Kwoj Iakwe, Ej Lo̧mo̧o̧ren
Rijeje eo ej jokwe ilo Utah, USA.
Kōm kar jar bwe buruōn ro nejid ren oktak. Ekar itok kile eo me ekaliklik im ekanemkwoj im kōtļo̧k.
Ļeo ippa im n̄a kom̧ro kar karūttoikļo̧k ajri ro nejimro ilo gospel in. Baam̧le in rekar ekkatak jeje ko rekwojarjar aolep jibbon̄, nokon an baam̧le, im nokon in jota an baam̧le aolep jota. Jekar etal im jar, m̧ōn̄ā in jota ippān doon, im etal ilo iien kōmejatoto ko an baam̧le. Ajri ro nejim rekar etal n̄an tampeļ emakijkij n̄an peptaij kōn ro remej, rekar kadiwōjļo̧k jān jemenere, im ruo iaer rekar etal im mijen.
Innem ke rūtto, rekar jino pukot iaļ im ļōmņak me roktak jān men ko jekar katakin er kaki. Juon ilo̧k juon, ajri ro rekar bōjrak aer bōk koņaer ilo Kabun̄ in m̧ae juon wōt iaan ajri ro ļalem ekar kālet bwe en jar wōt. Kōm kar jan̄ im buromōj eļap kōn ajri ro nejim im bwūlōn̄ eļan̄n̄e kōn kar likjab āinwōt jet ro jineer im jemāer ak eļan̄n̄e ekar wōr men kōm en kar kōm̧m̧ane eoktakļo̧k.
Ium̧win juon iien eaitok, kōm kar akweļap ippān Irooj n̄an ukot buruōer, im āliktata Irooj ekar uwaake jar ko am. Ak ejjab ilo wāween eo jekar kōtmene.
Ijjeļo̧kin ad ukot buruōn ajri ro nejim, E ekar kwaļo̧k bwe jej aikuj jino ilo ad ukot buruōd. Ilo an ro jineer im jemāer kōm̧m̧an juon eddo eo eaorōk n̄an katakin ajri ro nejier, E ekar kakemeemej kōj bwe Jisōs Kraist ej ad Rilo̧mo̧o̧r im Riekajet.
Ilo kōttōpar eo aō n̄an lo̧mo̧o̧ren ajri ro nejū, ikar joļo̧k elōn̄ awa ko in aō jar, riiti jeje ko rekwojarjar, im etal n̄an tampeļ, ļōmņak bwe eļan̄n̄e ikar kōm̧m̧ani aolep men ko rejim̧we, imaron̄ kar jipan̄ ilo jerbal an Anij n̄an ukot armej—āinwōt n̄e baj kōm̧m̧an ko aō renaaj kar tōl Anij n̄an ukot anemkwoj eo aer im iuun er n̄an tōmak āinwōt aō tōmak.
Ļeo pāleeō im n̄a kom̧ro kar lukkuun kōņaan lo̧mo̧o̧ren er, ak wāween eo am n̄an lo̧mo̧o̧ren eļap wōt kilaan katakin, kajim̧we, ak kwaļo̧k ad inepata kōn jokālet ko aer, eo me āliktata ej tōl n̄an illu ak akwāāl. Kōm kar kile bwe ilo lukkuun kōņaan ko am n̄an karooltok ajri ro nejim, kōm kar kattoļo̧k ļo̧k wōt er. Jon̄an ļapļo̧k in aer en̄jake ad lo bōd ko aer im inepata ippāer, eļapļo̧k aer kōjekdo̧o̧n kōj.
Jar ko aō rekar oktak n̄an juon akweļap kōn buruō make bwe en oktak. Ikar kile bwe un ko n̄an kōņaan bwe ajri ro nejū ren oktak rekar itok jān juon jikin ebōd. Ikar jar kōn eļapļo̧k iakwe. Ikar barāinwōt jar n̄an eļļā jān en̄jake ko aō im āliklik im jook bwe baam̧le eo aō ejjab āinwōt baam̧le ko rewānōk me ro m̧ōtta rej kwaļo̧k ilo social media ko kōn pija ko jān iien m̧are eo an ro nejier ilo tampeļ ak iien peptaij ko an ro jibūer.
Ilo aō kar oktakļo̧k n̄an Rilo̧mo̧o̧r n̄an bōk kōmour, buruō ekar jino an merļo̧k kōn ajri ro nejū. Ikar kile bwe iakwe er āinwōt Ej iakwe er meļeļein kōm̧m̧an jet oktak ko. N̄an E, iakwe ekar jab juon kōl—ej juon kōketak eo me ej kōjeikiik aolep men ko Ekar kōm̧m̧ani. Ekar ba Ekar jab kōm̧m̧an “jabdewōt eļan̄n̄e e jab n̄an jeraam̧m̧an eo an laļ; bwe E ej iakwe laļ”
Lōke maron̄ eo an Rilo̧mo̧o̧r n̄an kōm̧m̧ane jerbal eo An (lale 2 Nipai 27:20) ekar kōtļo̧k bwe in mije wōt n̄an iakwe ajri ro nejū im kōtļo̧k eddo in lo̧mo̧o̧ren eo n̄an Irooj. Ekar jab meļeļein n̄an ebbweer jān ad kajjieon̄ jipan̄ er, ak n̄e iakwe er ekar erom̧ juon un eļap kōn jem̧jerā eo aō ippāer, ekar oktak wāween aō m̧akūtkūt ippāer.
Ikar jino kalimjōk er ilo juon meram eo eoktak. Ikar jino mije wōt kajoor ko aer im taļōn ko aer im kar jino lo bwe rekar jet armej ro eļap iakwe ippāer, rejouj, rejeļāļo̧kjeņ, im rem̧m̧an.
Ļeo pāleeō im n̄a kiiō ekar ļapļo̧k am̧ro ron̄jake im dikļo̧k am̧ro kōnnaan. Jekar kajjitōk kajjitōk ko kōn mour ko aer im men ko eitok limoier kaki. Ijjeļo̧kin am lo bōd aer, jej kwaļo̧k ad kōņaan jeļā kōn er. Kōm kar joļo̧k am lo arin armej im ineptata ijjeļo̧kin kōm kar kwaļo̧k iakwe, im ajri ro nejim rekar en̄jake bwe ekar lukkuun m̧ool.
M̧weo im̧ōm̧ ekar juon jikin eo ijo rej en̄jake iakwe im karuwainene. Rekar bōjrak jān aer no̧o̧ji jabdewōt men jān kōm im kar jino aer m̧ool im epaake kōm kōn ta eo ej waļo̧k ilo mour ko aer. Jekar epaakeļo̧k doon.
Baam̧le eo am̧ rej kate wōt er, ak ajri ro nejim rekar lukkuun m̧ōņōņō in itok n̄an m̧weo im̧ōm̧ im joļo̧k iien ko aer ippām kiiō. Rej en̄jake jokne ilo pād eo am, im kōn iakwe eo am ij kōjatdikdik remaron̄ en̄jake iakwe eo an Anij n̄an er. Ikar jab jeļā eļan̄n̄e ilo mour in renaaj bar jepļaak n̄an men ko kar katakin er ke rekar ajri, ak ikar jeļā bwe aolepeer rej pād ilubwōden pein Rilo̧mo̧o̧r.