ការធ្វើតាមព្រះយេស៊ូវ ៖ ជាអ្នកដែលផ្សះផ្សាគេ
អ្នកដែលផ្សះផ្សាគេគឺជាអ្នកដែលមិនប្រឆាំង ពួកគេគឺជាអ្នកបញ្ចុះបញ្ចូលតាមរបៀបរបស់ព្រះអង្គសង្គ្រោះ ។
បងប្អូនប្រុសស្រីជាទីស្រឡាញ់របស់ខ្ញុំ កាលដែលយើងជួបប្រទះនឹងស្ថានភាពជ្រួលច្របល់ ការទាស់ទែងគ្នា រឿងរ៉ាវជាច្រើន ការរងទុក្ខដ៏ខ្លាំងក្លា នោះដួងចិត្តរបស់យើងពេញទៅដោយការដឹងគុណដែលកាត់ថ្លៃមិនបានចំពោះព្រះអង្គសង្គ្រោះរបស់យើង និងពរជ័យដ៏អស់កល្បជានិច្ចនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។ យើងស្រឡាញ់ទ្រង់ និងយើងទុកចិត្តលើទ្រង់ ហើយយើងអធិស្ឋានថាយើងនឹងដើរតាមទ្រង់ជាដរាប ។
គ្រោះថ្នាក់នៃប្រព័ន្ធផ្សព្វផ្សាយសង្គម
ឥទ្ធិពលដ៏ខ្លាំងក្លារបស់អ៊ីនធឺណិតគឺជាពរជ័យមួយ ហើយក៏ជាគ្រោះថ្នាក់មួយដែរ ជាពិសេសសម្រាប់ជំនាន់របស់យើង ។
នៅក្នុងពិភពនៃប្រព័ន្ធផ្សព្វផ្សាយសង្គម និងព័ត៌មានលឿនដូចផ្លេកបន្ទោរ នោះសំឡេងរបស់មនុស្សម្នាក់អាចត្រូវគេយកទៅចែកចាយបានយ៉ាងលឿនជាទីបំផុត ។ មិនថាសំឡេងនោះ ពិត ឬមិនពិត យុត្តិធម៌ ឬអយុត្តិធម៌ ល្អ ឬអាក្រក់នោះទេ សំឡេងនោះត្រូវបានផ្សាយចេញយ៉ាងលឿនទៅជុំវិញពិភពលោក ។
ជានិច្ចកាល គំនិតល្អៗ និងកិច្ចការល្អទាំងឡាយដែលចុះផ្សាយតាមប្រព័ន្ធផ្សព្វផ្សាយសង្គម មិនសូវមានអ្នកចាប់អារម្មណ៍ ហើយស្ងប់ស្ងាត់ជានិច្ច ដែលផ្ទុយស្រឡះពីពាក្យសម្តីប្រមាថមើលងាយ និងកំហឹង គឺតែងត្រូវបានលាន់ឮ មកដល់ត្រចៀករបស់យើង មិនថារឿងនោះជា រឿងនយោបាយ មនុស្សនៅលើសារព័ត៌មាន ឬយោបល់លើជំងឺរាតត្បាតជាសកលនោះទេ ។ គ្មានអ្នកណាម្នាក់ ឬគ្មានប្រធានបទណាមួយ ដែលស៊ាំដល់បាតុភូតសង្គមនៃសំឡេងដ៏ខ្លាំងក្លាបែបនេះឡើយ រួមទាំងប្រធានបទអំពីព្រះអង្គសង្គ្រោះ និងដំណឹងល្អដែលបានស្ដារឡើងវិញរបស់ទ្រង់ផងដែរ ។
ការក្លាយជាអ្នកដែលផ្សះផ្សាគេ
ទេសនកថានៅលើភ្នំគឺជាសារលិខិតសម្រាប់មនុស្សទាំងអស់ ប៉ុន្តែប្រទានទៅកាន់ពួកសិស្សរបស់ព្រះអង្គសង្គ្រោះជាពិសេស អស់អ្នកដែលបានជ្រើសរើសធ្វើតាមទ្រង់ ។
