“Tuu Atu i le Alii e Taitaia Lou Olaga,” Liahona, Sete. 2022.
Autalavou Matutua
Tuu Atu i le Alii e Taitaia Lou Olaga
Sa lē mafai ona ou vaaia i taimi uma le ala o le a lelei ai mea uma, ae ina ua ou faatinoina i le faatuatua, sa faamanuiaina au e le Alii.
Sa lei lauiloa mataupu faalelotu i lo‘u aiga a o ou tuputupu ae—e ui ina sa matuā lolotu o’u matua mo le tele o taimi o o la olaga, ae o le ma’i tumau o lo’u tamā, faapea ma isi tofotofoga, na taitai atu ai i laua e tuua le tapuaiga sa la ola a‘e ai. Sa fa ou tausaga i le taimi na maliu ai o ia i le kanesa ma o le uii foi o tamaiti e toa 13, ma sa lē talitonu lo’u tina ua oti lana tane o le a faatagaina e le Atua se mea faapea e tupu i lo matou aiga.
Ae ina ua 14 o‘u tausaga, sa ou lagonaina se mea na misi mai lo’u olaga. Sa ou mafaufau pe sa i ai so‘u faamoemoega sili atu ou te lei iloaina. Sa ou lagonaina le pei o Iosefa Samita, e pei “sa faaosoina ai lo‘u mafaufau e manatunatu mamafa ma le lē mautonu tele” (Iosefa Samita—Talafaasolopito 1:8). E ui ou te lei faalogo lava ia Iosefa Samita i lena taimi, ae sa ou amataina se sailiga e talitutusa lava ma ia a o ou auai i le tele o lotu ma le faamoemoe o le a ou maua ai le upumoni.
Ma sa ou mauaina, i se tasi aso, ina ua ou vaaia ni alii talavou se toalua i suti o ō atu i le fale o lo’u tuaoi. Sa ou fia iloa ma fesili atu ia i laua pe mafai ona ou alu atu i le latou talanoaga. Ina ua uma ona maua mai le faatagaga a lo‘u tina, sa ou amataina lesona ma faifeautalai ma iu ai ina ou auai i le Ekalesia.
O le auai i Le Ekalesia a Iesu Keriso o le Au Paia o Aso e Gata Ai na fesoasoani ia te au e maua ai lou faamoemoega, aemaise lava i le vaitaimi o le avea ma se talavou matua lea sa tatau ai ona ou faia ni faaiuga se tele lea sa lei malilie i ai tagata sa siomia au. Ae e ui lava sa i ai so‘u faamoemoega ma se taitaiga, ae sa ou lē mautinoa i taimi uma pe o le a faapefea ona lelei mea uma.
Peitai, a o ou feagai ma le lē mailoa ma le lē mautonu ma le tele o suiga, sa tumau pea le taitaiga a le Tama Faalelagi a o ou liliu atu ia te Ia. Sa ou aoaoina nisi o auala e faalagolago ai ia te Ia ma lo‘u faatuatua lea na fesoasoani ia te a’u e agai ai i luma ma faaauau pea ona maua lo‘u faamoemoega.
Agai i Luma ma se Misiona
I le vaitausaga lea sa sauniuni ai le toatele o la‘u tupulaga e o i le kolisi, sa ou fuafuaina ai pe o le a faapefea ona ou alu i se misiona. I Chile, e tatau i tagata uma ona faia se suega ae latou te lei o i le iunivesite. E na o le faatasi i le tausaga e ofoina mai, o lea afai ou te alu i se misiona, o le a le gata ina faatuai la’u aoga mo le lua tausaga ae e tatau foi ona faatali mo se tausaga faaopoopo e alu ai i le aoga pe a mae‘a lena.
O lo‘u aiga, aemaise lava lo’u tina, sa tetee i se misiona. Sa taua tele ia te ia lo‘u mauaina o se aoaoga i le kolisi. Ae sa ou talitonu o le a fesoasoani mai le Alii ia te au e fai le mea e tatau ai, o lea sa amata ai ona ou saunia ma le agaga tatalo.
