“Tasi le Aso i le Taimi,” Liahona, Sete. 2022.
O Leo o le Au Paia o Aso e Gata Ai
Tasi le Aso i le Taimi
Matou te faafetai i tagata lelei o le matou uarota, o e na fesoasoani ia i maua i le ma atalii e i ai faafitauli i le tautala ma agafesootai.
O Iosua i le taimi o se malaga talu ai nei i le malumalu.
Ata pue o Iosua mai faaaloaloga a le tusitala
Ina ua 18 masina le matua o lo ma atalii o Iosua, sa ma mātauina ni mea ese i ana amioga. Sa mafai e Iosua ona tauloto toetoe lava o upu uma o pese taitasi i le televise na ia matamata ai, ae sa tuai ona ia iloa tautala. I se tasi aso na fai mai ai lo‘u tinā faaletulafono na faaalia e Iosua ni faailoga o faafitauli i le tautala ma agafesootai. Sa ta‘u mai e tagata tomai faapitoa ia i matou le mea lava lea e tasi.
O lo‘u toalua, o Elisapeta, na faalu lona taimi e faitau ai i tusiga e uiga i le ma’i o le faafitauli i le tautala ma agafesootai. Sa ia lesitalaina foi ia Iosua i polokalama e fesoasoani ai ia te ia. Sa naunau o ia e maua e ia le amataga sili i le olaga e mafai ona matou tuuina atu ia te ia.
E i ai aso sa ou popole ai i le lumanai, ae faatoafilemu au e Elisapeta. Sa ia fai mai ia te au e tatau ona ma faia mea i le tasi le aso i le taimi.
“E tatau ona tatou talisapaia mea fou taitasi uma ua aoaoina e Iosua nai lo le taulai atu i mea uma e lē mailoa o le lumanai,” o lana tala lea.
A o tuputupu ae o ia, sa amata ona faigata Iosua i le lotu. Ina ia taofia o ia mai le faalavelaveina o le Peraimeri po o le faaoolima i tamaiti, sa ou siiina o ia i luga o ou vae. Sa tafiti o ia, valusi, ma ma tauivi mo le tolu itula atoa o le lotu. Sa masani ona ou sau i le fale ma le tino una’oa ma le vaivai.
“Aisea ta te lē tuua ai o ia i le fale mai le lotu ae ta feauauai e nonofo faatasi ma ia?” Sa ou fautua atu ai.
“Afai ta te lē faaauau pea ona ave o ia,” na tali atu ai Elisapeta, “o le a ia aoaoina afai e fai ona uiga na, o le a ia tuua le lotu.” Sa ou iloa e sao o ia.
I se tasi aso na ta’u mai ai e le tina o le isi aiga e i ai se tamaitiiti ma’i ia te au, “Pe a atoa le valu tausaga o Iosua ma maua le Agaga Paia, o le a suia ona uiga!”
Sa ou masalosalo i ana upu, ae ina ua atoa lona valu tausaga, sa ia maua le Agaga Paia ma sa suia—teisi ona uiga.
Ina ua matua Iosua, sa ia mauaina le perisitua. Sa ia tufaina le faamanatuga, ma sa ia aoaoina le tāua o le auauna atu. Sa aoaoinga e Iosua ma uso o lana korama o le perisitua se siva i se vitiō o musika o le ‘80 ma faatinoina i se pati a le uarota.
Sa agalelei le matou uarota ia Iosua. Sa ataata tagata pe a ia tufaina le faamanatuga a o faia ni nai taga o le siva o le ‘80.
O Iosua ua 17 nei tausaga. O ia o se tagata musika talenia e tusia pese. E fiafia o ia i faatinoga fai taga ma e faaali mai e lē aunoa i tifaga a le a’oga ma le nuu.
Ma te faafetai i le avea ai ma mātua o Iosua ma faasoa atu i lana malaga. Ma te lē o mautinoa po o le a faapeī le lumanai, ae ua ma tautino atu e ola atoatoa faatasi ma ia i aso taitasi.