ព្រះអង្គសង្គ្រោះបានបង្រៀនអំពីរបៀបដើម្បីរស់នៅក្នុងសម័យ និងនៅពេលបច្ចុប្បន្ននៅក្នុងពិភពលោកដែលមិនឲ្យតម្លៃគ្នានេះ ។ « មានពរហើយអស់អ្នកដែលផ្សះផ្សាគេ » ទ្រង់បានប្រកាស « ដ្បិតអ្នកទាំងនោះនឹងបានហៅជាកូនរបស់ព្រះ » ។១
ដោយខែលនៃសេចក្តីជំនឿរបស់យើងទៅលើព្រះយេស៊ូវគ្រីស្ទ នោះយើងកា្លយទៅជាអ្នកដែលផ្សះផ្សាគេ អាចរំលត់ ដែលមានន័យថាស្ងប់ស្ងាត់ ត្រជាក់ ឬពន្លត់ អស់ទាំងព្រួញឆេះ—ទាំងឡាយរបស់មារសត្រូវ ។២
ការសន្យារបស់ទ្រង់គឺថា យើងនឹងត្រូវបានហៅថាជា « កូនរបស់ព្រះ » ពេលយើងធ្វើចំណែករបស់យើង ។ មនុស្យគ្រប់រូបនៅលើផែនដីនេះគឺជា« ពូជពង្ស »៣របស់ព្រះ ប៉ុន្តែការហៅថាជា « កូនរបស់ព្រះ »មានន័យកាន់តែខ្លាំងឡើងថែមទៀត ។ នៅពេលយើងមករកព្រះគ្រីស្ទ ហើយចុះសេចក្ដីសញ្ញាជាមួយទ្រង់ នោះយើងក្លាយទៅជា« ពូជរបស់ទ្រង់ » និង « គ្រងនគរនៃព្រះទុកជាមរតក »៤ « កូនចៅនៃព្រះគ្រីស្ទ ជាបុត្រា និងបុត្រីរបស់ទ្រង់ » ។៥
តើអ្នកដែលផ្សះផ្សាគេអាចធ្វើឲ្យព្រួញភ្លើងស្ងប់និងរលត់ទៅដោយរបៀបណា ? ប្រាកដណាស់គឺ មិនមែនរុញរានៅចំពោះមុខអ្នកដែលទិតៀនយើងនោះទេ ។ ប៉ុន្តែ យើងនៅតែជឿជាក់លើជំនឿរបស់យើង ហើយចែកចាយជំនឿរបស់យើងជាមួយនឹងជំហរដ៏រឹងមាំ ប៉ុន្តែត្រូវគ្មានកំហឹង ឬគ្មានការនិន្ទាគ្នាជាប់ជានិច្ច ។៦
ថ្មីៗនេះបន្ទាប់ពីការមើលឃើញនូវការបញ្ចេញមតិរិះគន់យ៉ាងខ្លាំងទៅលើសាសនាចក្រ លោកឪពុក អេម៉ុស ស៊ី ប្រោន ដែលជាអ្នកដឹកនាំសិទ្ធិមនុស្សម្នាក់ និងជាគ្រូគង្វាលនៃព្រះវិហារបាទីស្ទទីបីនៅសាន់ហ្វ្រាន់ស៊ីស្កូ បានឆ្លើយថា ៖
« ខ្ញុំគោរពបទពិសោធន៍ និងទស្សនៈរបស់បុគ្គលម្នាក់ៗដែលសរសេរពាក្យទាំងអស់នោះ ។ ខ្ញុំមើលមិនឃើញដូចលោកឃើញនោះទេ » ។
ខ្ញុំរាប់ថាវាជាអំណរដ៏អស្ចារ្យបំផុតមួយក្នុងជីវិតរបស់ខ្ញុំដែលបានស្គាល់ថ្នាក់ដឹកនាំ[ នៃសាសនាចក្រ ]ទាំងនេះ រួមទាំងប្រធាន រ័សុល អិម ណិលសុន ផងដែរ ។ តាមការវិនិច្ឆ័យរបស់ខ្ញុំ ពួកលោកគឺជាតំណាងនៃភាពជាអ្នកដឹកនាំដ៏ល្អបំផុតដែលមាននៅក្នុងប្រទេសរបស់យើង » ។