Ina ua sau le epikopo i lo’u fale ma a‘u pepa o le misiona ua maea ma talosagaina le saini a lo’u tina, sa faateia o ia; ou te lei ta’ua i ai sa ou faia lava i le faagasologa. Sa alu sina taimi e faatalitonu ai o ia, ae sa faamalūlūina e le Alii lona loto ma fesoasoani ia te ia e malamalama sa ou manao e auauna atu.
Na tuuina mai e le talalelei ia te a‘u le faamautinoaga o loo ou faia le mea sa’o, e ala i le tau lava o le agai i luma, i lea laasaga ma lea laasaga, ma le faatuatua—e oo lava i a‘u fesili uma ma lē mautonu—na faaauau ai pea ona ou alualu i luma.
Mulimuli i lea Faaaliga ma lea Faaaliga
O le toe foi mai i le fale mai la‘u misiona o lona uiga foi o le toe foi atu i le lē mautonu. A o ou sailia le taitaiga mai le Tama Faalelagi e ala i le tatalo ma le anapogi, sa ou maua se faaaliga e tatau ona ou siitia atu i le Iunaite Setete ma auai i le Iunivesite o Polika Iaga, lea sa foliga mai o se galuega e toetoe lava a lē mafai.
Sa ou faia le mea sili sa ou mafaia ma faia isi laasaga sili ona lelei. O nisi taimi ou te lagona ai e pei ua leai se mea o ausia—sa ou galue malosi i le mea na ou mafaia, ae ou te lei mautinoa o le a fesoasoani au taumafaiga e ausia ai au sini. Peitai, o lau sini autu lava o le mulimuli lea i le mea na finagalo le Alii ou te faia, ma o lena sini sa tāua ia te au.
A o ou faia na taumafaiga, i se tasi aso sa musuia au e aapa atu i la‘u uo lelei lava o lē sa sau mai le Iunaite Setete ma nofo i lo’u nuu. Ou te lei iloa pe o le a le mea o le a oo i ai i lena taimi—sa na ona ou aapa atu ona sa taitaiina au e le Agaga—ae sa iu ina avea lau uo ma lona tamā ma meafaigaluega i le fesoasoani ia te au e iloa ai le mea e fai e talosaga ma maua ai le visa sa ou manaomia e aoga ai i le BYU. Faatasi ai ma le la fesoasoani ma le tele o osigataulaga na faia e lo‘u tina e totogi ai la’u malaga, sa ou taunuu ai iina. O se vavega lava.
Sa faaauau pea ona alualu i luma lo‘u olaga i le ala lava lea e tasi. Ou te faia le mea sili ou te mafaia ona maua lea o musumusuga, e tasi i le taimi, mo le isi mea e tatau ona ou faia. I lena tulaga, sa ou maua ai se galuega i le nofoaga autu mo le aoaoina o faifeautalai, maua ni auala e totogi ai lo‘u pili, filifili se mataupu autu, na iu lava ina faauu, ma faaipoipo.
O tali na ou mauaina sa le o taimi uma na vave maua ai ma ou te lei mauaina lava se fuafuaga auiliili atoatoa, ae sa ou maua ni faamautinoaga sa fiafia le Alii i le mea sa ou agai i ai.
Pe a Le Fetaui Faaaliga
I ni nai tausaga mulimuli ane, sa ou aoaoina ai le tāua o le ositaulaga i le ola ai i le talalelei. Afai tatou te mananao i le Alii e tuuina mai ia i tatou le faamoemoega ma le taitaiga, e tatau ona tatou naunau e talia lena taitaiga.
