ប្រធាន ណិលសុន ធ្វើការងារបម្រើ
ដោយប្រើការចាក់ផ្សាយការប្រជុំធម្មនិដ្ឋាន និងការចុះផ្សាយលើប្រព័ន្ធផ្សព្វផ្សាយសង្គម ប្រធាន រ័សុល អិម ណិលសុន បន្តអញ្ជើញមនុស្សទាំងអស់ឲ្យមករកព្រះគ្រីស្ទ ហើយរៀនពីទ្រង់ ។
អំឡុងការចាក់ផ្សាយការប្រជុំធម្មនិដ្ឋានមួយ ប្រធាន ណិលសុន បានលើកទឹកចិត្តដល់សមាជិកសាសនាចក្រនៅរដ្ឋអូក្លាហូម៉ា និងរដ្ឋកាន់សាស ស.រ.អា ឲ្យផ្ដោតលើ « អំណោយទានដ៏អស្ចារ្យបំផុតមួយដែលព្រះវរបិតាសួគ៌នៃយើងបានប្រទានដល់យើង ដើម្បីធ្វើឲ្យជីវិតរបស់យើងផ្ដោតលើទ្រង់ និងព្រះរាជបុត្រាសំណព្វរបស់ទ្រង់ » លោកបានថ្លែងដូច្នេះ ។ « ខ្ញុំសំដៅលើព្រះគម្ពីរមរមន ។ វាគឺជាអំណោយទានពីព្រះសម្រាប់យើង ។ វាគឺជាមូលដ្ឋាននៃសាសនារបស់យើង ដោយសារវាមាននូវចំណុចដ៏សំខាន់ គឺការផ្ដោតលើគោលលទ្ធិរបស់ទ្រង់ » ។
ដោយថ្លែងទៅកាន់សមាជិកនៅរដ្ឋកាលីហ្វ័រញ៉ា ស.រ.អា អំឡុងការចាក់ផ្សាយមួយ នោះប្រធាន ណិលសុនបានផ្ដល់ការអញ្ជើញចំនួនបី រួមមាន ៖ (១) ស្វែងរកសេចក្ដីពិតតាមរយៈការអធិស្ឋាន ការស្រាវជ្រាវបទគម្ពីរ និងការសិក្សាប្រសាសន៍របស់ពួកព្យាការី ពួកអ្នកមើលឆុត និងពួកអ្នកទទួលវិវរណៈ (២) បង្កើនអានុភាព និងការញាណដឹងខាងវិញ្ញាណដោយចុះសេចក្ដីសញ្ញាជាមួយនឹងព្រះ និងការរក្សាសេចក្តីសញ្ញានោះ និង(៣) ចូលរួមយ៉ាងសកម្មនៅក្នុងការជួយប្រមូលផ្ដុំអ៊ីស្រាអែល ។
ហើយនៅក្នុងការចាក់ផ្សាយមួយទៅកាន់ ៤៨ ប្រទេស ប្រធាន ណិលសុន បានរំឭកពួកបរិសុទ្ធនៅអឺរ៉ុបថា « មិត្តភក្ដិរបស់បងប្អូនជាច្រើននាក់កំពុងស្វែងយល់ពី ហេតុផលដែលពួកគេនៅលើផែនដីនេះ ។ ពួកគេចង់ដឹងប្រសិនបើជីវិតមានអត្ថន័យ និងគោលបំណងណាមួយ ។ ពួកគេចង់ធ្វើឲ្យមានភាពខុសប្លែកនៅក្នុងពិភពលោកនេះ ។ ពួកគេងឿងឆ្ងល់ពីបុគ្គលដែលពួកគេអាចទុកចិត្តបាន ។ តើបងប្អូនដឹងទេថា បងប្អូនមានចម្លើយដែលមិត្តភក្ដិទាំងនោះកំពុងស្វែងរក ?
នៅលើប្រព័ន្ធផ្សព្វផ្សាយសង្គម ប្រធាន ណិលសុន បានអញ្ជើញយើងកុំឲ្យគ្រាន់តែមានអារម្មណ៍ដឹងគុណតែម្យ៉ាង ប៉ុន្តែត្រូវបង្ហាញវាចេញមកផង ។ លោកអញ្ជើញយើងឲ្យបើកដួងចិត្តរបស់យើងសម្រាប់អ្នក « ដែលប្រហែលជាកំពុងស្មុគស្មាញមើលមិនឃើញពីពន្លឺរបស់ព្រះអង្គសង្គ្រោះ ហើយទទួលអារម្មណ៍ពីសេចក្ដីស្រឡាញ់របស់ទ្រង់ » ។ លោកបានលើកទឹកចិត្តយើងឲ្យ « ធ្វើការរួមគ្នាឲ្យនាំមុខនៅក្នុងការបោះបង់ចោលនូវអាកប្បកិរិយា និងសកម្មភាពនៃការរើសអើង » ។ ហើយលោកបានថ្លែងទីបន្ទាល់ថា « មានប្រភពមួយដែលយើងទាំងអស់គ្នាអាចងាកទៅរក ទោះជាដើម្បីពង្រីកសេចក្ដីស្រឡាញ់របស់យើងចំពោះមនុស្សដទៃ ឬកែដួងចិត្តរបស់យើងពេលវាខ្ទេចខ្ទាំក្ដី ប្រភពនោះគឺ—ព្រះអង្គសង្គ្រោះព្រះយេស៊ូវគ្រីស្ទ » ។