បន្ទាប់មកលោកបានបន្ថែមថា ៖« យើងអាចត្អូញត្អែរអំពីរឿងទាំងនោះ ។ យើងអាចបដិសេធមិនទទួលស្គាល់អំពើល្អទាំងអស់ដែលកំពុងកើតឡើងនៅពេលនេះ ។… ប៉ុន្តែ វិធីទាំងនេះនឹងមិនអាចផ្សះផ្សាការបែកបាក់ជាតិសាសន៍របស់យើងបានឡើយ ។… ដូចព្រះយេស៊ូវបានបង្រៀន យើងមិនអាចលុបបំបាត់អំពើអាក្រក់ដោយបន្ថែមអំពើអាក្រក់ទៀតនោះទេ។ យើងស្រឡាញ់ដោយចិត្តសប្បុរស ហើយរស់នៅដោយមានក្តីមេត្តា សូម្បីតែចំពោះអ្នកដែលយើងគិតថាជាសត្រូវរបស់យើងក៏ដោយ » ។៧
លោកឪពុក ប្រោន គឺជាអ្នកដែលផ្សះផ្សាមួយរូប ។ លោកបានធ្វើឲ្យព្រួញភ្លើងនោះរលត់ដោយស្ងប់ស្ងាត់និងដោយត្រជាក់ ។ អ្នកដែលផ្សះផ្សាគេគឺជាអ្នកដែលមិនប្រឆាំង ពួកគេគឺជាអ្នកបញ្ចុះបញ្ចូលតាមរបៀបរបស់ព្រះអង្គសង្គ្រោះ ។៨
តើអ្វីទៅដែលផ្តល់ឲ្យយើងនូវកម្លាំងពីខាងក្នុង ដើម្បីធ្វើឲ្យព្រួញភ្លើងនោះត្រជាក់ ស្ងប់ស្ងាត់ និងរលត់ដែលបាញ់ឆ្ពោះទៅរកសេចក្តីពិតដែលយើងស្រឡាញ់ ? កម្លាំងនោះចេញមកពីសេចក្តីជំនឿរបស់យើងទៅលើព្រះយេស៊ូវគ្រីស្ទ និងសេចក្តីជំនឿរបស់យើងទៅលើព្រះបន្ទូលរបស់ទ្រង់ ។
« អ្នករាល់គ្នាមានពរ ក្នុងកាលដែលគេជេរ …ហើយនិយាយបង្ខុសគ្រប់ទាំងសេចក្តីអាក្រក់ ពីអ្នករាល់គ្នា ដោយព្រោះខ្ញុំ ។
« … ដ្បិតអ្នករាល់គ្នាមានរង្វាន់ជាធំនៅឯស្ថានសួគ៌ ពីព្រោះគេក៏បានធ្វើទុក្ខដល់ពួកហោរាដែលនៅមុនអ្នករាល់គ្នាបែបដូច្នោះដែរ » ។៩
សារសំខាន់នៃសិទ្ធជ្រើសរើស
គោលការណ៍សំខាន់ពីរដែលដឹកនាំបំណងប្រាថ្នារបស់យើងក្នុងការធ្វើជាអ្នកដែលផ្សះផ្សាគេ ។
ទីមួយ ព្រះវរបិតាសួគ៌របស់យើងបានប្រទានដល់យើងម្នាក់ៗនូវសិទ្ធិជ្រើសរើសខាងសីលធម៌ ជាមួយនឹងសមត្ថភាពជ្រើសរើសផ្លូវសម្រាប់ខ្លួនឯង ។១០ សិទ្ធិជ្រើសរើសនេះគឺជាអំណោយទានដ៏មហិមាបំផុតរបស់ព្រះ ។
ទីពីរ ជាមួយនឹងសិទ្ធិជ្រើសរើសនេះ ព្រះវរបិតាសួគ៌អនុញ្ញាតឲ្យមានការផ្ទុយនៅគ្រប់រឿងសព្វសារពើ ។១១ យើង« ភ្លក់នូវសេចក្តីល្វីងជូរចត់ ប្រយោជន៍ឲ្យ [ យើង ] អាចចេះឲ្យតម្លៃដល់របស់ល្អ » ។១២ ការផ្ទុយមិនគួរធ្វើឲ្យយើងភ្ញាក់ផ្អើលនោះទេ ។ យើងរៀនដើម្បីបែងចែកការណ៍ល្អ និងការណ៍អាក្រក់ ។
