« ជេ អាណែត ដេននីស » លីអាហូណា ខែ ឧសភា ឆ្នាំ ២០២២ ។
ជេ អាណែត ដេននីស
ទីប្រឹក្សាទីមួយនៅក្នុងគណៈប្រធានសមាគមសង្គ្រោះទូទៅ
បន្ទាប់ពីបានចំណាយពេលកុមារភាពរបស់គាត់នៅកន្លែងផ្សេងៗគ្នាទូទាំងសហរដ្ឋអាមេរិក ស៊ីស្ទើរ ជេននី អាណែត ដេននីស បានគិតថាសុបិនរបស់គាត់បានក្លាយជាការពិត នៅពេលដែលគ្រួសាររបស់គាត់បានផ្លាស់ទៅរស់នៅទីក្រុង ខាតុនវូដ ហៃតស៍ រដ្ឋ យូថាហ៍ ។
គាត់បានមានប្រសាសន៍ថា « ខ្ញុំគិតថាមនុស្សគ្រប់គ្នានៅយូថាហ៍គឺជាសមាជិកនៃសាសនាចក្រ ហើយថានៅយូថាហ៍ដូចជាស្ថានសួគ៌ដូច្នោះដែរ » ។
ក្នុងអំឡុងពីរបីថ្ងៃដំបូងរបស់គាត់នៅថ្នាក់ទីប្រាំបួន គាត់រំភើបដែលត្រូវបានអញ្ជើញឲ្យចូលរួមក្នុងពិធីជប់លៀងមួយ ។ ប៉ុន្តែក្មេងស្រីម្នាក់ដែលបានក្លាយជាមិត្តជិតស្និទ្ធរបស់គាត់បានព្រមានគាត់ថា មនុស្សដែលនៅក្នុងពិធីជប់លៀងនោះនឹងប្រើគ្រឿងញៀន ។
គាត់បាននិយាយថា « ខ្ញុំបានដឹងភ្លាមៗថា អារក្សមាននៅគ្រប់ទីកន្លែង » ។ ទោះជាយ៉ាងណាក្តី ទីបន្ទាល់របស់គាត់ និងគេហដ្ឋានដែលផ្តោតលើដំណឹងល្អ បានធ្វើឲ្យគាត់រឹងមាំរហូតដល់រៀនចប់វិទ្យាល័យ ។
បានកើតនៅទីក្រុង ប្រូវូ រដ្ឋ យូថាហ៍នៅខែ មិថុនា ឆ្នាំ ១៩៦០ ស៊ីស្ទើរ ជេននី អាណែត ហឺរីន គឺជាកូនច្បងរបស់លោក ខឺធីស ឡាម័រ និងលោកស្រី ផាទ្រីក ចូអាន ហឺរីន ដែលមានកូនប្រាំពីរនាក់ ។ ការងាររបស់ឪពុកគាត់បាននាំឲ្យគ្រួសារនេះទៅកាន់រដ្ឋមីស៊ីស៊ីពី រដ្ឋថេនណេស៊ី រដ្ឋអៃអូវ៉ា រដ្ឋនេប្រាស្កា និងរដ្ឋយូថាហ៍ ។
គាត់បានសិក្សាគរុកោសល្យថ្នាក់បឋមសិក្សានៅឯសាកលវិទ្យាល័យព្រិកហាំ យ៉ង់ និងបន្តការសិក្សាភាសាអេស្ប៉ាញបន្តិចបន្តួច ។ នៅអំឡុងដំណើរទស្សនកិច្ចសិក្សាទៅកាន់ប្រទេសម៉ិកស៊ិក គាត់បានជួបនឹង លោក ជ័ហ្គ ដេននីស ហើយពួកលោកទាំងពីរនាក់បានចាប់ផ្តើមទាក់ទងគ្នា ។
នៅពេលលោកបានទៅរស់នៅទីក្រុង សលត៍ លេក នៅមួយឆ្នាំក្រោយមកដើម្បីសិក្សាភាសាអង់គ្លេស ពួកលោកក៏បានចាប់ផ្តើមធ្វើការដើរលេងជាគូ ។ ក្នុងរយៈពេលពីរបីខែពួកលោកបានភ្ជាប់ពាក្យ ។ ពួកលោកបានរៀបការនៅព្រះវិហារបរិសុទ្ធសលត៍ លេក នៅថ្ងៃទី ៤ ខែ កញ្ញា ឆ្នាំ ១៩៨០ ។ ពួកលោកមានកូនបួននាក់ និងចៅប្រាំបួននាក់ ។ ពួកលោករស់នៅទីក្រុងបោនទីហ្វុល រដ្ឋយូថាហ៍ ។
ស៊ីស្ទើរ ដេននីស បានគាំទ្រនៅខែ មេសា នឹងចាប់ផ្តើមការបម្រើជាទីប្រឹក្សាទីមួយនៅក្នុងគណៈប្រធានសមាគមសង្រ្គោះទូទៅនៅថ្ងៃទី ១ ខែ សីហា ។ គាត់បម្រើនៅក្រុមប្រឹក្សាយោបល់ទូទៅរបស់អង្គការបឋមសិក្សា និងជាមួយស្វាមីរបស់គាត់នៅក្នុងក្រុមប្រឹក្សាទំនាក់ទំនង ដេវីសខោនធី ។
ចាប់តាំងពីឆ្នាំ ២០១៣ ដល់ឆ្នាំ ២០១៦ គាត់បានបម្រើជាមួយស្វាមីរបស់គាត់ កាលដែលស្វាមីរបស់គាត់ធ្វើជាអធិបតីនៅបេសកកម្មហ្គូយ៉ាហ្គីល អេក្វាឌ័រ ភាគខាងលិច ។ គាត់ក៏បានបម្រើការជាជំនួយការរបស់ភរិយាប្រធានព្រះវិហារ ហ្គូយ៉ាហ្គីល អេក្វាឌ័រ ជាលេខាសមាគមសង្គ្រោះស្តេក ជាប្រធានអង្គការបឋមសិក្សាវួដ ជាទីប្រឹក្សាក្នុងគណៈប្រធានសមាគមសង្គ្រោះវួដ និងជាទីប្រឹក្សាក្នុងគណៈប្រធានក្រុមយុវនារី ជាគ្រូបង្រៀនសមាគមសង្គ្រោះ និងអ្នកធ្វើពិធីបរិសុទ្ធក្នុងព្រះវិហារបរិសុទ្ធ ។