O Se Mamanu Mamana mo le Tulaga Faamatua

Setema 2022

“O Se Mamanu Mamana mo le Tulaga Faamatua,” Liahona, Sete. 2022.

O Se Mamanu Mamana mo le Tulaga Faamatua

Saunia e Maren Daines, JD, Tagata Faapitoa i Faiga Faavae o Aiga ma le Atinaega o Polokalama, ma G. Sheldon Martin, PhD, Licensed Clinical Mental Health Counselor

E faavae i mataupu faavae o le talalelei ma sailiiliga lagolago, o lenei mamanu mo le tulaga faamatua e mafai ona fesoasoani e taiala ai oe i le fatuina o ni sootaga anoa, faafaileleina o le faatuatua ma le tuputupu ae, ma le fausiaina o le lotogatasi ma le maufetuunai i totonu o lou aiga.

Ata

tamā o loo faitauina tusitusiga paia ma lona afafine

O le avea ma se matua e i ai se faamoemoega e faavavau ma e mafai ona tauia, faamalamalamaina, ma olioli. Ae talu ai e eseese uma ituaiga o aiga ma o latou lava luitau tulaga ese, o le tausia o fanau e mafai foi ona foliga lofituina pe vaivai ai i nisi taimi.

O le mea e lelei ai, e lē tatau ona tatou faia na o tatou.

Faatasi ai ma le taitaiga a lo tatou Tama Faalelagi, o le lagolago a le Faaola ma Lana talalelei, ma le faaaogaina ma le agaga tatalo o fautuaga musuia, e mafai ai ona tatou maua le fesoasoani ma le faamoemoe mo la tatou malaga faamatua.

O Se Mamanu e Lagolagoina e le Talalelei mo Tulaga Faamatua

I le mauaina mai le talalelei a Iesu Keriso ma le sailiiliga lagolago e uiga i le tulaga faamatua, ua suesue ai e tusitala ni mataupu faavae taiala se tolu mo le faafaileleina o le tuputupu ae faalelagona ma faaleagaga o se tamaitiiti. Pe a aumaia faatasi, o nei vaega fesootai o le faamamafa e fausia ai se mamanu mamana lea e mafai ona fesoasoani i aiga i le lalolagi atoa.

O lenei mamanu e mamana aua e tuufaatasia ai upumoni o le talalelei ma manatu autū mai le sailiiliga o le atinaega o le tulaga faamatua ma fanau. O le sailia o faaaliga faaletagata lava ia i le auala e faaaoga ai mataupu faavae i lenei mamanu e mafai ona fesoasoani ia te oe e fausia ai le maufetuuna‘i o lou aiga ma faatuina se aiga e faatotonugalemu ia Iesu Keriso.

O mataupu faavae taiala e tolu o le:

Fatu ni sootaga alofa faaleaiga
Faafailele le aoaoina ma le tuputupu ae
Fausia le lotogatasi ma le malosi e ala i le auauna atu

O lenei mamanu e fesoasoani ia i tatou e taulai atu ai i mea e sili ona tāua. O vaega taitasi o le mamanu o se vaega tāua lea e faamalosia ai o tatou aiga. O le galulue faatasi, latou te uunaia ai sootaga lelei ma aafiaga, fesoasoani i o tatou aiga e taulima ai faigata, ma fausia ai le gafatia ma le maufetuunai.

A o tatou tuputupu ae o ni mātua, e mafai ona avea lenei mamanu o se auivi aogā mo le iloaina o le auala sili e aoao atu ai ma faafailele ai tamaiti taitoatasi.

O loo i lalo se vaaiga aoao puupuu o vaega taitasi o le mamanu ma se faataitaiga mai le soifuaga o le Faaola e taiala ai i tatou i le faaaogaina o lenei mamanu i o tatou olaga. O loo maua nisi faamatalaga mo le tulaga faamatua, fesoasoaniga faatino, ma tali i fesili masani i tulaga faamatua i le family.ChurchofJesusChrist.org.