យើងរីករាយនឹងពរជ័យនៃសិទ្ធិជ្រើសរើស ហើយទទួលស្គាល់ថាមានមនុស្សជាច្រើនមិនជឿអ្វីដែលយើងជឿ ។ តាមពិត មនុស្សតិចតួចណាស់នៅក្នុងថ្ងៃចុងក្រោយ ដែលនឹងជ្រើសរើសធ្វើឲ្យសេចក្តីជំនឿរបស់ពួកគេនៅលើព្រះយេស៊ូវគ្រីស្ទជាចំណុចសំខាន់នៃអ្វីៗទាំងអស់ដែលពួកគេគិត និងធ្វើ ។១៣
ដោយសារតែវេទិកាលើប្រព័ន្ធផ្សព្វផ្សាយសង្គមនោះសំឡេងដែលមិនជឿមួយអាចផ្សាយចេញជាសំឡេងអវិជ្ជមានជាច្រើន១៤ ប៉ុន្តែទោះជាមានសំឡេងច្រើនយ៉ាងណាក៏ដោយ យើងត្រូវជ្រើសរើសវិថីនៃអ្នកដែលផ្សះផ្សាគេដែរ ។
អ្នកដឹកនាំរបស់ព្រះអម្ចាស់
មនុស្សមួយចំនួនមើលឃើញថាគណៈប្រធានទីមួយ និងកូរ៉ុមនៃពួកដប់ពីរនាក់មានគោលបំណងខាងលោកិយ ដូចជាផ្នែកនយោបាយ អាជីវកម្ម និងអ្នកដឹកនាំវប្បធម៌នានា ។
ប៉ុន្តែ យើងមានការទទួលខុសត្រូវរបស់យើងខុសៗគ្នា ។ យើងមិនត្រូវបានគេជ្រើសរើស ឬរើសចេញពីកម្មវិធីណាមួយនោះទេ ។ ដោយគ្មានការរៀបចំពីអ្នកជំនាញណាម្នាក់យើងត្រូវបានហៅ និងតែងតាំងឲ្យថ្លែងទីបន្ទាល់ពីព្រះនាមរបស់ព្រះយេស៊ូវគ្រីស្ទនៅទូទាំងពិភពលោក រហូតដល់ដង្ហើមចុងក្រោយរបស់យើង ។ យើងខិតខំផ្តល់ពរដល់អ្នកឈឺ អ្នកឯកោ អ្នកបាក់ទឹកចិត្ត និងអ្នកក្រ ហើយដើម្បីពង្រឹងនគររបស់ព្រះ ។ យើងស្វែងយល់ដើម្បីដឹងពីព្រះរាជបំណងរបស់ព្រះអម្ចាស់ និងដើម្បីប្រកាសព្រះរាជបំណងនោះ ជាពិសេសទៅដល់អស់អ្នកដែលស្វែងរកជីវិតដ៏នៅអស់កល្បជានិច្ច ។១៥
ទោះបីជាយើងចង់ឲ្យការបង្រៀនរបស់ព្រះអង្គសង្គ្រោះទទួលបានការសរសើរពីមនុស្សគ្រប់គ្នាក្តី ក៏ព្រះបន្ធូលរបស់ព្រះអម្ចាស់តាមរយៈព្យាការីទាំងឡាយរបស់ទ្រង់ជាញឹកញាប់ផ្ទុយពីការគិត និងនិន្នាការរបស់ពិភពលោកនេះដែរ ។ វាតែងតែបែបនេះតាំងពីដើមរៀងមក ។១៦
ព្រះអង្គសង្គ្រោះបានមានព្រះបន្ទូលទៅកាន់សាវករបស់ទ្រង់ថា ៖
« បើសិនជាលោកីយ៍ [ ស្អប់ ] អ្នករាល់គ្នា នោះអ្នករាល់គ្នាដឹងហើយថាគេបានស្អប់ខ្ញុំជាមុន ។ …
« …គេនឹងប្រព្រឹត្តការទាំងនោះ… ពីព្រោះ គេមិនស្គាល់ព្រះ ដែលចាត់ឲ្យខ្ញុំមកទេ » ។១៧
