“Faamaonia E Tou Te Aiga,” Liahona, Sete. 2022.
O Leo o le Au Paia o Aso e Gata Ai
Faamaonia E Tou Te Aiga
Sa ou manatu sa fesili mai le Alii e fai mea e lē mafaia, ae sa ou sesē.
Sa nonofo lo‘u tuaoi matua ma lana tama tama i ni nai fale mautotogi i lalo mai o lo’u aiga. Sa oo ina pele o ia ia i matou. Ina ua maliu lana tama tama, sa ma’i o ia ma sa faataotolia i lona moega. Sa matou tausia o ia seia oo ina maliu i le tolu masina mulimuli ane.
Ina ua mavae o la maliliu, sa ou manao e faatino sauniga o le malumalu mo lenei aiga. Ae ona matou te lē aiga, sa lē o se filifiliga lena. I se tasi aso na oo mai ai se manatu manino i lo‘u mafaufau: “Faamaonia e tou te aiga, ona mafai lea ona e faia galuega o le malumalu mo i laua.”1 Sa ou manatu sa fesili mai le Alii e fai mea e lē mafai ona fai, ae sa oo mai pea le upu faamaonia i lo‘u mafaufau.
Sa amata ona liliu e tauaiga o lo’u tuaoi le pule o lona fale mautotogi, ae sa leai ni a latou faamaumauga e faamaonia ai lo latou sootaga, e ui foi ina ua uma ona matou sailia faamaumauga a le malo.
Sa ta‘u mai e le Agaga ia te au o loo i ai se mea na misi ia i matou. Faatasi ai ma le maliega mai nei tauaiga, sa ou sailia ai lona fale mautotogi mo ni pepa o faamatalaga. I se tulimanu o le fale mautotogi sa ou maua ai ni ato tūtumu i pepa tuai. Sa ou maua se lagona e tāua nei ato.
Sa ou sue i totonu o ato e lua ona amata sue lea o le lona tolu. Sa toeitiiti lava a oo la’u sue i le pito i lalo o le ato ae ou tau loa i le faavaa o se api. I totonu o le taga o le faavaa o le api, sa ou maua ai ni tusi faamaonia taua se lima: o le pepa fanau o lo’u tinā tuaoi lea, pepa maliu ma le pepa faaipoipo o lona tinā, pepa maliu o lona tinā matua, ma le pepa faamaonia o le falelauasiga o lona tamā.
Ina ua matou iloiloina ma tauaiga a lo matou tuaoi ia pepa o faamatalaga, e lua upu na tulaga ese mai ia te au: “Itumālo o Vagaysky,” i Siberia i sisifo. Na faafuasei lava ona ou lagonaina e tatau ona ou tilotilo i la‘u lava gafa o le aiga. Ina ua ou faia, sa ou iloa ai na faaali mai Vagaysky i luga o lālā mamao o le gafa o lo’u tamā. O nisi o sailiiliga na faaalia ai o ma‘ua ma lo’u tuaoi ua maliu e aiga!
E lei manaomia e le Alii mea faigata mai ia te au. E lē mafai ona ou faamatala atu lo‘u olioli i le iloa ai o lo’u tuaoi o se vaega o lo‘u aiga. O lenei sootaga o le a mafai ai ona ou mautinoa e faatinoina ona sauniga o le malumalu i le lumanai.
E alofa le Alii i Ana fanau. Sa Ia saunia le ata o le faaolataga mo tagata uma, e aofia ai lo‘u tuaoi ma lana tama tama.