Pedped in Katak ko an Jerbal in Karejar
Jerbal in Karejar kōn Makūtkūt ko an Kabun̄ in
PIJA IN KŌRĀ RO ILO BŪROJĀĀK IN JIPAN̄ EO JĀN Laureni Ademar Fochetto; Photograph of ice cream and chainsaw from Getty images
Juon wāween jemaron̄ jerbal in karejar n̄an membōr ro m̧ōttad ilo ward eo, ro rūtūrūr, im ro m̧ōttad ej kōn m̧akūtkūt ko an Kabun̄ in. Men̄e kwoj peek juon makūtkūt kōn aikuj im itok limo an bar juon eo kwoj jerbal in karejar n̄ane ak kwoj karuwaineneik er n̄an bōk koņaer ilo m̧akūtkūt ak iien ko rem̧m̧an n̄an ro jet, m̧akūtkūt ko ilo juon ward, stake, ak elōn̄ļo̧k jān juon stake emaron̄ bōktok wāween ko eļap meļeļeier im ekam̧ōņōņō n̄an kōļapļo̧k bōro kuk im kōkajoorļo̧k membōr ro.
M̧akūtkūt ko an Kabun̄ in emaron̄ barāinwōt kōpelļo̧k kōjem̧ eo n̄an elōn̄ iien ko rem̧m̧an n̄an jerbal in karejar. N̄an waanjon̄ak, m̧akūtkūt ko an Kabun̄ in emaron̄ leļo̧k iien ko rem̧m̧an n̄an bōk koņaad ilo būrojāāk in jerbal in jipan̄ me ej kōjeraam̧m̧an ro jet im kalōk jem̧jerā ko rem̧m̧an ilo jukjuk in pād eo. M̧akūtkūt ko an Kabun̄ in emaron̄ barāinwōt erom̧ juon iien n̄an tōpar membōr ro rejaniknik an Kabun̄ in im n̄an ro m̧ōttad ilo tōmak ko jet ak ro m̧ōttad me rejjab tōmak ilo kabun̄ ko.
Ekoba elōn̄ armej ilo m̧akūtkūt ko an Kabun̄ in rej ejaake juon iien em̧m̧an n̄an Irooj n̄an kōjeraam̧m̧an im kōkajoorļo̧k ward im branch ko ad, ro rūtūrūr, im jukjuk in pād ko ad.
Kalōk Jem̧jerā ko Rem̧m̧an
Ekar epaaketok wintōr, im David Dickson ekar ejjeļo̧k an jeļā kōn wāween an komānāān baam̧le eo an.
David, kōrā eo pāleen, im ajri ro ruo nejin rej kab kar em̧akūt n̄an jikin ko rettoļo̧k jān town ilo Fredonia, Arizona, USA, juon jikin eutiej im em̧ōlo jepooļ kōn toļ ko rebūrōrō, wōjke sagebrush ko, im aolep men ko rekūriin.
M̧weo me baam̧le eo an Dickson rekar kōjerbale ej kōjerbal wōt jito̧o̧b rōt en me ej kōjerbal kane āinwōt kein jipan̄ eo jinoin n̄an kōmāneen. David ekar m̧ōkaj an ekkatak bwe aiini kane ko ekar juon kapeel eo me emenin aorōk kōnke wintōr ilo Fredonia eobrak kōn sno im ice.
“Ekkar ejjeļo̧k jabdewōt kane ak juon kein jidpen ak jeļā kōn wāween n̄an kōjerbal juon!” David ej ba. “Ikar jab jeļā ta eo ikar tin kōm̧m̧ane.”
Jet membōr in ward eo rekar kajjitōkin David eļan̄n̄e ekar bwe kane ko an baam̧le eo an n̄an jelm̧ae wintōr in. “Ekar jab bōk iien n̄an er n̄an kile ke ekar jab bwe,” David ej ba. “Doulul eo an em̧m̧aan ro ejjab to rekar m̧ōņōņō in jipan̄ eō aiin kane ko. Ikar obrak kōn m̧ōņōņō, ikar kōtļo̧k aer jipan̄.”
Ejjab to David ekar lo bwe iien etal in n̄an aiin kane ekar lukkuun polemen karōke, kōpeļaak ko rem̧m̧an, im m̧akūtkūt ko me elōn̄ ro rej bōk koņaer ie ilo ward eo. Juon jibbon̄ in Jādede, David, em̧m̧aan ro, im membōr ro jet ilo ward eo rekar jipadōkļo̧k toļ ko ilo juon wa āinwōt em̧ ak traila.
“Ilo juon ālkin raelep, kam̧m̧ool kōn kein jerbal ko aer im kapeel ko, membōr ro ilo ward eo rekar leļo̧k n̄an baam̧le eo aō eo̧jōk in kane me eto am kōjerbali tarin ruo wintōr,” David ej ba. “Aaet eļapļo̧k an aorōk, kar katakin eō aolep men ikar aikuji jeļā kōn kilen aiin kane ippa make. M̧ae iien eo ikar em̧m̧akūt jān Fredonia, ikar jeļā kilen kōjerbal juon jidpen, im ikar jipan̄ ilo m̧akūtkūt in aiin kane ko an ward eo me imaron̄ bwūni.
M̧akūtkūt rōt kein an ward ejjab kalōk wōt jem̧jerā ko ilubwiljin membōr ro an Kabun̄ in ak barāinwōt kalōk jem̧jerā ko rem̧m̧an ippān aolep ilo jukjuk in pād eo.