1. Fatu ni Sootaga Alofa Faaleaiga

Ua faamanatu mai e lenei mataupu faavae ia i tatou e faamuamua sootaga alofa ma le Tama Faalelagi, le Faaola, o tatou taitoalua, ma a tatou fanau. O nei sootaga faaleaiga e tāua tele. O le faasinomaga ma sootaga e faavavau a ā tatou fanau e tuputupu ae mai le upumoni faavae e faapea “o i latou taitoatasi o se atalii po o se afafine agaga faapelepele a ni mātua faalelagi, ma, o lea ua tofu ai ma se natura paia ma se taunuuga.”¹

E mafai ona tatou uunaia i latou ia iloa le Atua ma Iesu Keriso e ala i le faatuatua, tatalo, suesue i tusitusiga paia, ma faaaliga patino mai le Agaga Paia (tagai Ioane 17:3). E mafai ona tatou faatupuina le faatuatua e ala i le faafaileleina o le “manao ia talitonu” o a tatou fanau (Alema 32:27) ma fesoasoani ia latou lagonaina le alofa o le Atua. E tāua mo a tatou fanau le iloa e malamalama atoatoa le Tama Faalelagi ma le Faaola ia i latou, alofa atoatoa ia i latou, ma finagalo e fesoasoani ia i latou ia manuia (tagai Roma 8:38–39).²

I le avea ai ma matua, e tāua le fatuina o se sootaga alofa ma tamaiti taitoatasi e faatumulia i le mafanafana ma le agaalofa. O le malamalama i vaaiga a ā tatou fanau ma le faalogo ma le faaaloalo i mea latou te fai mai ai e fausia ai se sootaga malupuipuia ma le alofa. E manaomia ona iloa e a tatou fanau tatou te fiafia ia i latou, popole i o latou lagona, ma o loo i ai iina e fesoasoani ia i latou. O a tatou fegalegaleaiga alofa ma a tatou fanau e fesoasoani e atiina ae se vaaiga lelei mo i latou lava, iloa lo latou taua e faavavau, ma fausia ai ni sootaga faatuatuaina ma le Atua ma Iesu Keriso.

Ma le isi, e mafai ona avea tagata o le aiga ma se lagolago maoae i le tasi ma le isi. E mafai ona tatou faafaileleina sootaga faaleaiga a o tatou potopoto faatasi e fesootai, tatalo, fefautuaai, ma maua le fiafia.

Tepa Atu ia Keriso

Ua faasoa mai e Iesu Keriso Lona alofa, taitoatasi, e ala i se sootaga e ofo mai ai le faaaofia ai, faamoemoe, ma le faamalologa. Ina ua uma ona fetalai atu le Faaola ia sa Nifaē, sa Ia aapa atu ma le agaalofa ma auauna patino atu e faamalolo ma faamanuia i latou taitoatasi. Sa Ia “ave [o] fanau laiti, taitoatasi,ma faamanuia i latou, ma tatalo atu i le Tama mo i latou” (3 Nifae 17:21).

I le avea ai ma se matua, e mafai ona e faamanuiaina lau fanau e ala i le fatuina o se sootaga alofa ma i latou—tasi le sootaga anoa i le taimi e tasi.

Manatu mo le Fatuina o Ni Sootaga Alofa Faaleaiga

Fesootai atu i lau fanau e ala i le faalogo ma le toto‘a, tali atu ma le alofa, ma mulimuli i a latou faailo e ausia ai o latou manaoga.
Faafailele le faatuatua i le Tama Faalelagi ma Iesu Keriso ma uunaia le tatalo ma faaaliga faaletagata lava ia e faamalosia ai nei sootaga paia.
Tausia oe lava ma lau faaipoipoga. O le a fesoasoani lenei mea ia te oe e fesootai lelei ai ma lau fanau ma ia lua tausi faamatua ma lou toalua i le lotogatasi ma le alofa, o ni paaga tutusa. Afai e te nofofua, taitai lou aiga i le faatuatua ma le mautinoa. Saili le lagolago faaopoopo mai ia i latou e te faatuatuaina.
Uunaia le puipuiga, auai, ma le olioli i lou aiga.

