Ua Na’o Tusiga Faaeletonika
Faaalia o le Alofa o le Faaola e ala i le Auauna Atu
E ala i faatinoga faamaoni o le alofa ma le auauna atu, e mafai ai ona tatou fesoasoani i isi ia o mai ia Keriso ma lagona le alofa o le Atua.
E alala le tusitala i Colorado, ISA.
I le avea ai ma tagata o feagaiga o Le Ekalesia a Iesu Keriso o le Au Paia o Aso e Gata Ai, atonu o nisi taimi tatou te manatunatu ai pe faapefea ona faataunuu la tatou tautinoga e faasoa atu le talalelei i isi. O le auauna atu e maua ai se avanoa matagofie e fesoasoani ai i isi ma faasoa atili atu ai e uiga ia Iesu Keriso a o tatou fesoasoani atu ia i latou i Lona suafa. Ae o nisi taimi atonu tatou te popole nei faapea o a tatou taumafaiga o se taumafaiga mo nao le faasoa atu o le talalelei.
O mea ua matou matauina i tausaga talu ai nei e faapea o le faaosofia i tua atu o galuega auauna atu e faia ai se eseesega tele i le auala e maua ai le auaunaga. E pei o le nuu o le Tupu o Peniamina, ua tatou talisapaia le malamalama: “pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). Pe a tatou sailia le taitaiga a le Atua ma talanoa atu ma le agaga tatalo i isi ma le manao e auauna atu ia i latou ma fesoasoani ia latou lagona le alofa o le Atua—ae le na o le talanoa e uiga i le talalelei—e le tatau ona tatou popole i le taunuuga. O le mafuaaga lena ua tatou maua ai le faataitaiga a Amona i le Tusi a Mamona e matuai musuia lava.
Mulimuli i le Faataitaiga a Amona
O Amona o se sa Nifae o le na alu atu e talai le talalelei i le laueleele o Isamaeli, o se laueleele o sa Lamana lea sa iloa ai o ia o se fili. Ina ua taunuu Amona, sa noatia o ia ma aveina atu i luma o le Tupu o Lamonae, o le sa fesiligia faamoemoega o le alu atu o Amona. Ina ua fesiligia pe aisea na sau ai o ia, sa fai atu Amona:
Ou te manao ou te nofo i totonu o lenei nuu mo se taimi; ioe, ma atonu foi seia oo i le aso ou te oti ai.
“… O le a ou avea ma au auauna” (tagai Alema 17:23, 25).
Sa auauna atu Amona ma le faamaoni ma le tuuto i le Tupu o Lamonae, e oo lava i le lamatiaina o lona lava ola e puipuia mamoe a le tupu ma ona uso a auauna mai le au faomea (tagai Alema 17:26–39). O nei faatinoga faamaoni o le tuuto ma le auauna atu na maua ai e Amona se avanoa e faasoa atu ai le talalelei i sa Lamana ina ua fesiligia o ia e uiga i ana amioga.
O le faataitaiga a Amona ua musuia ai le mamanu a lo matou aiga lava ia mo le auauna atu. E aofia ai le auauna atu i tagata mo se faamoemoega autu e tasi: ia fesoasoani ia i latou ia manuia ma fiafia. I se isi faaupuga, tatou te auauna atu ia i latou ona tatou te alolofa moni ma popole mo i latou.
O lenei faiga e masani ma e mafai ona taulimaina aua na pau lava le mea e manaomia o le tatou nofouta i mea o loo tutupu i olaga o tagata o loo siomia i tatou ma fesoasoani ia i latou i taimi ma nofoaga e manaomia ai le fesoasoani. Ua matou iloa a o matou galulue faatasi ma le taitai misiona a le uarota ma faifeautalai faamisiona, e mafai ona matou faateleina avanoa uma e faaalia ai le alofa o le Atua i a tatou uo ma tuaoi.
Iloaina o se Manaoga, Filifili e Faatino
I tausaga ua mavae, sa siitia mai ai se tamaitai e igoa ia Jacqueline Langey-Johnson i lo matou pitonuu. O ia o se tausima’i mo tamaitai talavou e toalua e i ai manaoga faapitoa mo le atinaega. I le avea ai ma se ulugalii, sa ma manatunatu pe o faigata ia Jacqueline ona tausia ana meatotino a o tausia nei tamaitai talavou. Sa tonu ia i ma’ua e faailoa atu i ma’ua lava ma vaai pe faapefea ona ma fesoasoani.
Sa manaia le matou talanoaga i le taimi na ma ta’u atu ai ia Jacqueline o le a ma fesoasoani ia te ia i ni galuega o le fanua. Sa ia taliaina ma le agaga faafetai la ma ofo ma ta’u mai ia i ma’ua le faigata ia te ia ona alu i fafo ma fai galuega o le fanua ona sa le mafai ona ia tuua na o tamaitai talavou i totonu o le fale.
Sa silafia lelei e le Alii le tulaga o Jacqueline ma sa faaaoga i ma’ua e fesoasoani ia te ia ia maua le olioli i lona aiga fou ma lagona le taliaina i le pitonuu. Sa ma fiafia lava i le avanoa e auauna atu ai ia te ia ma atiina ae se faauoga e faavavau.
Vaaia o Faamanuiaga o le Auauna Atu
E lei umi ae ma iloaina o Jacqueline o se Kerisiano faamaoni o le sa fiafia e faitau e uiga i le Faaola. O lea la, i se tasi o a matou talanoaga, sa ma tuuina atu ai ia te ia se tusi lesona o le Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou . Sa matuai fiafia lava Jacqueline i anomea o loo i le tusi lesona ma le auala fatufatua’i na tuuina mai ai—sa avea ai le faitauina o le Feagaiga Fou o se mea fiafia ma faigofie ai ona malamalama i ai.
I se tasi aso pe a ma le lua tausaga talu ai, sa fesili ai Jacqueline pe mafai ona o mai faifeautalai faamisiona i lona fale ma aoao atili o ia e uiga i le Ekalesia e faaaoga ai le tusi lesona o le Sau, Mulimuli Mai ia te Au . Faatasi ai ma faifeautalai faamisiona, sa amata ona ma faia ni talanoaga faalevaiaso ma ia. Ina ua mavae le fa masina, sa manao o ia e papatiso. Sa ia fai mai ia te au (Bob) e faatino le sauniga ma lo’u toalua (Judy) e avea o se molimau.
Talu mai lona papatisoga ia Setema 2020, sa auauna atu Jacqueline o se tagata faafeiloai i le sauniga faamanatuga, fesoasoani i faifeautalai faamisiona i le aoaoina o isi, fautua o talavou matutua i la matou uarota e i ai manaoga faapitoa o le atinaega, feiloai ma faifeautalai faamisiona i vaiaso taitasi e aoao atili e uiga i le Ekalesia, ma faailoa mai nisi o ona tuaa o e manaomia galuega o sauniga o le malumalu e faatinoina mo i latou. O loo auauna atu foi o ia i le taimi nei i le Malumalu o Denver Colorado.
Molimauina o Vavega
I le papatisoga, e osifeagaiga ai tagata o le Ekalesia ma le Atua e “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma” (Mosaea 18:9).
A o tatou taumafai ma le faamaoni e faasoa atu le alofa o le Tama Faalelagi i o tatou uso ma tuafafine e ala i la tatou auaunaga, e pei ona sa faia e Amona, ua tatou iloa o le a matala le lagi ma o le a tatou oo i ni vavega tetele, e aofia ai nisi e oo mai e ala i le faasoaina atu o le talalelei i a tatou uo ma tuaoi.