ទ្រង់នឹងមានព្រះជន្មរស់ឡើងវិញ ដោយអំណាចប្រោសឲ្យជានៅក្នុងស្លាបទ្រង់ ៖
យើងខ្ញុំវិសេសលើសជាងអ្នកដែលមានជ័យជម្នះ
ព្រះយេស៊ូវបានយកឈ្នះការរំលោភបំពាននៃលោកិយនេះ ដើម្បីប្រទានអំណាចដល់បងប្អូន មិនគ្រាន់តែឲ្យ រួចជីវិតប៉ុណ្ណោះទេ ប៉ុន្តែដើម្បីយកឈ្នះ និង មានជ័យជម្នះ តាមរយៈទ្រង់នៅថ្ងៃមួយ ។
ម៉ារីន ខ្ញុំជាអែលឌើរ ហូឡិន ហើយអ្វីៗហៀបនឹងធ្លាក់ចុះក្រោម ។
យើងខ្ញុំវិសេសលើសជាងអ្នកដែលមានជ័យជម្នះ
យើងគ្រប់គ្នាចាប់អារម្មណ៍លើរឿងរ៉ាវដែលបានរួចជីវិតពីគ្រោះថ្នាក់នានា ។ យើងស្តាប់ឮរឿងនិទានពីអ្នករុករកដ៏ក្លាហាន និងមនុស្សសាមញ្ញដូចគ្នា ចេះគ្រប់គ្រងស្ថានការដើម្បីការពារជីវិតខ្លួន ហើយនៅក្នុងកាលៈទេសៈដ៏រន្ធត់ដែលមិនអាចធ្វើអ្វីបាន ប៉ុន្តែគ្រាន់តែសួរខ្លួនឯងថា « តើខ្ញុំអាចធ្វើរឿងបែបនោះបានដែរឬទេ ? »
ខ្ញុំគិតភ្លាមៗអំពីអ្នករុករកជនជាតិអង់គ្លេសឈ្មោះ Ernest Shackleton និងនាវិកនៃកប៉ាល់របស់គាត់ HMS Endurance, ដែលបានលិចនៅក្នុងសមុទ្រទឹកកកអង់តាក់ទិក ហើយបន្ទាប់មកបានជាប់គាំងនៅលើវាលសមុទ្រទឹកកកនោះអស់រយៈពេលជិតពីរឆ្នាំ ។ ទោះបីជាមានលក្ខខណ្ឌដ៏អាក្រក់បំផុតក៏ដោយ ការដឹកនាំដ៏វិសេសវិសាលរបស់ Shackleton និងការដោះស្រាយបានជួយសង្គ្រោះជីវិតបុរសទាំងឡាយរបស់គាត់ ។
បន្ទាប់មកខ្ញុំគិតអំពីក្រុមអវកាសយានិក អាប៉ូឡូ ១៣ ដែលត្រូវទៅចុះចតនៅឋានព្រះច័ន្ទ ! ប៉ុន្តែមានមហន្តរាយបានកើតឡើង ធុងអ៊ុកស៊ីហ្សែនបានផ្ទុះ បេសកកម្មនោះត្រូវលុបចោល ។ ដោយខ្វះអុកស៊ីសែន ក្រុមអវកាសយានិក និងក្រុមអ្នកគ្រប់គ្រងបេសកកម្មនៅលើផែនដីបានបង្កើតការច្នៃប្រឌិតយ៉ាងប៉ិនប្រសប់ ដើម្បីនាំអវកាសយានិកទាំងបីនាក់មកកាន់ផែនដីវិញដោយសុវត្ថិភាព ។
ខ្ញុំស្ងើចសសើរដល់ការរួចជីវិតពីគ្រោះថ្នាក់ដ៏រន្ធត់នៃបុគ្គល និងក្រុមគ្រួសារទាំងឡាយ ដែលបានរងគ្រោះដោយសង្គ្រាម ជាប់ឃុំនៅក្នុងជំរុំ និងអស់អ្នកដែលក្លាយជាជនភៀសខ្លួន អ្នកដែលក្លាយជាវីរជន និងក្លាហានដែលរក្សាភ្លើងនៃក្ដីសង្ឃឹមក្នុងដួងចិត្តជនរងគ្រោះ ជាអ្នកដែលផ្តល់សេចក្តីល្អទល់នឹងភាពឃោរឃៅ ហើយជាអ្នកដែលជួយដល់អ្នកផ្សេងឲ្យតស៊ូរស់បានមួយថ្ងៃបន្តទៀត ។
តើបងប្អូន ឬខ្ញុំអាចរួចជីវិតពីស្ថានភាពណាមួយនៃស្ថានភាពដ៏ធ្ងន់ធ្ងរទាំងនេះបានដែរឬទេ ?
