Kālet Iaļ eo Erānin̄ im Eaidik ijjeļo̧kin Iaļ eo Edepakpak
Jān Elder Takashi Wada
Jān Jiljilimjuonn̄oul eo
Ekar wōr ruo iaļ im̧aan meja, im ikar jeļā ke ekar wōr wōt juon wāween n̄an jeļā ewi wōt n̄an kāālete.
Kōmeļeļe ko jān Chris Ede
Ikar rūttoļo̧k ilo Nagano, Japan, ippān ro jinō im jema. Kabun̄ ekar juon m̧ōttan in aolep men ko me baam̧le eo aō rekar kōm̧m̧ani. Jema ekar bukwelōlō ilo jikin katok an Ributa aolep jibbon̄ im jota. Ikar jab ļōmņak ke Buta ej juon kabun̄—ekar wāween mour ko am. En kar pidodo n̄an n̄a bwe in kar pād wōt ilo kabun̄ eo an Buta ilo aolepān mour eo aō, ak Anij ekar kam̧ool n̄an eō elōn̄ alen bwe wāween eo ebun̄bun̄ im epidodo eban aolep iien em̧m̧antata.
Textbook ak Bok Ekwojarjar?
Āinwōt juon ļaddik em̧m̧an ded, ikar pok kōn lukkuun kadkadū. Ikar kōņaan jeļā etke ikar pād ioon laļ in im wōn eo inkar erom̧. Ke ekar 13 aō iiō, būriinjibaļ eo aō ilo jikin jikuuļ ekar leļo̧k n̄an kajjojo rijikuuļ juon kapen in Kallim̧ur Ekāāl ilo kajin Pālle im Japan ilo turājet ko ruo ilo bok eo. “Ejjab kōn kōttōpar ko an kabun̄,” ekar ba. “Ekar juon ukook eo elukkuun em̧m̧an, kōn menin kōjerbale n̄an ekkatak kajin Pālle.” Ke ikar kōppelļo̧ke, ekar kwaļo̧k eoon in jipan̄ ko n̄e kwoj en̄jake ajimakeke, aikuj uwaak n̄an kajjitōk ko, ak n̄e kwoj jelm̧ae apan̄. Imaron̄ kar keidi mour eo aō n̄an aolep jekjek ko!
Ikar riit kōn Jisōs Kraist. “Kom̧win itok n̄an Ippa, kom̧ otemjej rej jerbal im ban, im Inaaj kakkijeik kom̧” (Matu 11:28). “Bōk dābweel eo [am̧], im ļoor eō” (Matu 16:24). Naan ko rekar un̄ūr eō jekdo̧o̧n n̄e ikar jab lukkuun meļeļe ta meļeļeier. Ikar kōņaan jeļā wōn in Jisōs Kraist im ewi jon̄an An aorōk n̄an kōj āinwōt juon Rilo̧mo̧o̧r. Ikar kōņaan jeļā eļan̄n̄e kar n̄a wōt eo ij en̄jake kain koonekjen rot in n̄an juon bok.
Ko ak Pād Wōt im Ron̄jake?
Jejjo allōn̄ tokālik ikar ioon jet mijenede ej kab kein kajuon. Jinō im jema rekar kakkōļ eō kōn rikūrijin rein em̧m̧an dettaer me rej etetal aolep jikin im kwaļo̧k naan. Ke ij ro̧o̧l n̄an m̧weo m̧ō, juon mijenede in amedka eaitok ejouj ilo an ettōn̄ dikdik ekar kōbōjrak eō. Ikar jab jeļā ta eo in kōm̧m̧ane. Ikar mijak n̄e enkar kōnnaan kōn kabun̄ eo an. Eļan̄n̄e en kar, in kar ko ilo jo rājet! Kajjitōk eo wōt ekar kajjitōk ej ewi wāween aō tōpar post office. Ikar ba n̄an e innem etal wōt ilo iaļ eo aō n̄an m̧weo.
Ke ikar etetal wōt, ikar en̄jake juon men. Eļan̄n̄e ibar lo mijenede ro, ikar ļōmņak, inaaj kōnono n̄an er.
Ejjab to jān iien eo, ikar bar ioon jet pea in mijenede reoktak. Ikar bwūlōn̄ ke Anij ekar eo̧ron̄ im uwaak jar ko an juon ļaddik jidikdik āinwōt n̄a, m̧ae iien ikar riit kōn bwebwenato in Josep Smith. Ikar riit ilo Kallim̧ur eo Ekāāl n̄an jar aolep iien, ak Anij ekar waļo̧k n̄an juon em̧m̧aan? Kar en̄jake jim̧or ke emenin aikuj im ejim̧we. Ijjelo̧kin aō ko, ikar bar kōm̧m̧ane juon iien n̄an er bwe ren katakin eō.
Kōm̧m̧an Jekpen Ņae ak Lo M̧ool Eo?