ការមើលថែដល់មនុស្សគ្រប់រូប
យើងពិតជាស្រឡាញ់ និងយកចិត្តទុកដាក់ចំពោះអ្នកជិតខាងរបស់យើងគ្រប់រូប មិនថាពួកគេជឿ ឬមិនជឿដូចយើងនោះទេ ។ ព្រះយេស៊ូវបានបង្រៀនយើងនៅក្នុងរឿងប្រៀបប្រដូចមួយអំពីសាសន៍សាម៉ារីចិត្តល្អម្នាក់ថា អស់អ្នកដែលមានជំនឿផ្សេងៗគ្នា គួរតែឈោងទៅជួយដល់អ្នកទាំងឡាយណាដែលខ្វះខាត ធ្វើជាអ្នកផ្សះផ្សាគេ ស្វែងរកសេចក្តីល្អ និងបុព្វហេតុថ្លៃថ្នូរ ។
នៅក្នុងខែកុម្ភៈ ចំណងជើង ព័ត៌មានមួយនៅក្នុងការចេញផ្សាយនៃ Arizona Republic បានសរសេរថា« ពួកបរិសុទ្ធថ្ងៃចុងក្រោយ មិនប្រឆាំងនឹងច្បាប់ដែលបានអនុម័តលើអ្នកស្រឡាញ់ភេទដូចគ្នា និងអ្នកកែភេទនៅក្នុងរដ្ឋអារីហ្សូណាឡើយ » ។១៨
ក្នុងនាមយើងជាពួកបរិសុទ្ធថ្ងៃចុងក្រោយ គឺយើង « រីករាយដែលបានក្លាយជាចំណែកមួយរបស់សម្ព័ន្ធនៃសេចក្ដីជំនឿ អាជីវកម្ម ក្រុម LGBTQ និងអ្នកដឹកនាំសហគមន៍ ដែលបានធ្វើការរួមគ្នានៅក្នុងស្មារតីនៃការទុកចិត្ត និងការគោរពគ្នាទៅវិញទៅមក » ។១៩
ប្រធាន រ័សុល អិម ណិលសុន ធ្លាប់បានសួរដោយការត្រិះរិះថា « តើយើងអាចពិភាក្សាគ្នាដោយមិនចាំបាច់ទាស់ទែងគ្នាបានដែរឬទេ ? »២០
យើងខំធ្វើជា « អ្នកដើរតាមព្រះគ្រីស្ទដោយសុខសាន្ត » ។២១
ពេលវេលាមិនឆ្លើយតប
ការវាយប្រហារមួយចំនួនមកលើព្រះអង្គសង្គ្រោះគឺអាក្រក់ខ្លាំងណាស់ តែទ្រង់មិនបានមានព្រះបន្ទូលអ្វីសោះឡើយ ។ « ឯពួកសង្គ្រាជ និងពួកអាចារ្យ … កំពុងតែចោទប្រកាន់ទ្រង់ជាខ្លាំង … បានចំអកមើលងាយព្រះយេស៊ូវ »ប៉ុន្តែ ទ្រង់« មិនព្រមឆ្លើយ[ ពួកគេ ] សោះ » ។២២ មានពេលខ្លះការធ្វើជាអ្នកដែលផ្សះផ្សាគេ គឺមានន័យថា យើងទប់ទល់នឹងកំហឹង ដោយនៅស្ងៀមជាមួយនឹងសេចក្តីថ្លៃថ្នូរ ។២៣
វាជារឿងឈឺចាប់ខ្លាំងណាស់សម្រាប់យើងទាំងអស់គ្នា នៅពេលពាក្យគំរោះគំរើយ ឬមិនសមរម្យអំពីសាសនាចក្រ អ្នកដើរតាមរបស់ទ្រង់ និងសាសនាចក្ររបស់ទ្រង់ត្រូវបាននិយាយ ឬបោះពុម្ពផ្សាយចេញពីអ្នកដែលធ្លាប់ឈរជាមួយយើង ទទួលទានសាក្រាម៉ង់ជាមួយយើង ហើយថ្លែងទីបន្ទាល់ជាមួយយើងអំពីបេសកកម្មដ៏ទេវភាពរបស់ព្រះយេស៊ូវគ្រីស្ទនោះ ។២៤