ទោះជាយ៉ាងណា បងប្អូនមួយចំនួនប្រហែលជាគិតអំពីដំណើររឿងរបស់អ្នករួចជីវិតពីគ្រោះថ្នាក់ទាំងឡាយ ហើយបានដឹងថា បងប្អូនកំពុងតែរស់នៅក្នុងស្ថានភាពរួចជីវិតពីគ្រោះថ្នាក់មួយដែរ ឥឡូវនេះក្នុងនាមជាជនរងគ្រោះនៃការរំលោភបំពាន ការមិនយកចិត្តទុកដាក់ ការគំរាមកំហែង អំពើហឹង្សាក្នុងគ្រួសារ ឬការរងទុក្ខប្រភេទនេះ ។ បងប្អូនកំពុងប្រឈមនឹងការព្យាយាមអស់ពីសមត្ថភាព ដើម្បីរួចជីវិតពីស្ថានភាពមួយ ដែលមានអារម្មណ៍ដូចគ្នាខ្លាំងទៅនឹងកប៉ាល់ខូចយ៉ាងធ្ងន់ធ្ងរ ឬបេសកកម្មដ៏មានសង្ឃឹមមួយត្រូវលុបចោលភ្លាមៗ ។ តើបងប្អូននឹងត្រូវបានសង្គ្រោះដែរឬទេ ហើយ តើបងប្អូននឹងធ្វើឲ្យខ្លួនឯងរួចជីវិត ពីរឿងរ៉ាវគ្រោះថា្នក់ដែលបងប្អូនឆ្លងកាត់បានដែរឬទេ ?
ចម្លើយគឺ បាន ។ បងប្អូនអាចរួចជីវិតបាន ។ បងប្អូនត្រូវបានជួយឲ្យរួចជីវិតមកហើយ បងប្អូនត្រូវបានសង្គ្រោះរួចមកហើយ—ដោយព្រះមួយអង្គ ដែលបានរងទារុណកម្មដ៏ឈឺចាប់ជំនួសបងប្អូនកំពុងរងទុក្ខ ហើយបានស៊ូទ្រាំនឹងទុក្ខវេទនាជំនួសបងប្អូនកំពុងស៊ូទ្រាំ ។ ១ ព្រះយេស៊ូវបានយកឈ្នះលើការរំលោភបំពាននៃលោកិយនេះ២ដើម្បីប្រទានអំណាចដល់បងប្អូន មិនគ្រាន់តែឲ្យ រួចជីវិតប៉ុណ្ណោះទេ ប៉ុន្តែដើម្បីយកឈ្នះ និង មានជ័យជម្នះតាមរយៈទ្រង់នៅថ្ងៃមួយ—ដើម្បីងើបចេញពីភាពឈឺចាប់ សេចក្ដីវេទនា ទុក្ខព្រួយ ហើយឃើញថាវាត្រូវបានជំនួសដោយភាពសុខសាន្តវិញ ។
សាវកប៉ុលសួរថា ៖
« តើអ្នកណានឹងពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបាន តើសេចក្តីទុក្ខលំបាក ឬសេចក្តីវេទនា សេចក្តីបៀតបៀន សេចក្តីអត់ឃ្លាន សេចក្តីអាក្រាត សេចក្តីអន្តរាយ ឬដាវឬអី ? …
« ទេ គឺក្នុង សេចក្តីទាំងនោះ យើងខ្ញុំ វិសេសលើសជាងអ្នកដែលមានជ័យជម្នះដោយសារព្រះអង្គដែលទ្រង់ស្រឡាញ់យើង » ។៣
ការសន្យាចំពោះសេចក្ដីសញ្ញាអ៊ីស្រាអែល
