របាយការណ៍នាយកដ្ឋានសវនកម្មសាសនាចក្រប្រចាំឆ្នាំ ២០២១
ជូនចំពោះគណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ
បងប្អូនប្រុសជាទីស្រឡាញ់ ៖ ដូចបានដឹកនាំដោយវិវរណៈនៅក្នុង គោលលទ្ធិ និង សេចក្តីសញ្ញា កណ្ឌទី ១២០ ក្រុមប្រឹក្សារៀបចំដង្វាយមួយភាគក្នុងដប់—ដែលមានគណៈប្រធានទីមួយ កូរ៉ុមនៃពួកសាវកដប់ពីរនាក់ និងគណៈប៊ីស្សពជាអធិបតី—អនុញ្ញាតលើការចំណាយមូលនិធិសាសនាចក្រ ។ ស្ថាប័នសាសនាចក្រទាំងឡាយបានចំណាយមូលនិធិស្របតាមថវិកា គោលការណ៍ និង នីតិវិធីដែលបានអនុម័ត ។
សវនកម្មសាសនាចក្រ ដែលមានពួកអ្នកជំនាញដ៏មានសមត្ថភាព ហើយឯករាជ្យពីនាយកដ្ឋាន និងស្ថាប័នសាសនាចក្រដទៃទៀតទាំងអស់ មានទទួលខុសត្រូវធ្វើសវនកម្មក្នុងគោលបំណងផ្ដល់ការអះអាងបញ្ចាក់ដែលសមហេតុផលទាក់ទងទៅនឹងការបរិច្ចាគដែលទទួលបាន ការចំណាយដែលបានទូទាត់ និងការការពារទ្រព្យសម្បត្តិរបស់សាសនាចក្រ ។
ដោយផ្អែកលើសវនកម្មដែលបានធ្វើឡើង នោះសវនកម្មសាសនាចក្រជឿជាក់ថា គ្រប់ទិដ្ឋភាពឯកសារទាំងអស់ ការបរិច្ចាគដែលទទួលបាន ការចំណាយដែលបានទូទាត់ និងទ្រព្យសម្បត្តិរបស់សាសនាចក្រសម្រាប់ឆ្នាំ ២០២១ នេះ ត្រូវបានកត់ត្រា ហើយប្រើប្រាស់ស្របតាមថវិកា គោលនយោបាយ និងការអនុវត្តផ្នែកគណនេយ្យរបស់សាសនាចក្រដែលបានអនុម័ត ។ សាសនាចក្រធ្វើតាមការអនុវត្តដែលបានបង្រៀនដល់សមាជិកអំពីការរស់នៅតាមថវិកា ចៀសវាងពីបំណុល ហើយសន្សំទុកសម្រាប់ពេលចាំបាច់ ។
សូមដាក់ជូនដោយការគោរពដ៏ខ្ពង់ខ្ពស់
នាយកដ្ឋានសវនកម្មសាសនាចក្រ
យ៉ារ៉េឌ ប៊ី ឡាសិន
នាយកគ្រប់គ្រង