Naan eo Āliktata
Naan in Kam̧ool im Oktak
Jān Elder David A. Bednar
Jān Doulul eo an Jon̄oulruo Rijilōk ro
Jān juon ekōnono an Oktoba 2012 kweilo̧k eo eļap.
Juon katak eo eaorōk m̧ōttan ko ikōtaan naan in kam̧ool im oktak tok ej juon kein kam̧ool ilo jerbal in mijenede an ļōm̧aro nejin Mosaia.
“Jon̄an wōt eo kar bōktok n̄an jeļā kōn m̧ool eo, kōn kwaļo̧k naan an Ammōn im ļōm̧aro jein im jatin, ekkar n̄an jitōbōn revelesōn im kanaan, im kajoor eo an Anij ej jerbal mennin bwilōn̄ ko ilo er—aeet, … āinwōt Irooj emour, jon̄an lōn̄ in ri Leman ro raar tōmak ilo kwaļo̧k naan ko aer, im kar oktak tok n̄an Irooj, raar jamin raar bun̄.
“Bwe raar erom juon armej reweepān; raar likūt ilaļ kein tariņae ko in aer jum̧ae, bwe raar jab ire ņae Anij ļo̧k wōt. …
“Kiiō, er rein ro raar oktak tok n̄an Irooj” (Alma 23:6–8).
Ruo men ko raorōk rej kōmeļeļeik ilo eoon kein: (1) jeļāļo̧kjeņ kōn m̧ool eo, eo emaron̄ ukote āinwōt naan in kam̧ool, im (2) oktak tok n̄an Irooj, eo Ij meļeļe kake āinwōt oktakļo̧k n̄an Rilo̧mo̧o̧r im gospel eo An. Kōn menin, kajoor in kobain jim̧or naan in kam̧ool im oktak tok eo n̄an Irooj ekar kwaļo̧k dim im pen im ekar letok kōjparok ilo jetōb.
Naan in kam̧ool ej juon jeļā kōn m̧ool eo ilo jetōb me jej bōke kōn kajoor eo an Jetōb Kwojarjar. Wōnm̧anļo̧k wōt ilo oktak tok ej juon wūjlepļo̧k eo ejjejjet n̄an kwaļo̧k m̧ool eo jekar bōke kōn juon bōro eo me ej ikdeleel im n̄an un ko rejim̧we. Ilo ad jeļā bwe gospel eo ej m̧ool emenin aikuj an juon naan in kam̧ool. M̧ool ilo jejjet n̄an gospel eo emenin aikuj n̄an oktak tok. Rekar jeļā ke gospel eo em̧ool im rekar kōņaan katakin ro jet.
Juļo̧k “kein tariņae ko in aer jum̧ae” āinwōt tōr, utiej bōro, im jab pokake eļapļo̧k aikuj jān tōmak wōt im jeļā. Tōmak edim, ettā bōro, ukweļo̧k, im jeļā ņae rej itok m̧okta n̄an kakkure kein tariņae ko in aer jum̧ae. Kōjwōj jej ke dāpij wōt kein tariņae ko in aer jum̧ae me ej dāpij kōj jān ad oktok tok n̄an Irooj? Eļan̄n̄e āindein, innem jej aikuj ukweļo̧k kiiō.
Ij kallim̧ur bwe ilo ad itok n̄an juon jeļāļo̧kjeņ kōn m̧ool eo im rej oktak tok n̄an Irooj, jenaaj dim im pen wōt im jamin wōtļo̧k.