បងប្អូននឹងចងចាំពេលដែល ប្រធាន រ័សុល អិម ណិលសុន បានចេញការអញ្ជើញនៅក្នុងសន្និសីទទូទៅដូចតទៅនេះ ។ លោកបានមានប្រសាសន៍ថា ៖ « នៅពេលបងបញអូនសិក្សាព្រះគម្ពីរ … ខ្ញុំសូមលើកទឹកចិត្តបងប្អូនឲ្យធ្វើបញ្ជីមួយពីអ្វីៗទាំងអស់ដែលព្រះអម្ចាស់បានសន្យាថា ទ្រង់នឹងធ្វើសម្រាប់សេចក្តីសញ្ញាអ៊ីស្រាអែល ។ ខ្ញុំគិតថាបងប្អូននឹងភ្ញាក់ផ្អើល ! » ៤
នេះគ្រាន់តែជាការសន្យាដ៏មានអានុភាព និងលួងលោមមួយចំនួន ដែលគ្រួសារខ្ញុំបានរកឃើញ ។ សូមស្រមៃថា ព្រះអម្ចាស់កំពុងមានព្រះបន្ទូលទាំងអស់នេះទៅកាន់បងប្អូន—ទៅកាន់ បងប្អូន ដែលកំពុងតែរួចជីវិត—ពីព្រោះវា គឺ សម្រាប់បងប្អូន ៖
កុំឲ្យភ័យខ្លាចឡើយ ។៥
យើងស្គាល់សេចក្តីទុក្ខព្រួយរបស់ពួកអ្នក ដូច្នេះយើងបានចុះមក ដើម្បីនឹងជួយដោះពួកអ្នកឲ្យរួច ។៦
យើងនឹងមិនដែលលះបង់ចោលពួកអ្នកឡើយ ។៧
ព្រះនាមរបស់យើងនៅក្នុងពួកអ្នក ហើយពួកទេវតារបស់យើងថែរក្សាពួកអ្នក ។៨
យើងនឹងធ្វើការអស្ចារ្យនៅក្នុងពួកអ្នក ។៩
ចូរដើរជាមួយយើង រៀនអំពីយើង យើងនឹងឲ្យអ្នករាល់គ្នាឈប់សម្រាក ។១០
យើងនៅកណ្ដាលពួកអ្នក ។១១
ឯងជារបស់ផងយើង ។១២
ចំពោះអស់អ្នកដែលកំពុងតែខំប្រឹងឲ្យបានរួចជីវិតពីគ្រោះថ្នាក់
ជាមួយនឹងការអះអាងទាំងនោះនៅក្នុងចិត្ត ខ្ញុំចង់និយាយដោយផ្ទាល់ ទៅកាន់អស់បងប្អូនដែលមានអារម្មណ៍ថាដូចជាគ្មានច្រកចេញសម្រាប់រឿងរ៉ាវឲ្យរួចជីវិតពីគ្រោះថ្នាក់របស់ពួកគេផ្ទាល់ ដោយសារការប៉ះទង្គិចផ្លូវចិត្តមកពីសកម្មភាពដ៏ឃោរឃៅរបស់មនុស្សផ្សេងទៀត ។ ប្រសិនបើនេះជារឿងរ៉ាវដែលបានរួចជីវិតពីគ្រោះថ្នាក់របស់បងប្អូន យើងទួញយំជាមួយបងប្អូន ។ យើងចង់ឲ្យបងប្អូនយកឈ្នះការភាន់ច្រឡំ ភាពអាម៉ាស់ និងភាពភ័យខ្លាចយើងពិតជាចង់យ៉ាងខ្លាំង ហើយតាមរយៈព្រះយេស៊ូវគ្រីស្ទ យើងចង់ឲ្យបងប្អូន មានជ័យជម្នះ
ពីជនរងគ្រោះទៅជាអ្នករួចជីវិត ពីអ្នករួចជីវិតទៅជាអ្នកមានជ័យជម្នះ
ប្រសិនបើបងប្អូនបានជួបនឹងការរំលោភបំពាន អំពើហឹង្សា ឬការគៀបសង្កត់បែបណាក៏ដោយ បងប្អូនអាចនឹងមានគំនិតថា ព្រឹត្តិការណ៍ទាំងនេះជាកំហុសរបស់បងប្អូន ហើយថាបងប្អូនសមនឹងរែកពុនភាពអាម៉ាស់ និងអារម្មណ៍ខុសឆ្គងនោះ ។ បងប្អូនអាចនឹងមានគំនិតដូចជា ៖