Ina ua maea le aoga, sa lei ōgatusa mea ma le fuafuaga ma le kamupani sa ou faigaluega ai, o lea sa i ai ni filifiliga se lua ia i maua ma lou toalua: o le nonofo i le Iunaite Setete pe toe foi atu i Chile. Sa ma lagonaina ma le manino e tatau ona ma toe foi atu i Chile. Atonu e foliga mai o se mea masani le manao e toe foi i le aiga, ae o se taimi sa sili ona faigata. Sa lē tele ni galuega i Chile. Sa faigata le faatauina atu o lo matou fale. I tulaga tautupe ma le faatatau lelei, sa le o se mea sili ona manatu i ai e fai; e oo lava i o ma aiga sa manatu ua ma lē atamamai.
O le a lau mea e fai pe a feteenai faaaliga ma le faautautaga tatau? E ui ina sa faigata, ae sa ma iloa ma lo‘u toalua le mea e fai. Sa ma faamanatu ia i ma‘ua lava e faapea na fesoasoani le talalelei ma te oo mai i lenei mamao. A aunoa ma le Alii, semanu ou te lē maua le musumusuga na fesoasoani ia te au e auauna atu ai i se misiona, maua la’u aoga, ma feiloai i lo‘u toalua. Sa nao le tau lava ina ma faatuatuaina po o a lava mafuaaga, sa manaomia maua i Chile.
Sa ma tuua lo ma fale i lo ma epikopo ina ia faaaoga faamautotogi seia oo ina mafai ona ia faatauina atu, ma ma siitia ese ai. Sa faigata, ae sa ma oo i le tele o faamanuiaga ma vavega ina ua ma faalogo i le valaau a le Alii. E silafia e le Alii le mea o manaomia ai i tatou ma le mea e sili ona mafai ona tatou auauna atu ai i Ona faamoemoega, ma Na te faamanuiaina i tatou mo lo tatou usiusitai.
Mauaina o Vaifofō mai le Alii
Ou te faamoemoe o le a mulimuli le autalavou matutua i aso nei i le faataitaiga a le uso o Iareto. E ui ina sa iloa e sa Iareto e tatau ona latou malaga atu i le nuu folafolaina, ae sa latou lē mautinoa pe o le a faapefea ona latou taunuu iina. Ina ua “valaau atu ai [le uso o Iareto] i le suafa o le Alii” (Eteru 2:15), sa Ia ofoina atu ia te ia ni nai vaifofō. Sa ta‘u atu e le Alii ia te ia e fausia ni vaa ma tuu atu ia te ia le taitaiga i le auala e maua ai le ea mo i latou o loo i vaa.
Ona fetalai lea o le Alii i le uso o Iareto i lenei fesili: “O le a se mea tou te mananao ia ou faia ina ia outou maua se malamalama i totonu o o outou vaa?” (Eteru 2:23). Nai lo le ta‘u atu i le uso o Iareto le mea tonu lava e fai, sa fetalai le Alii ia te ia e alu e su’e lana lava vaifofo.
O le ala lena na galue ai lo‘u olaga. O nisi taimi e tuuina mai ai e le Alii ia te au ni faatonuga manino. O isi taimi e faatalitali mai ai o Ia mo a‘u ou te alu atu ia te Ia ma o’u lava manatu. Peitai, po o le a lava le ala, e taua lo‘u faaaofia ai o Ia i le faagasologa. O le anapogi, tatalo, ma le fefautuaai ma le Alii o ni laasaga talafeagai ia mo soo se tasi e taumafai e faia ni faaiuga e uiga i o latou olaga.
Mo soo se talavou matua o loo saili mo se faamoemoega faateleina, ou te tuuina atu le fautuaga lenei: Liliu atu i le Alii mo ni faaaliga patino. Faitau soo i lou faamanuiaga faapeteriaka. Ma ia naunau e ositaulaga mea e itiiti le taua i lou olaga pe afai e ta‘u atu e le Alii ia te oe e i ai Lona faamoemoega sili atu mo oe.
Ou te alofa i le Alii. O le talalelei o mea uma ia ia te au. Ou te iloa e silafia e le Alii ou gafatia ma e finagalo e fesoasoani ia te oe ia ausia lou faamoemoega paia.