Rūm̧m̧an Ded ro
Etke Jemedwōj Ilan̄ ekar Kōņaan bwe In Pukot Jeļāļo̧kjeņ
Kōjekdo̧o̧n ta ikdeleel eo am̧ em̧m̧an, Jemedwōj Ilan̄ enaaj kōpooj juon iaļ n̄an eok n̄an kōttōpraki.
Jān ke ikar dik, aolep iien ikar kōņaan kabun̄-buruōn Jemedwōj Ilan̄ im baam̧le eo aō kiiō im ilju im jekļaj. Ikar kōņaan kadedeikļo̧k jikuul bwe in maron̄ kōkm̧anm̧anļo̧k eō make im mour eo aō.
Ilo laļ eo aō, Peru, jikuuļ eo em̧m̧antata elukkuun ļap wōneen im, ilo jet jikin, epen tōpare. Baam̧le eo aō ejjeļo̧k aer kein jipan̄ ko n̄an jipan̄ eō ilo jikuuļ. Ak ro jino im jema rekar katakin eō n̄an buul jerbal, tiljek, im kajjitōk ippān Jemedwōj Ilan̄ kōn jipan̄ emaron̄ jipan̄ kōm̧m̧an ikdeleel ko ad rejim̧we bwe ren kūrm̧ool. Im ikar pepe n̄an buul jerbal.
Ilo elementary jikuuļ im high jikuuļ, ikar tiljek ilo katak ko aō bwe in maron̄ kōkm̧anm̧anļo̧k eō make kajjojo iiō. Ālkin high jikuuļ, ikar deļon̄e university eo epen tata ilo Peru im bōk juon jikaļōrjep em̧m̧an. Ke ikar pād ijeņ, ikar jerbal ippān jejjo doulul, ekoba kaminene ko ippān doulul eo an global, im ekar wōr aō iien n̄an tōl elōn̄ kain būrojāāk ko reoktak.
Ilo iien kaminene eo, ikar en̄jake ke enaaj juon iien em̧m̧an n̄an n̄a bwe in maron̄ bōk jeļāļo̧kjeņ ilo kajin Pālle. Kōn menin ikar kāālet bwe in em̧m̧akūt n̄an Brigham Young University–Idaho. Ikar lukkuun kor, ak ikar jeļā bwe Jemedwōj Ilan̄ enaaj jipan̄ eō n̄an tōpar kōttōpar in—Ikar aikuj wōt lōke E im kōm̧m̧ane ijo koņaaō.
Juon Oktak n̄an Karōk Ko
Ikar pojak n̄an etal n̄an BYU–Idaho, ak ilo iien eo ikar kanne abūlikāijen eo, ikar en̄jake juon im̧we ekajoor ke ij aikuj etal im mijen m̧okta jān aō em̧m̧akūt n̄an BYU–Idaho. Kōn menin ikar ļoor ankilaan Jemedwōj Ilan̄ im kar kūr eō n̄an jerbal ilo Trujillo, Peru. Ke ikar jepļaak n̄an m̧weo, ikar pepe n̄an bar ro̧o̧lļo̧k n̄an university eo ilo Peru kōn ikar en̄jake ke emaron̄ m̧ōkaj aō bōk juon aō degree ijeņ. Ijoke, ikar lo bwe jikaļōrjep eo aō ijeņ ekar jem̧ļo̧kin kitien kōn ikar em̧m̧akūt jān jikuuļ en ium̧win elōn̄ jān juon iiō n̄an etal im mijen.
Ikar illu im pok. Ikar jab jeļā ta in kōm̧m̧ane. Ikar jab jeļā etke ikar en̄jake im̧we n̄an etal im mijen eļan̄n̄e meļeļein bwe ij luuji iien eo em̧m̧an n̄an bōk juon kaļōj degree.
Ak juon raan, ikar keememej mission būreejtōn eo aō ekar ba n̄an kōm kōn BYU-Pathway Worldwide. Ekar karuwaineneik kōm n̄an kōkm̧anm̧anļo̧k kajin Pālle eo am im n̄an wōnm̧aanļo̧k kōn iien in em̧m̧an n̄e kōm bar rool jān mijen—im kōm kar kōm̧m̧ane!