2. Faafailele le Aoaoina ma le Tuputupu Ae

Ata

matua o loo talanoa ma le la tama teine

Faafailele le tuputupu ae o lau fanau e ala i le faatauaina o o latou uiga tulaga ese, ofoina atu ia i latou le alofa e lē maluelue, ma le lagolagoina o a latou taumafaiga. Saili po o fea o i ai lau fanau i lo latou atinaega ma fetuunai i ai lau lagolago ina ia fetaui ma o latou manaoga faapitoa. O au faataitaiga, faatonuga, taiala, ma au faamalosiauga e taua tele e faafailele ai tomai ma le talitonuga o lau tama. Ia naunau e iloa ma agaalofa a o aoao lau fanau e ala i aafiaga.

O le faafaileleina a matua e aloese foi mai le soona faamalosi, soona tuufau, po o le soona faatagaina. O le tuuina atu o tuaoi talafeagai, faiga masani, ma faamoemoega talafeagai o le a siitia ai le tuputupu ae o lau tama. E pei o lo tatou Tama Faalelagi, e tatau i mātua ona taulai atili atu i le faafoeina o le tuputupu ae o a latou fanau nai lo ō latou lava manatu (tagai i le 2 Nifae 28:30; Mataupu Faavae ma Feagaiga 50:24, 40).

Taitai, taiala, ma savali i autafa o lau fanau a o latou aoao e mulimuli ia Iesu Keriso.³ Aoao i latou i le auala e liliu atu ai i le Faaola ma faalagolago i Lana Togiola e fesoasoani ai ia latou tuputupu ae. O le a faasolosolo ina iloa e lau fanau mai au faataitaiga ma o latou lava aafiaga e faapea latou te “mafaia mea uma lava i le faamalosi mai o Keriso,” o le e faamagaloina ma faamalosia i latou (Filipi 4:13). O le tuputupu ae ma suiga e mafai ona faigata ma manaomia ai le tele o faataitaiga. O mātua amiotonu, ma faamoemoeina e taumafai e aoao a latou fanau e le gata i le faapefea ona “savavali i ala o le upumoni” (Mosaea 4:15) ae pe aisea foi e tatau ai ona latou faia. Faafailele lo latou malamalama ma lagolago lo latou faaaogaina ma le amiotonu o le faitalia i laasaga taitasi latou te faia.

Tepa Atu ia Keriso

E faamalosia e Iesu Keriso lou tuputupu ae e ala i le silasila atu i manaoga amiotonu o lou loto ma fesoasoani ia te oe ia ausia (tagai 1 Samuelu 16:7; Enosa 1:12). Sa fesili le Alii i Ona soo “taitoatasi … : O le a se mea tou te mananao i ai mai ia te au?” (3 Nifae 28:1; tagai foi i le 1 Nifae 11:1–3). O le mafaufau i lenei fesili e mafai ona fesoasoani ia te oe e iloa ai ma atiina ae mea e sili ona e faatauaina. Mafaufau pe na faapefea ona faafaileleina e le Faaola le aoaoina ma le tuputupu ae i totonu o le uso o Iareto e ala i le faaaloalo i lana faitalia ma fesili atu, “O le a se mea tou te mananao ia ou faia?” (Eteru 2:23). Sa lagolagoina o ia e le Alii e ala i le tuuina atu o faatonuga patino, pe a manaomia, ae e ala foi i le uunaia o ia na te fuafuaina ni mea. E lē faamalosia pe pulea oe e le Faaola ae nai lo lena, e aoao atu ma faatauanau oe e faaaoga lou faitalia patino mo le lelei (tagai i le Mataupu Faavae ma Feagaiga 58:26–28).