“Ij keememej juon kōrā, ejjab membōr in Kabun̄ in, eo ekar kāāl n̄an eria eo,” David ej ba. “Ekar aikuj tile kane ko ilo jikin kōmānāān eo ilo m̧weo im̧ōn n̄an kōmānāān er. N̄e jejeļā kōn jekjek in ekar pād ie, kōm kar lale bwe en bwe kane ko an n̄an jelm̧ae wintōr eo. Ekar ļap an kam̧m̧oolol jon̄an jidik wōt an kōnono.
Kijejeto in jerbal in karejar ilo Fredonia ej lukkuun lale bwe aolep ren innem̧m̧an im mānāān ilo iien wintōr.
Tōpar ro Jet
Ilo aō kar mijen ilo Romania, Meg Yost im kōmpānien eo an ekar ikutkut aerro loļo̧k juon baam̧le eo eto aer jab bar jar. “Baam̧le eo an Stanicas rekar pād ilubwiljin membōr ro an Kabun̄ in jinointata ilo Romania, Meg ekar ba, im jekar iakwe er.
N̄e ej itok n̄an iien n̄an karōk im kōpeļaak juon m̧akūtkūt an juon branch, ritōl ro rej kāālet bwe branch eo en wōr juon m̧akūtkūt etan “Pioneer Night.” Menin emaron̄ juon jota n̄an kakeememej painier ro rekar peran ro rekar kijo̧o̧ne Amedka kan n̄an tōpar Salt Lake Valley. Enaaj barāinwōt juon iien em̧m̧an n̄an kautiej painier ro an Kabun̄ in ilo Romania.
“Jekar ļōmņak enaaj juon wāween eo em̧m̧an n̄an jet iaan membōr ro n̄an kwaļo̧k naan in kam̧ool ko aer kōn aer kar oktak tok im wāween aer lo an eddōkļo̧k Kabun̄ in ilo Romania,” Meg ekar ba. “Jekar kajju ļōmņak bwe baam̧le eo an Stancia rej aikuj bōk koņaer. Jekar karuwaineneik er n̄an bōk koņaer, im rekar lukkuun m̧ōņōņō!”
Ilo bon̄ōn raan in m̧akūtkūt eo, baam̧le eo an Stanicas rekar jan̄in de itaaktok ke ekar iien n̄an jinoe.
“Jekar inepata bwe remaron̄ kar jab itok,” Meg ej keememej ļo̧k. “Ak ejejjet ilo iien eo, rekar deļo̧n̄e tok ilo kōjem̧ eo. Baam̧le eo an Stanicas rekar kwaļo̧k juon naan in kam̧ool aibojooj kōn gospel eo im Kabun̄ in. Rekar barāinwōt wōr aer iien n̄an iiaio ippān membōr ro jet me eto aer jan̄in loe.
Membōr ro an branch eo rekar kōppelļo̧k peier im karuwaineneik baam̧le eo an Stanicas. Jabōt eo tok juon, Meg ekar m̧ōņōņō ke ej lo Sister Stanica ilo m̧ōnjar eo.
Ke ikar loļo̧k branch eo jejjo allōn̄ tokālik, ekar itok im jar! Meg ekar ba. “Ij ļōmņak iien in n̄an kwaļo̧k an naan in kam̧ool im n̄an en̄jake an bōk koņaan im ļap aikuji ilo branch eo me ekar lukkun jipan̄ er.”
4 Itia ko ikkijeen Jerbal in Karejar kōn M̧akūtkūt ko an Kabun̄ in
-
Karōke m̧akūtkūt ko me ej tōpar aikuj ko: M̧akūtkūt ko rej juon wāween em̧m̧an n̄an jelm̧ae elōn̄ kain aikuj ko reokkōtaktak. Maron̄ karōki n̄an tōpar aikuj ko rejenolo̧k an juon make ak kurup. Rej aikuj tōpar aikuj ko an ro rej bōk koņaer, men̄e aikuj eo ej n̄an em̧m̧anļo̧k ad jeļā kōn kajjojo, ekkatak eļapļo̧k kōn gospel eo, ak en̄jake Jetōb eo.
-
Karuwaineneik aolep: Ilo ad karōk m̧akūtkūt ko, kōm̧m̧ane juon kijejeto ejenolo̧k n̄an karuwaineneik ro jet ro me rej jeraam̧m̧an jān aer bōk koņaer. Likūt ilo ļōmņak membōr ro rekāāl, membōr ro rejaniknik, jodikdik ro, rūm̧m̧an ded ro rejjan̄in m̧are, armej ro elōn̄ wōtam̧we ko ilo ānbwinnier, im armej ro ilo kabun̄ ko jet. Karuwaineneik tok er kōn itok limo ko aer rem̧m̧an tata ilo kōļmenļo̧kjeņ ko ad, im kwaļo̧k wāween am̧ m̧ōņōņō n̄e rej itok.
-
Kapilōk er n̄an bōk koņaer: Ro rej karuwaineneik er renaaj jeraam̧m̧an eļapļo̧k jān m̧akūtkūt ko eļan̄n̄e ewōr aer iien em̧m̧an n̄an bōk koņaer. Juon wāween n̄an kapilōk er n̄an bōk koņaer ej n̄an kōtļo̧k bwe kajjojo ren kōjerbal menin letok ko aer, kapāāl ko, im taļōn ilo iien m̧akūtkūt eo.
-
Karuwaineneik aolep: Eļan̄n̄e ro m̧ōttam̧ rej pād ilo juon m̧akūtkūt, kōm̧m̧an aolep men ko komaron̄ n̄an karuwaineneik er. Āinwōt, eļan̄n̄e kwoj loe armej ro kwojjab jeļā kajjier, jouj n̄an er im karuwaineneik er barāinwōt!