យើងដឹងថា រឿងនេះក៏បានកើតឡើងផងដែរ ក្នុងអំឡុងពេលការងារបម្រើរបស់ព្រះអង្គសង្គ្រោះ ។
សិស្សរបស់ព្រះយេស៊ូវមួយចំនួនដែលនៅជាមួយទ្រង់អំឡុងពេលអព្ភូតហេតុដ៏អស្ចារ្យបំផុតរបស់ទ្រង់បានតាំងចិត្តមិន« [ តាម ]ទ្រង់ទៀតទេ » ។២៥ គួរឲ្យសោកស្ដាយ ពុំមែនមនុស្សទាំងអស់នឹងនៅបន្តរឹងមាំនៅក្នុងសេចក្តីស្រឡាញ់របស់ពួកគេចំពោះព្រះអង្គសង្គ្រោះ និងការប្តេជ្ញាចិត្តរបស់ពួកគេក្នុងការរគោរពតាមព្រះបញ្ញត្តិរបស់ទ្រង់នោះទេ ។២៦
ព្រះយេស៊ូវបានបង្រៀនយើងឲ្យដកខ្លួនចេញពីរង្វង់នៃកំហឹង និងការឈ្លោះទាស់ទែងគ្នា ។ នៅក្នុងឧទាហរណ៏មួយ បន្ទាប់ពីពួកផារិស៊ីបានប្រឈមមុខនឹងព្រះយេស៊ូវ ហើយបានពិគ្រោះគ្នារកហេតុនឹងធ្វើឲ្យទ្រង់វិនាសហើយបទគម្ពីរនិយាយថា ព្រះយេស៊ូវបានយាងថយពីពួកគេ ២៧ហើយអព្ភូតហេតុបានកើតឡើងពេល « មានទាំងមនុស្សកកកុញដើរតាមទ្រង់ទៅ ហើយទ្រង់ក៏ប្រោសគេឲ្យជាគ្រប់គ្នាដែរ » ។២៨
ផ្តល់ពរដល់ជីវិតអ្នកដទៃ
យើងក៏អាចចាកចេញពីការទាស់ទែងគ្នាដែរ ហើយផ្តល់ពរដល់ជីវិតអ្នកដទៃផងដែរ២៩ខណៈដែលយើងមិនដាក់ខ្លួនឲ្យនៅឯកោឡើយ ។
នៅអិមប៊ូជី ម៉ាយី សាធារណរដ្ឋប្រជាធិបតេយ្យកុងហ្គោ ដំបូងឡើយមានមនុស្សមួយចំនួនបានរិះគន់សាសនាចក្រ ដោយមិនយល់ពីជំនឿរបស់យើង ឬស្គាល់សមាជិករបស់យើងនោះទេ ។
មួយរយៈមុន ខេធី និងខ្ញុំបានចូលរួមការបម្រើរបស់សាសនាចក្រដ៏ពិសេសមួយនៅ អិមប៊ូជី ម៉ាយី ។ ក្មេងៗស្លៀកពាក់យ៉ាងស្អាត មានកែវភ្នែកភ្លឺថ្លា និងស្នាមញញឹមយ៉ាងស្រស់ស្រាយ ។ ខ្ញុំសង្ឃឹមថានឹងបាននិយាយជាមួយពួកគេអំពីការអប់រំរបស់ពួកគេ ប៉ុន្តែបានដឹងថាក្មេងៗភាគច្រើនមិនបានចូលសាលារៀនទេ ។ ថ្នាក់ដឹកនាំរបស់យើង ព្រមជាមួយនឹងមូលនិធិមនុស្សធម៌ក៏បានរកឃើញវិធីដើម្បីជួយ ។៣០ ឥឡូវនេះ មានសិស្សានុសិស្សជាង ៤០០ នាក់ ទាំង—ក្មេងស្រី និងក្មេងប្រុស ទាំងសមាជិក ក៏ដូចជាអ្នកដែលមិនមានជំនឿ—ដូចយើង ត្រូវបានទទួលស្វាគមន៍ និងបង្រៀនដោយគ្រូចំនួន ១៦ នាក់ ដែលសុទ្ធតែជាសមាជិកនៃសាសនាចក្រនៃព្រះយេស៊ូវគ្រីស្ទ ។
