“O Le Matagofie o le Faasolosolo Matua,” Liahona, Sete. 2022.
Matutua ma le Faatuatua
O Le Matagofie o le Faasolosolo Matua
E sili atu ia te au le i ai o se foliga e faaalia ai laina o taliēega ma loimata.
Ou te manatua lo’u tilotilo atu i alafau maanuminumi o lo’u tinamatua ao ou laititi. E i ai laina i tulimanu o ona mata, ma laina ninii matagofie i lona laugutu pito i luga. Sa ou fesili ia te ia pe faapefea ona ou aloese mai le mauaina o ni manumi.
“Aua le ataata,” o lana tala lea. “Ma aua le tagi.”
Sa ou mulimuli i lana fautuaga—mo le aso e tasi. Ona togi lea o lo’u solo. E mafai faapefea e se tasi ona ola e aunoa ma le ataata po o le tagi? Sa ou filifili e sili atu ia te au le i ai o ni foliga e faaalia ai laina o taliēega ma loimata.
I le Tusi a Mamona, na aoao atu ai e Liae lona atalii o Iakopo ua tatou i ai iinei i le olaga faitino ina ia maua le olioli (tagai i le 2 Nifae 2:25). Ae sa ia aoao foi ina ia iloa le olioli, e tatau ona tatou oo i le faanoanoa (tagai i le 2 Nifae 2:22–23). Ua ou vaai i le faamaoniga o le olioli ma le faanoanoa, e pei ona vaneina i foliga o i latou o e na ola i le olaga. O o latou foliga o loo tauaveina tala o o latou olaga.
Ou te ioe i le tagata na fai mai, “O tagata matutua aulelei o galuega o faatufugaga.”1 O nisi tagata e atiina ae se uiga i le matua e ofoofogia ai i latou. Mo se faataitaiga, sa ou pulatoa atu i fofoga o faatina lauulu-sinasina, ma ofu papae o le malumalu ma sa ou maofa i le malamalama ofoofogia lea e susulu i o latou fofoga ma susulu i o latou foliga ataata.
O lenei la ua avea au ma se tamaitai matua, ua ou aoaoina o loo i ai se olioli mautinoa e oo mai ma le faasolosolo matua. Mo se faataitaiga, ua sili atu lo‘u toafimalie i lo’u lava tino. Ou te faafetai lava o loo aogā pea! Atonu ua telegese laʻu savali ma lemu la’u tautala nai lo o le taimi muamua. Atonu ua fai sina lapopoa o ou ogavae, ma ou lima ua sili atu ona vaivai. Ae ou te fiafia e mafaufau faapea o la‘u pa’i atu ua sili atu foi le mālū.
Ou te iloa e mafai lava ona ou alualu pea i luma ma aoaoina, e faapea “soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu” (Mataupu Faavae ma Feagaiga 130:18). Ma o lea, ou te tulimata’i atu i lesona e mafai lava ona ou aoaoina. O le mea e sili ai, o le mafai lea ona ou fesoasoani i isi—e pei o fanau a la‘u fanau—ia aoao mai tala o lo’u olaga e mafai ona ou faasoa atu ia i latou.
Faatino e tagata faataitai
Ua sili atu ona ma talia ma lo’u toalua le tasi ma le isi ma iloa ai, e mafai foi ona ma aoao ma tuputupu ae faatasi. Ua sili atu ona ’oa le ma faaipoipoga ona o afā na ma onosaia faatasi. Ua ola a‘e le ma fanau ma te mitamita ai pe popole ai foi, e faalagolago lava i lagona o le aso. E aumaia e fanau a fanau le fiafia moni ma le olioli.
Ma faatasi ai ma le faasolosolo matua e oo mai ai le iloa o le olaga faaletino e lē tumau e faavavau. O le taimi lenei e fai ai mea ia sa ou manatu e fai. Afai e le o le taimi nei, o afea la? “Faauta o le aso o le olaga lenei o le aso lea mo tagata e fai ai a latou galuega” (Alema 34:32). E faamoemoe, faatasi ai ma le faasolosolo matutua tatou te iloa ai o le taimi lenei e fai atu ai upu e lei tautalagia, faaleleia ai mafutaga, ma ausia ai ni sini o loo totoe.
A o faasolo ina ou matua, ou te mafaufau i le talatuu o le a ou tuua i a‘u fanau. Ou te faamoemoe o se vaega o lena mea o le a faapea sa ou oo i le olioli ma le faanoanoa, ma sa ou maua le poto. Ma ona o lena mea, sa ou maua ai le matagofie o le faasolosolo matua.
E alala le tusitala i Kalefonia, ISA.