Tamā, Faamolemole Fesoasoani Mai ia Te Au

Saunia e Thelma Endicott, Iuta, ISA

I le taimi na matou matamata ai i le tagata na faatinoa Iesu Keriso o afio ifo mai le lagi, sa ou iloa o le Faaola o le tali lea i o‘u tofotofoga.

Ata

tamaitai o loo tagi

Ia Iulai 2021, sa ou maua ai le faamanuiaga o le galue o se tagata faaopoopo i vitio fou o le Tusi a Mamona, na pueina i atumauga i sasae o Springville, Iuta, ISA. Sa matou pueina vaaiga na tutupu ina ua mavae le “faafanoga tele” (tagai i le 3 Nifae 8:11–12) i le Lalolagi Fou, lea na faaalia i le Faasatauroga o le Faaola i le Lalolagi Tuai.

I le taimi o le pueina o ata, sa taoto ai lo’u tuagane o Byron i se moega i le falemai i Kalefonia, ISA, a o taoto le tama teine a lo’u afafine faatoa fanau i se moega i le falemai i le Aai o Sate Leki, Iuta. Na tigaina Byron i le kanesa, ma o le tama teine a lo’u afafine, na fanau mai ma se faaletonu matuia, sa lei faamoemoeina e ola ai.

Ina ua ma taunuu atu ma lo’u toalua i le ma faletalimalo ina ua mavae le aso lona lua o le pueina o ata, sa valaau mai lo’u uso ia te a’u, ma le popole ia Byron.

“Ou te le iloa le mea o tupu,” o lana tala lea. “E le o taliina e Byron lana telefoni po o ana feau tusitusia.”

Mai o’u tei e toalima, o a’u sa sili ona latalata ia Byron. O ia o le tamaitiiti lona lua, ae o au o le uii. Sa masani ona ia tausia au a o ou laitiiti. Sa matou ola ae i ni siosiomaga faatauvaa i Kuatemala. Sa leai se matou televise, ae sa i ai le tasi ma le isi. Sa matou matitiva, ae sa matou fiafia.

Sa ou misia Byron ina ua ia siitia atu i le Iunaite Setete, ma le faamoemoe e fesoasoani i lo matou aiga i mea tautupe. Sa ia maua se galuega o se avepasi mo se kamupani mo tagata tafafao. I ni tausaga mulimuli ane, sa ou siitia atu i le Iunaite Setete, faaipoipo, ma auai i Le Ekalesia a Iesu Keriso o le Au Paia o Aso e Gata Ai. Ina ua uma lo’u papatisoga, sa auai foi o’u matua i le Ekalesia. Ina ua ma faamautu ma lo’u toalua i Iuta i saute, sa ou vaaia Byron i soo se taimi lava na te aumaia ai ni tagata tafafao i nofoaga autu mo tagata asiasi i le Malumalu o St. George Iuta ma le Malumalu o Sate Leki.

“O Se Mea e Sili Ona Faapitoa”

Ina ua ou talanoa atu ia Byron e uiga i le Ekalesia, sa ia fai mai ia te a’u, “O le Au Paia o Aso e Gata Ai o loo i ai se mea e sili ona faapitoa. Pe a ou talanoa i tagata i nofoaga autu mo tagata asiasi mai, sa mafai ona ou iloa o i latou o ni tagata lelei, ma faauo.” Sa malie o ia e feiloai ma faifeautalai faamisiona, ae sa faigaluega o ia i taimi uma ma e toetoe lava a lē alu i le fale.

Na faalua ona faamanuiaina Byron mai togafitiga mo le kanesa o le faa’i. Peitai, i le 2020, na toe foi mai ai le kanesa. Ia Iuni 2021, sa tau le lava lona malosi e malaga ai i Kuatemala mo se faatasiga faaleaiga mo le masina le umi. Na maliu lo matou tamā i le amataga o lena tausaga, ma na maliu lo matou tina i le 2015, i le fa tausaga talu ona faamauina i laua i le Malumalu o le Aai o Kuatemala i Kuatemala. O le vaai atu i nai ona tei mo le taimi mulimuli o le moomooga mulimuli lea a Byron.

