vo ni gone me ra muria na nona ivakaro. Vakasolokakanataka vua na gone na ivakaro rawarawa eso me vaka na, “Tukuna vei ira me ra biuta e uludra na ligadra” se “Tukuna vei ira me ra vakabula vakamalua vei koya e dabe tikivi ira tiko.” Tokaruataka ena vica tale na ivakaro rawarawa, me tini tiko ena “Tukuna vei ira me ra roqota na ligadra.” Taroga vei ira na gone se ra kila vakacava na ka o vinakata me ra cakava. Vakamacalataka ni dua na sala e dau tukutuku kina vei keda na tamata e vuravura na Tamada Vakalomalagi kei Jisu Karisito sai koya ni Rau dau vosa vei ira na Nodrau italai ka rau qai vakaroti ira na italai oqori me ra vosa vei ira na tamata. Taroga, “O cei o ira na italai era dau vosa ena vukuna na Tamada Vakalomalagi kei Jisu?” Me ra tukuna vata na gone, “O ira na parofita era dau vosa ena vukuna na Tamada Vakalomalagi.”

iVakatakilakila

A Primary leader whispering to a girl during sharing time. The girl is standing with her arms stretched out in front of her.

Veivakauqeti me kilai: Ni se bera na Lalai, vakabira ena boto ni so na idabedabe na kena iyaloyalo e dua na parofita kei na so na tiki ni ivolanikalou ka vakamacalataka na veika eso e a cakava se tukuna. E rawa ni okati me kena ivakaraitaki o Noa (Ai Vakatekivu 6:13–14; 7:5, 7–10); Mosese (Na Lako Yani 14:8–9, 13–14, 21–22); Samuela na Lemanaiti (Ilamani 14:1–8; 16:1–3); kei Josefa Simici (V&V 89). Sureti ira na gone me ra rai ena boto ni nodra idabedabe me ra raica na iyaloyalo. Wasei ira vakailala na gone, me dua na iyaloyalo dua na ilala, me ra vakarautaka ka vakaraitaka na kena matanataki na veika e baleta na nodra parofita. Sureti ira na vo ni ilala me ra kilakila se na parofita cava eratou matanataka tiko. Veitalanoataka na ivakarau era a ciqoma kina na tamata na nona itukutuku na parofita kei na veika e qai yaco.

Veivakauqeti me kilai: Cakava e dua na kedra “Qiqi na Parofita” me vaka na kena e vakaraitaki tu. Wasea vakawalu na iwirini, me dua e toka kina na yacana e dua na parofita mai na sere “Follow the Prophet” (NVL, 110–11). Sureta e dua na gone me mai wirica na qiqi. Wasea e dua na italanoa lekaleka me baleta na parofita ka vakaraitaki tiko ena qiqi (vakayagataka na idusidusi vakaivolanikalou ena NVL, 111, me baleta na vakasama eso). Qai lagata na qaqana me baleta na parofita oya ena “Follow the Prophet.” Sureta e dua tale na gone me wirica na qiqi, ka tokaruataka tiko na itaviqaravi kevaka e tiko na kena gauna.

iKatolu ni macawa: Eda liutaki tiko nikua mai vua e dua na parofita bula.

Veivakauqeti me kilai: Kotiva vakava e dua na tikinipepa ka biuta e dela ni kena iyaloyalo na parofita e bula tiko nikua. Ena daku ni tikinipepa yadua vola kina na nona ivakavuvuli na parofita. (Goleva na Ensign e tiko kina na itukutuku ni koniferedi se na Liaona mo ni vulica kina na veika e tukuna na parofita ena dua na gauna walega oqo.) Sureta e dua na gone me kauta laivi e dua na tikinipepa ka matanataka na ivakavuvuli. Me ra qai vakilakila na vo ni gone se cava e vakayacora tiko na gone o ya. Tokaruataka ena vo ni ivakavuvuli. Vakaraitaka e dua na ilavelave ni Friend se na Liaona ka vakamacalataka ni da sa rawa ni wilika na nona vosa na parofita nikua.

iVakatakilakila

A portrait of Thomas S. Monson mostly covered by four pieces of paper.