កាឡានហ្គា ម៉ូយ៉ាអាយុ ១៤ ឆ្នាំបាននិយាយថា« [ ដោយសារមានលុយតិចតួច ] ខ្ញុំបានខាតពេល ៤ ឆ្នាំមិនបានចូលសាលារៀន ។… ខ្ញុំមានអំណរគុណណាស់ចំពោះអ្វីដែលសាសនាចក្របានធ្វើ ។… ឥឡូវខ្ញុំអាចចេះអាន សរសេរ និងនិយាយាភាសាបារាំងបាន » ។៣១ និយាយអំពីគំនិតផ្តួចផ្តើមនេះ អភិបាលក្រុងអិមប៊ូជី ម៉ាយី បានមានប្រសាសន៍ថា « សាសនាចក្រនៃពួកបរិសុទ្ធថ្ងៃចុងក្រោយបានបំផុសគំនិតខ្ញុំ ពីព្រោះខណៈពេលដែលសាសនា [ ផ្សេងទៀត ]បានបែងចែកគ្នារៀងៗខ្លួន … [ អ្នកកំពុងធ្វើការ ] ជាមួយ [ អ្នកផ្សេងទៀត ] ដើម្បីជួយដល់សហគមន៏ដែលខ្វះខាត » ។៣២
ចូរស្រឡាញ់គ្នាទៅវិញទៅមក
រាល់ពេលដែលខ្ញុំអាននៅក្នុងយ៉ូហាន ជំពូកទី១៣ខ្ញុំនឹកឃើញដល់គំរូដ៏ល្អឥតខ្ចោះរបស់ព្រះអង្គសង្រ្គោះ ក្នុងនាមជាអ្នកផ្សះផ្សាគេ ។ ព្រះយេស៊ូវគ្រីស្ទបានលាងជើងឲ្យពួកសាវក ។ បន្ទាប់មក យើងអាន « នោះទ្រង់មានព្រះហឫទ័យតប់ប្រមល់ »៣៣ពេលទ្រង់គិតអំពីមនុស្សម្នាក់ដែលទ្រង់ស្រឡាញ់ កំពុងរៀបចំក្បត់នឹងទ្រង់ ។ ខ្ញុំបានព្យាយាមនឹកស្រមៃអំពីគំនិត និងអារម្មណ៍របស់ព្រះអង្គសង្រ្គោះនៅពេលចាកចេញទៅ ។ គួរឲ្យចាប់អារម្មណ៍នៅពេលដ៏សោកសៅនោះ ព្រះយេស៊ូវមិនបានមានព្រះបន្ទូលអំពីព្រះហឫទ័យ« តប់ប្រមល់ »របស់ទ្រង់ ឬអំពីការក្បត់នោះឡើយ ។ ផ្ទុយទៅវិញ ទ្រង់បានមានព្រះបន្ទូលទៅកាន់ពួកសាវកពីសេចក្តីស្រឡាញ់ ព្រះបន្ទូលរបស់ទ្រង់បានមានមកអស់ជាច្រើនសតវត្ស ។
« ខ្ញុំឲ្យសេចក្ដីបញ្ញត្តិមួយថ្មីដល់អ្នករាល់គ្នា គឺឲ្យអ្នករាល់គ្នាស្រឡាញ់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ ។…
គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្តីនេះឯងគឺ ដោយអ្នករាល់គ្នាមានសេចក្តីស្រឡាញ់ដល់គ្នាទៅវិញទៅមក » ។៣៤
សូមឲ្យយើងស្រឡាញ់ទ្រង់ ហើយស្រឡាញ់គ្នាទៅវិញទៅមក ។ សូមឲ្យយើងធ្វើជាអ្នកផ្សះផ្សាគេ ដែលយើងអាចបានហៅថាជា « កូនរបស់ព្រះ » ខ្ញុំសូមអធិស្ឋាន នៅក្នុង ព្រះនាម នៃ ព្រះយេស៊ូវ គ្រីស្ទ អាម៉ែន៕