-
ខ្ញុំអាចការពារវាបាន ។
-
ព្រះមិនស្រឡាញ់ខ្ញុំទៀតទេ ។
-
គ្មាននរណាម្នាក់ស្រឡាញ់ខ្ញុំទៀតទេ ។
-
ខ្ញុំកែលែងឡើងហើយ ។
-
ដង្វាយធួនរបស់ព្រះអង្គសង្គ្រោះមានសម្រាប់អ្នកផ្សេង ប៉ុន្តែមិនមែនសម្រាប់ខ្ញុំទេ ។
គំនិត និងអារម្មណ៍ដ៏ខុសឆ្គងទាំងនេះ អាចជាការរារាំងពីការស្វែងរកជំនួយពីគ្រួសារ មិត្តភក្ដិ ថ្នាក់ដឹកនាំ ឬអ្នកជំនាញ ហេតុដូច្នេះបងប្អូនបានប្រយុទ្ធទប់ទល់តែម្នាក់ឯង ។ បើបងប្អូនបានស្វែងរកជំនួយពីមនុស្សដែលបងប្អូនទុកចិត្តរួចហើយ បងប្អូនអាចនៅតែមានគំនិតនៃការខ្មាស់អៀន និងសូម្បីតែស្អប់ខ្ពើមខ្លួនឯងផង ។ ការប៉ះទង្គិចមកពីព្រឹត្តិការណ៍ទាំងនេះអាចដិតជាប់អស់រយៈពេលជាច្រើនឆ្នាំ ។ បងប្អូនសង្ឃឹមថា ថ្ងៃណាមួយ បងប្អូននឹងមានអារម្មណ៍ប្រសើរឡើង ប៉ុន្តែ យ៉ាងណាមិញ ថ្ងៃនោះមិនទាន់មកដល់ទេ ។
ការរំលោភបំពានមិនបានជា មិនមែនជា ហើយនឹងមិនដែលជាកំហុសរបស់បងប្អូនឡើយ មិនថាអ្នកប្រព្រឹត្ត ឬអ្នកផ្សេងអាចនិយាយផ្ទុយពីនោះក៏ដោយ ។ នៅពេលដែលបងប្អូនធ្លាប់ជាជនរងគ្រោះដោយសារភាពឃោរឃៅ ការស្មន់ ឬអំពើខុសឆ្គងណាមួយ នោះបងប្អូនមិនមែនជាមនុស្សដែលត្រូវការការប្រែចិត្តនោះទេ បងប្អូនមិនមែនជាអ្នកទទួលខុសត្រូវនោះទេ ។
បងប្អូនមិនមែនមានភាពស័ក្ដិសមតិចជាង ឬមានតម្លៃតិចជាង ឬទទួលសេចក្ដីស្រឡាញ់តិចជាង ក្នុងនាមជាមនុស្សម្នាក់ ឬក្នុងនាមជាកូនម្នាក់របស់ព្រះ ដោយសារតែអ្វីដែលមនុស្សម្នាក់ផ្សេងទៀតបានបំពានចំពោះបងប្អូននោះឡើយ ។
ឥឡូវនេះព្រះអម្ចាស់មិនទតមើលបងប្អូន ហើយក៏មិនដែលធ្លាប់បានទតមើលបងប្អូនថាជាមនុស្សម្នាក់ដែលត្រូវមើលងាយនោះទេ ។ មិនថាមានអ្វីបានកើតឡើងចំពោះបងប្អូននោះទេ ទ្រង់ មិនមានភាពអាម៉ាស់ ឬខកចិត្តដោយសារបងប្អូនឡើយ ។ ទ្រង់ស្រឡាញ់បងប្អូន នៅក្នុងរបៀបមួយដែលបងប្អូនមិនទាន់បានដឹងនៅឡើយ ។ ហើយបងប្អូន នឹង ដឹងពីរបៀបនោះ កាលដែលបងប្អូនដាក់ទីទុកចិត្តលើការសន្យារបស់ទ្រង់ និងកាលដែលបងប្អូនរៀនជឿលើទ្រង់ ពេលទ្រង់មានព្រះបន្ទូលថា បងប្អូនមាន « តម្លៃវិសេស នៅភ្នែក [ ទ្រង់ ] » ។១៣