Uunaia le tuputupu ae o lau fanau e ala i le lagolagoina o manaoga amiotonu o o latou loto—tasi le fesili malamalama i le taimi e tasi.

Manatu mo le Faafaileleina o le Aoaoina ma le Tuputupu Ae

Faasino atu lau fanau ia Iesu Keriso ma aoao i latou i le auala e maua ai le mana o Lana Togiola.
Faataitai ia Iesu Keriso e ala i le tuuina atu o le alofa, taitaiga, lagolago, ma le agaalofa a o aoao lau fanau e mulimuli ia te Ia.
Faafailele le tuputupu ae e ala i le lagolagoina o le malamalama, tomai, faitalia, ma le to’a o lau tama.
O mai ia Keriso e ala i le aoaoina o Lana talalelei ma faataitai le ola faatasi ai a o outou agai i luma i luga o le ala o feagaiga.

3. Fausia le Lotogatasi ma le Malosi e ala i le Auauna Atu

Ata

aiga o loo aveina meaai i se isi aiga

Na poloaiina e le Faaola Ona soo, “ia outou fealofani; faapei ona ou alofa atu ia te outou” (Ioane 13:34). A o e faamafanafana, siitia, ma auauna atu le tasi i le isi, ua e faasalalauina le alofa mama o Keriso ma avea atili e faapei o Ia. Ua saunia foi e le Atua le tele o avanoa taua mo lau fanau e aoao ai ma tuputupu ae e ala i le auai i Lana galuega ma faataunuuina a latou folafolaga e auauna atu i isi (tagai Mose 1:39; Mosaea 18:7–11). O le faasoaina atu o le alofa o Keriso ma le faasusuluina atu o Lona malamalama e suia ai i latou ma ē latou te auauna atu i ai.

E faamanuiaina foi lou aiga i le auai atu i se uarota po o se paranesi lea e tuuina atu ma maua ai e lau fanau le alofa ma le lagolago. O le filiina “faatasi (o outou) loto i le lotogatasi ma le alofa o le tasi i le isi” (Mosaea 18:21) e lalagaina ai se upega o sootaga felagolagomai ma aafiaga lelei e faamalosia ai lou aiga. Pe a e auauna atu i isi ma le alofa faaKeriso, e mafai ona e fesoasoani e fausia Siona i totonu o lou aiga ma totonu o se faalapotopotoga atoa (tagai Mose 7:18).

Aoao tamaiti o le auauna atu e mafai ona avea o se faiga masani i aso taitasi nai lo o se galuega faatino e faatasi lava ona fai. O le taumafai e auauna atu i le tasi ma le isi o le a fesoasoani i tamaiti ma le autalavou ia maua se olaga sili atu ona faamalieina a o latou vaavaai i tala atu o o latou lava manaoga i manaoga o isi. E ofoofogia le fausiaina o Siona o se nuu o Siona.

Tepa Atu ia Keriso

Na valaaulia e le Faaola i tatou taitoatasi e alolofa ma auauna atu i isi (tagai Ioane 13:34–35). O le auai i le galuega o le faaolataga a lo tatou Tama Faalelagi e faamalosia ma suia ai i tatou. O le “i ai i le galuega [a Lona] Tama” (Luka 2:49) o se vaega o le tuputupu ae na oo ia Iesu i Lona talavou a o “tupu (i) le poto ma le tino, ua alofagia o Ia e le Atua atoa ma tagata” (Luka 2:52).

E auai lou aiga i le galuega a le Atua o le faaolataga ma le faaeaga e ala i le ola i le talalelei a Iesu Keriso, tausia o i latou e lē tagolima, valaauliaina o tagata uma ia talia le talalelei, ma tuufaatasia aiga mo le faavavau.⁴

Faafailele le tuputupu ae o lau fanau e ala i le autasi i le “galuega tele” a le Atua (Mataupu Faavae ma Feagaiga 64:33)—o se tasi o galuega alofa o le auauna atu i lea taimi ma lea taimi.