Veivakauqeti me bulataki: Me tucake e dua na gone ka vakacavara na itukutuku oqo: “Au na muria na parofita bula ena noqu …” Sureta e dua tale na gone me tokaruataka na nona itukutuku na imatai ni gone, vakuria ena dua tale na sala me muri kina na parofita. Tomani tiko kevaka e tiko na kena gauna, ka ra vakayaloqaqataki na gone me ra tokaruataka na kena levu ga ni nodra vakasama eso tale na gone e rawa.

iKava ni macawa: Eda taqomaki ni da muria na parofita.

Veivakauqeti me kilai: Vakarautaka na ivakatakilakila ni gaunisala rawarawa vakaoqo “Tu Vakadua,” “Vakamalua,” kei na “Toso.” Digia e tolu na gone me ratou taura tu na ivakatakilakila, ka tukuna vei iratou me ratou laveta cake na ivakatakilakila ena gauna e tavia kina na tabadratou na iliuliu ni ivakatagi. Tukuna vei ira na gone ni ivakatakilakila ni Toso e kena ibalebale me ra tekivu lagasere; na ivakatakilakila ni Tu Vakadua e kena ibalebale me mudu na lagasere; kei na ivakatakilakila ni Vakamalua me ra lagasere vakamalua. Me liutaki ira na gone ena lagasere na iliuliu ni ivakatagi “Stand for the Right” (NVL, 159).

Vakamacalataka ni ivakatakilakila ni gaunisala e taqomaki keda ka vakasalataki keda ena veika rerevaki mai liu. Qai vakamacalataka ni nona veidusimaki na parofita sa vaka na ivakatakilakila ni gaunisala oqo baleta ni na taqomaki keda ka vakalougatataki keda na Tamada Vakalomalagi ni da vakamuria. Wasei ira vakatolu na gone. Ena ilala yadua, me dua na kena iliuliu se dua na gone qase cake me tukuna e dua na italanoa lekaleka me baleta e dua na gauna a taqomaki kina o koya (se dua mai na ivolanikalou). Me ra qai toki na ilawalawa vua e dua tale na iliuliu me ra rogoca e dua tale na italanoa. Sureti ira me ra lagata na italetale ni “Follow the Prophet” ni ra lako tiko mai vua e dua na iliuliu ki na dua tale. Vakadinadinataka na veivakalougatataki ena yaco mai ni da muria na parofita.

Veivakauqeti me bulataki: Me ra droinitaka na gone na nodra ivakatakilakila ni gaunisala ka vola kina na ivakarau era na muria kina na nodra ivakavuvuli na parofita bula. Me ra kauta i vale na ivakatakilakila me vukea me ra nanuma tiko me ra dau muria na parofita.

E rawa cake vei ira na gone me ra bulataka na ivunau kevaka era vakasamataka ga na kena ivakavakayagataki. Era dau vakila talega na gone na loloma kei na veivakadonui ni ra cavuta tale mai na nodra vakasama na qasenivuli kei ira na vo ni gone.

Veivuke vei iLiuliu ni Sere

Me vukei ira na gone me ra vulica me ra (Tutaka na Dina)“Stand for the Right” (NVL, 159), vakasamataka na veika oqo:

Vakaraitaka e dua na kena iyaloyalo na parofita nikua ka veitalanoataka vakalekaleka eso na idusidusi sa solia vei keda ko koya. Tukuna vei ira na gone ni sere era na vulica tiko e vakamacalataka na bibi ni noda vakamuria na parofita.
Wasei ira vakailala na gone. Solia ki na ilala yadua e dua se rua na laini qaqa ni sere oqo, ka sureti ira me ra bulia e dua na matana ka na vukea me ra nanuma tiko na qaqana. Me ra qai vakavulica na ilala yadua na nodra matana vei ira na vo ni gone.