បងប្អូនមិនត្រូវបានកំណត់ដោយសារតែរឿងរ៉ាវអាក្រក់ៗទាំងនេះ ដែលគេធ្វើចំពោះបងប្អូននោះទេ ។ នៅក្នុងសេចក្ដីពិតដ៏រុងរឿង បងប្អូនត្រូវបានកំណត់ដោយអត្តសញ្ញាណដែលមាននៅអស់កល្បជានិច្ចរបស់បងប្អូន ជាបុត្រម្នាក់របស់ព្រះ ហើយដោយសេចក្ដីស្រលាញ់ និងការអញ្ជើញដ៏ឥតខ្ចោះ និងនិរន្តរ៍របស់អង្គបង្កបង្កើតរបស់បងប្អូន ឲ្យមកទទួលការព្យាបាលទាំងស្រុង និងពេញលេញ ។
ទោះបីហាក់ដូចជាមិនអាចធ្វើទៅរួច ធ្វើមិនបានក្ដី ក៏ការព្យាបាល អាច បានមកតាមរយៈអព្ភូតហេតុ នៃអំណាចប្រោសលោះនៃដង្វាយធួនរបស់ព្រះយេស៊ូវគ្រីស្ទ ដែលមានព្រះជន្មរស់ឡើងវិញ « មានទាំងអំណាចប្រោសឲ្យជា នៅក្នុងចំអេងស្លាប » ។១៤
ព្រះអង្គសង្គ្រោះប្រកបដោយសេចក្ដីមេត្តាករុណារបស់យើង ដែលទ្រង់មានជ័យជម្នះលើភាពងងឹត និងភាពពុករលួយ មានព្រះចេស្ដាដើម្បីកែកំហុស ទាំងអស់ជាសេចក្ដីពិតដែលផ្ដល់ដល់ជីវិតសម្រាប់អស់អ្នកទាំងឡាយដែលត្រូវអ្នកដទៃបំពានលើ ។ ១៥
សូមដឹងថា ព្រះអង្គសង្គ្រោះបានយាងចុះមកក្រោមអ្វី ទាំងអស់ ទ្រង់ជ្រាបដឹងទោះជាមានអ្វីបានកើតឡើងចំពោះបងប្អូនក៏ដោយ ។ ដោយហេតុនេះហើយទើបទ្រង់ជ្រាបច្បាស់ពីអារម្មណ៍ភ័យខ្លាច ការអាម៉ាស់និងអារម្មណ៍ខូចខាតដែលត្រូវគេបោះបង់ចោល ។១៦ ដោយជម្រៅនៃការរងទុក្ខដ៏ធួនរបស់ទ្រង់ នោះព្រះអង្គសង្គ្រោះផ្តល់ក្តីសង្ឃឹមចំពោះអ្នកដែលគិតថា បានបាត់បង់ជារៀងរហូត និងផ្តល់កម្លាំងដល់អ្នកដែលគិតថាគ្មានកម្លាំង ហើយការព្យាបាលដល់អ្នកដែលគិតថាមិនអាចជា ។
ឥរិយាបថបំពានត្រូវបានថ្កោលទោសយ៉ាងច្បាស់លាស់ ដោយព្រះអម្ចាស់ និងដោយព្យាការីរបស់ទ្រង់