Manatu mo le Fausiaina o le Lotogatasi ma le Malosi e ala i le Auauna Atu

Faaali atu lou alofa mo le Atua ma iloa atili o Ia e ala i le alofa ma le auauna atu i Ana fanau.
Alofa i le tasi ma le isi e ala i le auauna atu ia i latou o siomia oe ma tausia i latou e lē tagolima.
Faapotopoto Isaraelu e ala i le faasoaina atu o le talalelei, sailiili i lou talafaasolopito o aiga, auauna atu i le malumalu, ma fesoasoani i isi e osia ma tausia feagaiga paia.
Fausia le lotogatasi ma le malosi tuufaatasi e ala i le ofoina atu o le alofa, fatuina o se lagona o le auai, ma le lagolagoina e le tasi o le isi.

Faaaogaina o le Mamanu i Lou Aiga

O nei mataupu faavae taiala e mafai ona fesoasoani e taulai atu ai lou tulaga faamatua i aso uma. Mo se faataitaiga, o le asō e mafai ona e mafaufau pe mafai faapefea ona e fatu ma le loto i ai se sootaga alofa sili atu, faafailele le aoaoina, po o le atiina ae o isi. O le faaaogaina o lenei mamanu e mafai ona faaleleia ai le aoaoina o le talalelei, faafailele ai le tuputupu ae patino o lau tama, ma uunaia ai se taulaiga susulu atu i fafo lea o le a siitia ai ma faamanuiaina ai lou aiga. O le faaaogaina o nei mataupu faavae e mafai foi ona faaleleia ai lou faaaogaina o punaoa a le Ekalesia e totonugalemu i le aiga e pei o le Sau, Mulimuli Mai ia te A‘u ma polokalama a Tamaiti ma le Autalavou.

E tele auala e faaaoga ai mataupu faavae o lenei mamanu. Ia fetuutuunai ma saili faaaliga faaletagata lava ia e fetuunai ai i manaoga o lou aiga. O le mamanu o le “fatu, faafailele, atiina ae” e lē faatatau i le faia o nisi mea e sili atu. E ui atonu e i ai ni mea e te lagona le musuia e faaopoopo atu i mea o loo e faia nei, ae o le mamanu ua faia e fesoasoani ia te oe mo le faaaogaina tatau o le taimi tou te faatasi ai.

A e faia soo se mea e fatu ai ni sootaga alofa, faafailele le aoaoina ma le tuputupu ae, pe atiina ae le lotogatasi ma le malosi e ala i le auauna atu, ua e faataatiaina se faavae mautū mo mea uma e te faia i lou aiga.

O Matua Lelei e Faatuatuaina, Ae Lē Atoatoa

E taua le manatua e lē manaomia ona e atoatoa ina ia avea ai ma se matua lelei. Nai lo lena, saili ia avea ma se punāvai faatuatuaina o le alofa ma le lagolago mo lau fanau. Tau lava o le faatasi ma lau tama i ni auala laiti e mafai ona faia ai se suiga tele.

Pe a lagona le lotovaivai i le tulaga faamatua, manatua e mānava, fai si nau malologa, ma taumafai pea. E mafai ona e fetaomi atu i luma ma le faatuatua i le iloaina e popole tele le Faaola ia te oe ma lau fanau ma o le a faalauteleina au taumafaiga faamaoni ma manaoga amiotonu.

Faamoemoe ia Keriso

A o e taumafai e tutumau i le faia o mea uma e te mafaia ina ia alofa ai, faafailele, ma faamalosia tamaiti taitoatasi, e mafai e oe ma lou aiga ona maua le faamoemoe ia Keriso ona o Lana folafolaga e faavavau ia te oe: “Aua le matatau, le fanau laiti e, ona o outou o a a‘u, ma ua Ou manumalo i le lalolagi” (Mataupu Faavae ma Feagaiga 50:41).