Juon allōn̄ in aō katak mijenede ro, rekar karuwaineneik eō n̄an peptaij. Ikar jab kōņaan kōjo̧o̧l er, ak ikar āliklik in etal jān iminene eo an ro jinō im jema im aolep ro ipeļaakū. Ekar wōr ruo iaļ ko im̧aaō, im ikar jeļā bwe ekar wōr wōt juon wāween n̄an jeļā ewi wōt n̄an kāālete—ikar aikuj jar āinwōt Josep Smith. Ikar kajjitōk ippān Jemedwōj Ilan̄, ilo etan Jisōs Kraist, eļan̄n̄e men ko mijenede ro rekar katakin eō rem̧ool.
Ekar juon wūn eo n̄an oktaktok. Jān iien eo, ikar jeļā ippa make bwe gospel eo me em̧ōj an jepļaaktok em̧ool. Ejjeļo̧k juon emaron̄ bōk jeļā in jān eō. Ikar jeļā ewi wōt iaļ eo n̄an ļoore, im ejjeļo̧k juon men emaron̄ ukot e.
Ekar lukkuun lōn̄ aō kajjitōk ke ikar dik wōt. Ikar ekkatak bwe n̄a nejin Anij, E ej iakwe eō, Ewōr juon an karōk n̄an eō, im Ekōņaan uwaake jar ko aō. Jeļā in ekar ukot aolepān kōļmenļo̧kjeņ eo aō kōn mour in. Ikar ekkatak bwe wōn n̄a im ta eo ij kōm̧m̧ane eaorōk.
Jon̄an Wōt Juon ak Jenolo̧k
Ikar ekkatak bwe n̄a nejin Anij, ikōņaan bwe in jon̄an wōt juon ippān aolep. Ikar mijak in jenolo̧k. Ak ālkin aō kar ekkatak bwe n̄a nejin Anij, ikar kile bwe imaron̄ jenolo̧k; ak imaron̄ bar oktak.
Jar im kile bwe n̄a nejin Anij ekar letok n̄an eō peran n̄an kōmeļeļeik en̄jake ko aō n̄an ro jinō im jema, ak ikar jab lukkuun meļeļe. Rekar ļōmņak ikar jum̧ae im dik wōt kōmālij n̄an kōm̧m̧an jokālet n̄an peptaij. Rekar lukkuun jook bwe ļaddik eo nejier ekar ļoor juon kabun̄ eruamājet ijjeļo̧kin imenene ko aer. Ikar jeļā wōn n̄a im ta eo ikar kōņaan, ak ikar bar kōņaan kautiej jinō im jema im ikar kōjatdikdik bwe ren kar kautiej kabun̄ eo ij pād ie.
Kautiej Jinō im Jema ak Kajejtokjen Inepata ko Aer?
Ikar kōmeļeļeiki er kōn jekjek eo ikar pād ie n̄an sister mijinede ro. Ekar wōr aer ļōmņak—remaron̄ itok im kōnnaan ippān jinō im jema bwe en em̧m̧an aer mour kōn kabun̄ in. Ikar ba n̄an er ke imijak bwe jinō im jema reban kar kōņaan kōnnaan ippāer. Innem juon iaan sister ro ekar leļo̧k ļōmņak in bwe jen jitlo̧k ippān doon.
Ke ikar jab m̧abun̄, jinō ekar inepata. “Etke kwojjab m̧ōņā?” ekar kajjitōk. Ikar kōmeļeļeik bwe ikar jitlo̧k, im ekar ļapļo̧k wōt an inepata.
“Jinoin ekar etal n̄an juon kabun̄ eruwamājet, im kiiō kwojjab m̧ōn̄ā. Inepata. Ibwūlōn̄! Ij tin ko̧o̧le mijenede ro.”
E ekar ko̧o̧le sister ro, im jon̄an ke rekar karuwaineneik er tok n̄an m̧weo im̧ōm̧ n̄an kōjota!
. Mijinede ro rekar katakin er al eo “N̄a Nejin Anij”, (Al, no. 44), im kōm kar al ippān doon. Jema ekar lukkuun m̧ōņōņō kake. Ālkin kōjota eo ippān sister ro, ejjeļo̧k juon iaan ro jinō im jema ekar inepata kōn aō itok n̄an kabun̄ in. Im ikar en̄jake ke imaron̄ kautiej er ilo aō mour kōn gospel eo kōnke em̧ōj jepo̧o̧l eō kōn aolep men ko rekar katakin eō. Ikar ļōmņak eļan̄n̄e inaaj iakwe wōt er eto im jouj n̄an er, āliktata renaaj meļeļe. Ekar bōk 35 iiō ālkin peptaij eo aō, ak m̧am̧a ekar peptaij im etal n̄an tampeļ jejjo iiō remootļo̧k!
Jeļā bwe n̄a nejin Anij ekar jelōt elōn̄ jokālet ko ilo mour eo aō. Ikar bar jeļā bwe ilo aō ļoor Jetōb im kōm̧m̧an ta eo Jemedwōj Ilan̄ ekar kajjitōk bwe jen kōm̧m̧ani, jekdo̧o̧n n̄e ilo kalimjōk epen kōm̧m̧ane, Enaaj kōjeraam̧m̧an kōj. En̄in ej jokālet eo em̧m̧an tata aolep iien.