មិនមានកន្លែងសម្រាប់ការរំលោភបំពានទេ—ទាំងផ្លូវកាយ ផ្លូវភេទ អារម្មណ៍ ឬពាក្យសម្ដី—នៅក្នុងគេហដ្ឋាន ប្រទេស ឬវប្បធម៌ណាមួយឡើយ ។ ពុំមានអ្វីដែលភរិយា កូន ឬស្វាមីអាចធ្វើ ឬនិយាយ ដែលធ្វើឲ្យពួកគេ « សមនឹងទទួល » ការវាយដំនោះឡើយ ។ គ្មាននរណាម្នាក់ នៅក្នុងប្រទេស ឬវប្បធម៌ណាមួយ ធ្លាប់ « ស្នើសុំ » ការបំពាន ឬអំពើហឹង្សាពីនរណាម្នាក់ផ្សេងទៀតដែលមានសិទ្ធិអំណាច ឬដោយនរណាម្នាក់ដែលធំជាង និងរឹងមាំជាងនោះទេ ។
អស់អ្នកដែលធ្វើការរំលោភបំពាន ឬដែលព្យាយាមលាក់បាំងអំពើបាបដ៏កាចសាហាវរបស់ពួកគេ អាចចៀសវាងពីវាបានតែមួយរយៈប៉ុណ្ណោះ ។ ប៉ុន្តែព្រះអម្ចាស់ដែលទតឃើញការណ៍គ្រប់ទាំងអស់ ជ្រាបដឹងពីទង្វើ និងគំនិត ព្រមទាំងបំណងនៅក្នុងដួងចិត្តទាំងនោះ ។១៧ ទ្រង់ជាព្រះនៃសេចក្ដីយុត្តិធម៌ ហើយទ្រង់នឹងប្រើសេចក្ដីយុត្តិធម៌ដ៏ទេវភាពរបស់ទ្រង់ដល់អស់អ្នកដែលធ្វើអំពើបាប ។១៨
ប្រកបដោយអព្ភូតហេតុ នោះព្រះអម្ចាស់ក៏ជាព្រះនៃសេចក្ដីមេត្តាករុណាចំពោះអ្នកដែលប្រែចិត្តយ៉ាងពិតប្រាកដផងដែរ ។ ពួកអ្នកបំពាន—រួមទាំងពួកអ្នកដែលធ្លាប់រំលោភបំពានលើខ្លួនឯងដែរ—ដែលសារភាព លះបង់អំពើបាបរបស់ពួកគេ ហើយធ្វើអ្វីៗ ទាំងអស់ នៅក្នុងអំណាចរបស់ខ្លួន ដើម្បីទូទាត់ និងផ្ដល់សំណងវិញ មានសិទ្ធិទទួលបានការអត់ទោសតាមរយៈអព្ភូតហេតុនៃដង្វាយធួនរបស់ព្រះគ្រីស្ទ ។
ចំពោះអ្នកដែលត្រូវបានគេចោទប្រកាន់ទាំងបំពាន ទម្ងន់នៃការចោទប្រកាន់នេះគឺមិនអាចថ្លែងបានទេ ហើយវានាំឲ្យមានការឈឺចាប់យ៉ាងធ្ងន់ធ្ងរ ។ ប៉ុន្តែពួកគេក៏ត្រូវបានប្រទានពរ ដោយសារការរងទុក្ខជំនួសរបស់ព្រះអង្គសង្គ្រោះសម្រាប់ពួកគេ និងចំណេះដឹងដែលទីបំផុតសេចក្តីពិតនឹងឈ្នះ ។
ប៉ុន្តែអ្នកបំពានគេដែលមិនប្រែចិត្ត នឹងឈរនៅចំពោះព្រះអម្ចាស់ ដើម្បីទទួលខុសត្រូវចំពោះឧក្រិដ្ឋកម្មដ៏សាហាវយង់ឃ្នងរបស់ពួកគេ ។
ព្រះអម្ចាស់ផ្ទាល់មានភាពច្បាស់លាស់ណាស់ នៅក្នុងការថ្កោលទោសរបស់ទ្រង់ចំពោះការរំលោភបំពានគ្រប់ប្រភេទ ៖ « ប៉ុន្តែ បើអ្នកណាធ្វើឲ្យកូនតូចណាមួយនេះ ដែលជឿដល់ខ្ញុំ រវាតចិត្តចេញ នោះស៊ូឲ្យគេយកថ្មត្បាល់កិនយ៉ាងធំចងកអ្នកនោះ ហើយពន្លង់ទៅក្នុងសមុទ្រទីជ្រៅវិញ ធ្វើយ៉ាងនោះនឹងមានប្រយោជន៍ដល់អ្នកនោះជាជាង » ។១៩
