« ស៊ូសាន អេច ផតធ័រ » លីអាហូណា ខែ ឧសភា ឆ្នាំ ២០២២ ។
ស៊ូសាន អេច ផតធ័រ
ប្រធានអង្គការបឋមសិក្សាទូទៅ
ស៊ីស្ទើរ ស៊ូសាន អេច ផតធ័រ បានថ្លែងថា « រឿងមួយដែលបានបំផុសគំនិតរបស់យើងកាលពីឆ្នាំមុនគឺថាតើយើងអាចពង្រឹងកុមារខាងវិញ្ញាណដោយរបៀបណា ? » « ពេលយើងនិយាយអំពីការពង្រឹងសេចក្ដីជំនឿនៃជំនាន់កំពុងពេញវ័យ រឿងនោះត្រូវតែចាប់ផ្ដើមនៅក្នុងអង្គការបឋមសិក្សា » ។
ស៊ីស្ទើរ ផតធ័រ មើលឃើញពរជ័យដែលកើតមានចំពោះកុមារដែលបានជ្រមុជទឹករួច ពេលពួកគេចូលរួមជាសមាជិកចុះសេចក្ដីសញ្ញានៃសាសនាចក្រ ។
គាត់បានពន្យល់ថា « ជារឿយៗ មានតែការធ្វើសកម្មភាព និងការបម្រើនោះហើយដែលនឹងបង្កើនទីបន្ទាល់របស់យើង ។ កុមារអាចរៀនស្វែងរកការបំផុសគំនិតមកពីស្ថានសួគ៌ » ។
ពីមុនការហៅបម្រើរបស់គាត់ជាប្រធានអង្គការបឋមសិក្សាទូទៅ ប្រធាន ផតធ័រ បានបម្រើជាទីប្រឹក្សាទីមួយក្នុងគណៈប្រធានអង្គការបឋមសិក្សាទូទៅបានមួយឆ្នាំ ។
គាត់បានថ្លែងថា កុមារជាច្រើនពុំអាចចូលរួមក្នុងថ្នាក់កុមារបានទេនៅអំឡុងជំងឺរាតត្បាតកូវីដ-១៩ ។ គាត់ក៏បានឃើញ និងដឹងពីការប្រឈមដែលស្ត្រីនៅលីវបានជួប ។ ស្វាមីរបស់គាត់ អែលឌើរ ប្រ៊ូស ឌី ផតធ័រ នៃពួកចិតសិបនាក់បានទទួលមរណភាពនៅឆ្នាំ ២០១៦ ។
គាត់បានថ្លែងថា « មានថ្ងៃអាទិត្យជាច្រើនដងដែលខ្ញុំគ្មានពិធីសាក្រាម៉ង់ » ។
ពេលគាត់បានចែកចាយបទពិសោធន៍របស់គាត់ ស្ត្រីផ្សេងទៀតបានប្រាប់គាត់ថា « ដោយសារតែអ្នកកំពុងបម្រើនៅក្នុងសាសនាចក្រ វាផ្ដល់ឲ្យនូវទស្សនវិស័យមួយដ៏ប្រសើរចំពោះខ្ញុំថា សាសនាចក្រត្រូវការខ្ញុំដែរ » ។
ស៊ូសាន អេលីស្សាប៊ែត ហូឡិន ផតធ័រ បានកើតនៅថ្ងៃទី ៣១ ខែ កក្កដា ឆ្នាំ១៩៥៥ នៅក្រុងប៉ុនកា រដ្ឋអូក្លាហូម៉ា ស.រ.អា ដែលត្រូវជាកូនរបស់លោក ហាន់ស៍ ជេ និងលោកស្រី ឆាឡេន ខូឡេមិន ហូឡិន ហើយបានធំដឹងក្ដីឡើងនៅរដ្ឋនូវយ៉ក ស.រ.អា ។
គាត់បានរៀបការនឹងអែលឌើរ ផតធ័រ នៅថ្ងៃទី ២ ខែ កុម្ភៈ ឆ្នាំ ១៩៧៧ នៅព្រះវិហារបរិសុទ្ធឌីស៊ីវ៉ាស៊ីងតោន ។ ពួកលោកបានចិញ្ចឹមបីបាច់កូនទាំងបួននាក់របស់ពួកលោកនៅសហរដ្ឋអាមេរិកភាគខាងកើត ប្រទេសអាល្លឺម៉ង់ និងរដ្ឋយូថាហ៍ ហើយបំពេញការចាត់តាំងក្នុងសាសនាចក្រនៅតំបន់អឺរ៉ុបខាងកើត ។
ស៊ីស្ទើរ ផងធ័រ បានបញ្ចប់ការសិក្សាថ្នាក់បរិញ្ញាបត្រផ្នែកគីមីវិទ្យាមកពីសាកលវិទ្យាល័យព្រិកហាំយ៉ង់ ។ គាត់បានបម្រើការជាជំនួយការមន្ទីរពិសោធន៍សម្រាប់វិទ្យាស្ថានបច្ចេកវិទ្យាម៉ាស្សាឈូសេត និងជាគ្រូគណិតវិទ្យា ។ គាត់ក៏ធ្លាប់ស្ម័គ្រចិត្តក្នុងសហគមន៍ និងអង្គការស៊ីវិលជាច្រើន ។
ស៊ីស្ទើរ ផតធ័រ បានបម្រើក្នុងក្រុមប្រឹក្សាយោបល់របស់សមាគមសង្គ្រោះ ហើយការហៅបម្រើពីមុនផ្សេងៗទៀតរបស់គាត់រួមមាន ទីប្រឹក្សាគណៈប្រធានសមាគមសង្គ្រោះស្តេក ប្រធានសមាគមសង្គ្រោះ និងប្រធានយុវនារីវួដ គ្រូបង្រៀនគោលលទ្ធិនៃដំណឹងល្អ និងអ្នកដឹកនាំតន្ត្រីក្នុងថ្នាក់កុមារ ។