Na faataotolia o ia i le falemai i le lua vaiaso talu ona toe foi ane i Kalefonia. O lea ua taoto o ia i se koma.

Sa ou le alu i le faatasiga faaleaiga ona sa manaomia e la’u tama teine o Angie la’u fesoasoani ma le lagolago. I le aso 3 o Iuni, sa fanau mai ai lana tama muamua, o Athena, ma le lelava o lana manava. Sa faatino togafitiga a foma’i tipitipi ia te ia i le tolu aso mulimuli ane. Latou te lei faamoemoe e ola o ia.

O le mea e lelei ai, sa ma latalata i ai ma lou toalua i lenei taimi faigata. O aoauli taitasi pe a uma la’u galuega vitio o le Tusi a Mamona, e tuua ai e Angie le vaaia o ia i le falemai ae faatasi ma i ma’ua i le ma faletalimalo, lea sa ma faamafanafanaina ai o ia ma tatalo ai mo Athena.

“O loo lelei mea uma”

Ina ua ou taunuu i le nofoaga o le vitio i le aso ina ua uma ona telefoni mai lo’u uso, sa ou vaivai ma faanoanoa. “Tama, faamolemole fesoasoani mai ia te au,” sa ou tatalo ai. “E tele naua mea faigata o loo tutupu i lo’u olaga.”

A o lei potopoto tagata na faatinoina ma tagata faaopoopo e pue le vaaiga lea na afio ifo ai le Faaola toetu mai le lagi (tagai 3 Nifae 11:8), sa ta’u mai ia i matou e mafaufau e uiga ia te Ia ma Lona uiga ia i matou. A o ou taumafai e taulai atu i le Faaola i le taimi o le faatinoga, sa liliu atu o’u mafaufauga i lo’u aiga. I lo’u mafaufau sa ou vaai ai i lo’u tama, lo’u tina, ma Byron. I lena lava taimi, sa ou faalogoina ai le leo o Byron.

“O loo lelei mea uma,” o lana tala lea. “O loo manuia a’u”

Ata

o tagata o loo faatinoina sa Nifae o loo tilotilo atu i le Faaola

Sa ou lagonaina le faamoemoe ma le mafanafana, e pei sa ou i ai moni lava i le laueleele o Nuumau ina ua afio mai Iesu e aoao ma faamalolo tagata, ma faaali atu ia i latou Lona tino. Sa ou iloa o Ia o le tali i o’u tofotofoga, sa i ai o Ia ma le Tama iina mo a’u, ma e tutupu mea mo se mafuaaga.

I lena po, sa ou iloa ai ua valaauina e le Atua ia Byron. Ou te faafetai mo le faatuatua ua ou maua o le a ou toe vaai ia te ia ma o’u matua. Ou te faafetai foi ona sa faafofogaina e le Atua a matou tatalo mo Athena. Ina ua uma ona ia faaaluina aso e 88 e malolo ai i le iunite e tausi ai pepe fou, na iu lava ina matou aumaia o ia i le fale.

O le toatele o i matou sa auai i vitio fou o le Tusi a Mamona na lagonaina le Agaga ma se faamalosiauina o a matou molimau. A o ou mafaufau i lena aafiaga ma vaai atu i le lumanai, ou te fesili ifo ia te au lava, “Pe o ou faia ea mea uma ou te mafaia e saunia ai mo le Afio Mai Faalua o le Faaola ma ia agavaa mo Lona afioaga?”

O le auai i vitio o se faamanuiaga sili lea i lo’u olaga. Ou te iloa o le a faamanuiaina foi isi a o latou faitauina le Tusi a Mamona ma matamata i vitio o le Tusi a Mamona.