ITULAU I LE LOTOIFALE
O se Faamautinoaga Filemu
Ina ua tusa ma le 10 o’u tausaga, sa auauna lo’u tina o se faiaoga o le autalavou i le Siteki a Oakland Kalefonia i le Uarota a Oakland 8. I le afiafi o se tasi aso, sa matou i ai i le matou falesa mo gaoioiga a le uarota. Sa vave ona uma le gaoioiga a le matou Peraimeri, o lea sa matou tafafao ai lava ma o’u tausoga ma uo i le fale taalo a o o’u faatalitali mo tinā, lea sa fesoasoani e faia le Po o le Autalavou.
Sa matou taaalo pa’i ma i ve’a, ae o le toatele ia o matou o tamaiti, sa matuā tumu ai le fale taalo. O nisi o tamaiti matutua atu sa mananao e taaalo i fafo auā sa telē le avanoa i fafo, ma sa pogisa atu foi fafo nai lo totonu o le fale taalo (i le taimi lea ua te’a le 7:00 pm).
Ou te le i mautinoa pe ou te mulimuli ia i latou. Sa ou fesili i ai pe mafai ona matou taaalo pea i totonu, ae na o na fai mai lava o a’u uo, “O le a lelei lava [tatou] i fafo. E toatele tatou. O le a lelei lava.” Ae, ou te le i manao lava e faalavelavea a’u, o lea sa ou faanoi ai i lo’u tina mo se faatagaga ou te taalo ai i fafo.
“Leai,” o le tali lea a mama. E ui lava sa lē lelei lo’u faalogona i lo’u mulimuli i a’u uo, sa ou lē fiafia lava i le lē faatagaina o a’u i fafo. Sa matuā matou fiafia faatasi. “Aisea e lē mafai ai ona ou alu?” na ou fesili ai. Pau lava le mafuaaga a Mama ona e lē manao ou te taalo i le pogisa i le mea e lē mafai ona ia iloa mai ai a’u.
Ina ua ou ta’u atu ma le faalotolotolua i a’u uo e o latou ou te lē alu, sa ou lagonaina le sa’o. E pei sa faamautu mai e le Agaga le lapataiga a lo’u tina . . . ae o lena tamai taimi sa mulimuli vave mai ai lava se tasi o vaivaiga. Sa faigata ona ou matamata i a’u uo o gasolo atu i fafo o le faitotoa o le fale taalo ae ou te lē o alu ai, o lea sa ou oso ai i luga ma matou tamomoe faatasi ma latou, ma le naunautaiga ou te lē usitai i lo’u tina.
Ou te taunuu loa i le faitotoa i fafo o le falesa, ae ou lagonaina e pei o se lima sa taofia a’u. Sa ou tu ma liliu i tua, ae e leai se isi o ona uuina lo’u lima. I lo’u faateia, sa ou tuua ai a’u uo e o ese ma le falesa e aunoa ma a’u, ona ou toe foi lea ma ou saofai i fafo mai o le potu aoga sa i ai lo’u tina.
I le 10 pe 15 minute sa ou faatali ai i le uma mai o le Po o le Autalavou, sa ou toe iloiloina i lo’u mafaufau le mea na faatoa tupu. Sa ou lē fiafia pea ona sa ou lē i fafo e taaalo ma a’u uo, ae sa ou mafaufau pea i lagona lē mautonu sa ou mauaina talu mai le taimi muamua na fautuaina ai i matou matou te o ese ma le falesa, e uiga i le faatonuga a lo’u tina ina ia ou nofo i totonu, ma, ioe, e uiga i le ‘lima’ na taofia a’u.
Sa ou manatuaina le lagona puupuu o le filemu sa ou lagonaina ina ua faatoa ou filifili lava ou te usitai i lo’u tina, ma na ou iloa ai a o o’u faatali ia te ia, sa mafai ona ou toe lagonaina le Agaga, o loo faailoa mai ia te a’u o lea sa ou—toe faia foi—le filifiliga sao.
E oo mai i le aso lenei, ou te lē iloa pe aisea na tāua ai lo’u nofo i totonu o le falesa i lena po, ae e lē afaina lea. Pau le mea ou te faafetai mo le Agaga Paia o lē e taiala ma faamafanafana i tatou, e tusa lava pe tatou te lē malamalama . . . ma ou te faafetai ona e ala i lo’u usiusitai, na faatagaina ai i ma’ua e le Agaga e maua se tietiega manaia i le fale ina ua maea gaoioiga a le uarota, e aunoa ma se lauga mai o lo’u tina.