“Ua Asiasi Atu Elder Ezra Taft Benson i le Au Paia i Polani,” Liahona, Sete. 2022.
Tala mai le Au Paia, Voluma 3
Ua Asiasi Atu Elder Ezra Taft Benson i le Au Paia i Polani
O le tofiaina ai e le Au Peresitene Sili, na vaaia ai e Elder Benson o le Korama a Aposetolo e Toasefululua taumafaiga laveai a le Ekalesia i Europa ina ua mavae le Taua Lona II a le Lalolagi. I le 11 masina o lona iai iina, sa ia malaga ai i le silia ma le 60,000 maila (96,000 km). I ona tua o loo i ai faatafunaga o Warsaw, Polani.
Ata pue mai faaaloaloga a le Potutusi o Talafaasolopito o le Ekalesia, Aai o Sate Leki
I se afiafi manaia o le Aso Sa i le taumafanafana o le 1946, sa tietie atu ai Ezra Taft Benson ma ni soa malaga se toalua i magaala filemu o Zelwagi, Polani. O auala lauleaga ma timuga mamafa na faigata mo le au malaga i le aso atoa, ae na iu lava ina lagi lelei ao latalata atu nei tamalii i lo latou taunuuga.
Sa avea muamua Zelwagi ma se vaega o Siamani ma sa lauiloa ai ia Selbongen. Peitai, sa suia tuaoi o le atunuu ina ua mavae le taua, ma o le tele o Europa tutotonu ma sasae na oo mai i lalo o le faatosinaga a le Soviet Union. I le 1929, na fausia ai e le Paranesi uluola o Selbongen le uluai falelotu o le Au Paia o Aso e Gata Ai i Siamani. Ae ina ua mavae le ono tausaga o taua, sa tau le mafai ona ola le Au Paia i le nuu.1
O le mea moni e faapea, o le i ai o Elder Benson i Polani sa pei lava o se vavega. Faatasi ai ma le leai o ni laina telefoni na ola i Polani, sa tauivi ai o ia ma ana paaga e faafesootai ia taitai o ē e mafai ona fesoasoani ia i latou e maua ni pepa e ulufale atu ai i le atunuu. O le mavae ai o le tele o tatalo ma fesootaiga faifai pea ma le malo o Polani na mafai ai e le aposetolo ona maua ia visa talafeagai.2
A o latalata atu le sipi i le falelotu tuai i Zelwagi, o le toatele o tagata i magaala sa taapeape solo ma lalafi. Sa faatu e Elder Benson ma ana soa le taavale i luma o le fale ma agai atu i fafo. Sa latou faailoa atu i latou lava i se tamaitai na latalata ane ma fesili atu pe ua latou mauaina le falesa o le Au Paia o Aso e Gata Ai. Sa faatumulia mata o le fafine i loimata o le mapusaga. “Ua i ai iinei le usoga!” sa ia alaga ai i le faaSiamani.
Sa vave ona o mai tagata mai tua o faitotoa na tapunipuni, na fetagisi ma taliē ma le olioli. Sa lei toe fesootai le Au Paia i Zelwagi ma taitai aoao o le Ekalesia mo le tolu tausaga, ma o lena taeao o le toatele o i latou sa anapopogi ma tatalo mo se asiasiga mai se faifeautalai po o se taitai o le Ekalesia. I totonu o ni nai itula, pe tusa ma le selau le Au Paia na potopoto e faalogologo i le saunoa atu a le aposetolo.
A o saunoa atu Elder Benson i le Au Paia, e toalua fitafita Polani faaauupegaina na ulu atu i le falesa. Sa faamalō tagata uma o le faapotopotoga i le fefefe, ae sa talotalo atu le aposetolo i fitafita e alala i se nofoa lata atu i le pito i luma o le potu. I lana lauga, sa ia faamamafaina ai le tāua o le saoloto ma le saolotoga. Sa faalogologo ma le toto‘a fitafita, ma nonofo i o la nofoa mo le pese faaiu, ma o ese atu e aunoa ma se faalavelave. Mulimuli ane, sa feiloai Elder Benson ma le peresitene o le paranesi ma tuua meaai ma tupe mo le Au Paia, ma faamautinoa atu isi fesoasoani sa agai mai.3
I se taimi puupuu mulimuli ane, sa tusi atu ai Elder Benson i le Au Peresitene Sili. Sa faamalosiauina o ia i le vaai atu i le oo atu o fesoasoani a le Ekalesia i le Au Paia i Europa ae sa popole i faigata na feagai pea ma le Au Paia.
“Atonu o le tele o faamanuiaga o le polokalama maoae o le uelefea a le Ekalesia ia i latou nei ma isi Au Paia i totonu o Europa o le a lē iloaina lava,” na ia tusia ai, “ae e tele olaga ua faasaoina ma le lē masalomia, ma ua matuā faamalosia ai le faatuatua ma le lototele o le toatele o o tatou tagata tuuto.”4
O tagata o le Ekalesia i Selbongen, Siamani (na toe faaigoaina o Zełwągi, Polani, ina ua mavae le taua), na faapotopoto i fafo atu o le latou falesa pe tusa o le 1930.