សេចក្ដីបញ្ចប់
មិត្តជាទីស្រឡាញ់ ដែលបានរងរបួសយ៉ាងធ្ងន់ធ្ងរ —ហើយចំពោះបញ្ហានោះ អ្នកណាក៏ដោយដែលបានទទួលភាពអយុត្តិធម៌ក្នុងជីវិត—បងប្អូនអាចមានការចាប់ផ្ដើមថ្មី ។ នៅក្នុងសួនច្បារគែតសេម៉ានី និងនៅលើភ្នំលលាដ៏ក្បាល ព្រះយេស៊ូវ « បានលើកដាក់មកលើអង្គទ្រង់នូវ … រាល់ ការបារម្ភ និងរាល់ការរងទុក្ខដែលបងប្អូន និងខ្ញុំ … បានដកពិសោធន៍ »២០ហើយទ្រង់បានយកឈ្នះលើវាទាំងអស់ ! ដោយលាតព្រះហស្ដ ព្រះអង្គសង្គ្រោះផ្តល់អំណោយទាននៃការព្យាបាលដល់បងប្អូន ។ ដោយភាពក្លាហាន ការអត់ធ្មត់ និងការផ្តោតចិត្តដ៏ស្មោះត្រង់លើទ្រង់ មិនយូរប៉ុន្មានទេ បងប្អូនអាចទទួលយកអំណោយនេះយ៉ាងពេញលេញ ។ បងប្អូនអាចលះបង់ការឈឺចាប់របស់បងប្អូន ហើយទុកវានៅព្រះបាទទ្រង់ ។
ព្រះអង្គសង្គ្រោះដ៏ទន់ភ្លន់របស់បងប្អូនបានប្រកាសថា « ឯចោរ វាមកប្រយោជន៍តែនឹងលួច សម្លាប់ ហើយបំផ្លាញប៉ុណ្ណោះ តែឯខ្ញុំវិញ ខ្ញុំបានមក ដើម្បីឲ្យ [ អ្នក ] រាល់គ្នាមានជីវិត ហើយឲ្យ [ អ្នក ] មានជីវិតនោះពេញបរិបូរផង » ។២១ បងប្អូនជាអ្នករួចជីវិត បងប្អូនអាចបានជា ហើយបងប្អូនអាចទុកចិត្តថា បងប្អូននឹងឈ្នះ និងមានជ័យជម្នះ តាមរយៈព្រះចេស្ដា និងព្រះគុណរបស់ព្រះយេស៊ូវគ្រីស្ទ ។
ព្រះយេស៊ូវមានជំនាញខាង ធ្វើឲ្យគ្រប់យ៉ាងអាចដំណើរការទៅបាន ។ ទ្រង់បានយាងមកទីនេះ ដើម្បីធ្វើឲ្យអ្វីដែលមិនអាចទៅរួច អាចទៅរួច សម្រេចសេចក្តីប្រោសលោះដែលមិនអាចប្រោសលោះបាន ដើម្បីប្រោសជនដែលមិនបានប្រោសឲ្យជា កែអ្វី ដែលមិនត្រឹមត្រូវឲ្យត្រឹមត្រូវ ដើម្បីសន្យាដល់បុគ្គលដែលមិនអាចសន្យាបាន ។២២ ហើយទ្រង់ធ្វើវាបានល្អណាស់ ។ តាមពិតទៅ ទ្រង់ធ្វើវាបានល្អឥតខ្ចោះ ។ នៅក្នុងព្រះនាមនៃព្រះយេស៊ូវគ្រីស្ទ ជាអង្គព្យាបាលរបស់យើង អាម៉ែន ៕
សម្រាប់ព័ត៌មាន និងធនធានបន្ថែម សូមមើល « Abuse » នៅលើគេហទំព័រ ChurchofJesusChrist.org និងនៅក្នុងកម្មវិធី Gospel Library ។