“O La‘u Tali i le Tusi a Mamona,” Liahona, Sete. 2022.
O Leo o le Au Paia o Aso e Gata Ai
O La‘u Tali o le Tusi a Mamona
Sa ou taumafai malosi e “faaleleia” Mama Wong, ae na pau lava le mea sa ia manaomia o le afioga faigofie ma mamana a le Atua.
Mama Wong ma Annie
Ata pue mai faaaloaloga a le tusitala
Ina ua uma ona ou papatiso ia Iuni 2002, sa ou faasoa atu lo‘u faatuatuaga i lo’u tina. E ui ina sa masani ona ma auai faatasi ma Mama Wong i le lotu, ae sa lei manao o ia e aoao atili.
Mulimuli ane, i le mavae ai o le 10 tausaga, na filifili ai Mama Wong e papatiso. Sa matuai ou fiafia lava. O le mea e faanoanoa ai, i ni nai tausaga mulimuli ane, sa ia lē toe faamalosia lana molimau ma faia ai ni alofaga mo le lē auai i le lotu.
Sa ou uunaia o ia e sau i le lotu, ae ua avea lena mea e afua ai ni finauga. Mulimuli ane, sa ou lē toe faamalosia o ia ina ia lē afaina ai le ma mafutaga.
I le taimi o le konafesi aoao ia Oketopa 2019, sa valaaulia ai e Peresitene Russell M. Nelson tagata o le Ekalesia e “mamanu [a tatou] lava fuafuaga” e faamalolosia ai a tatou molimau o le Toefuataiga.1 A o ou mafaufau i lana valaaulia, sa ou lagonaina malosi le tatau ona ou faia o se mea e faaleleia atili ai le ma va ma Mama Wong.
Mo la’u sini o le Tausaga Fou, sa ou tuuto atu a’u lava e faitau le Tusi a Mamona faatasi ma Mama Wong. Soo se taimi lava e fai mai ai ua tigā ona mata, sa ou fai atu, “Tau lava o lou faalogo.” Ina ua ia fai mai e tatau ona ia faamamaina ipu, sa ou mulimuli atu ia te ia i le umukuka ma faaauau pea ona faitau leotele.
Sa foliga mai na faalogo lelei Mama Wong ma manatua mea sa ou faitauina. I le āluga o taimi, sa ia filifili ai e faitau na o ia lava. Mulimuli ane sa ia ta‘u mai ia te a’u e lē mafai e se tagata faatauvaa ona tusia le Tusi a Mamona. Sa leai sona masalosalo o lea tusi o le afioga ia a le Atua. Mo au, o le vaaia o ia o alu mai le lē fiafia i le manao e faitau ma molimau atu e uiga i le Tusi a Mamona o se vavega.
Ina ua uma ona papatisoina Mama Wong, sa ou popole ua auai o ia i le Ekalesia ona o au. Ae o lenei ua i ai sana lava molimau. Mo le tele o tausaga sa ou taumafai ai e “faaleleia” o ia, ae na pau lava le mea sa ia manaomia o le afioga faigofie ma mamana a le Atua.
Ou te faafetai mo se perofeta soifua o lē na te tuuina mai i taimi uma ia i tatou le taitaiga e tatau ai. Afai tatou te faatinoina mea ua ia aoao mai, o le a mulimuli mai faamanuiaga silisili. O lenei aafiaga na faaali mai ai ia te au e finagalo le Alii e faamanuia i tatou. Pau lava le mea na ou faia o le faitau o ni nai mataupu i lo‘u tina mai le Tusi a Mamona. Ona faia lea o le vaega a le Alii!