Iaļ eo Aō ilo BYU-Pathway Worldwide
Ikar jeļā bwe mission būreejtōn eo aō ekar ba n̄an eō kōn BYU-Pathway ke ejjab jide. Ke ikar jino ilo būrokūraam in an Pathway, ekar menin aikuj n̄an eō bwe in em̧akūtkūt eiten epaake jilu awa kajjojo wiik n̄an ioone kurup eo aō. Ikar kaarmejet aolep men, ak ikar jeļā bwe pukot jeļāļo̧kjeņ ekar jim̧or aorōk n̄an eō im n̄an Irooj. Im aolep men ko ikar kaarmejeti rekar tōl eō n̄an elōn̄ kōjeraam̧m̧an ko.
BYU-Pathway Worldwide ekar juon iien eo em̧m̧an ippa me ikar ereim̧aanļo̧k n̄ane. Ej letok n̄an eō iaļan deļon̄e jeļāļo̧kjeņ kōn wōnāān eo edik im jemaron̄e, ekar kōtļo̧k n̄an eō iien n̄an bar jerbal, im ekar jipan̄ eō pukot jeļāļo̧kjeņ ilo kajin Pālle. Im ilubwiljin aolepān men ko, ikar lo ro m̧ōtta rem̧m̧an me rekar kapilōk eō n̄an peran im wōnm̧aanļo̧k wōt im tōpar kōttōpar in. Ij en̄jake kajoor ilo jetōb im ikar erom̧ juon rikaļoor eo em̧m̧an an Jisōs Kraist.
Āliktata, ikar juon iaan rijikuuļ ro jān tulikin amedka n̄an bōk juon bachelor degree ilo BYU-Pathway Worldwide. Jeļāļo̧kjeņ ekar kōppelļo̧k iien ko rem̧m̧an rekabwūlōn̄lōn̄ n̄an eō. N̄a kiiō ij juon welfare im self-reliance specialist n̄an South America Northwest Area ilo Kabun̄ in, im ij barāinwōt juon mijenede eo ej bōk koņaan ilo BYU-Pathway ilo Peru. Ilo eļap kōjatdikdik ilo kajjojo rijikuuļ, im ij rōjan̄ er n̄an wōnm̧aanļo̧k wōt ilo ejja wāween in wōt ke kar rōjan̄ eō jān ro m̧ōtta ilo iien jikuuļ. Ilo iaļ in, ikar kile bwe Jemedwōj Ilan̄ ekar pād ippa ilo aolep bun̄tōn ko an iaļ in.
Jemedwōj Ilan̄ Ekōņaan Bwe Jen Tōprak
Iaļ eo aō ekar kōkajoorļo̧k naan in kam̧ool eo aō kōn jeļāļo̧kjeņ. Im ij pepe wōt n̄an dāpij eddōkļo̧k im ekkatak in aō jon̄an eo imaron̄e kajjojo raan. Jej pād ioon laļ in n̄an eddōkļo̧k, n̄an jelm̧ae idajon̄jon̄ ko, n̄an rūttoļo̧k, n̄an kam̧ool ad pokake, im pedped wōt ioon Rilo̧mo̧o̧r bwe jen erreo n̄an jepļaak n̄an ippān Jemedwōj Ilan̄. Ippān Anij, “aolep men ko … rej jetōb”—ekoba jeļāļo̧kjeņ (lale Katak im Bujen Ko 29:34). Aolep en̄jake ko me ewōr ippād im jeļāļo̧kjeņ eo jej bōke ioon laļ in enaaj jipan̄ kōj erom̧ eļapļo̧k āinwōt ad Rilo̧mo̧o̧r im enaaj kōpooj kōj n̄an kōm̧m̧ani kālet ko rem̧m̧anļo̧k, n̄an jipan̄ em̧m̧anļo̧k ilo laļ in, im n̄an erom̧ kein jerbal eo em̧m̧anļo̧k ilo Pein.
Jeļāļo̧kjeņ ej letok juon iaļ n̄an bōk jeļāļo̧kjeņ innem jerbale, n̄an jutak kōn m̧ool im jim̧we, im n̄an mour kōn juon mour eo me Jemedwōj Ilan̄ ekōņaan bwe jen mour kake—juon mour eobrak kōn lan̄lōn̄.
Ijeļā bwe Jemedwōj Ilan̄ ej kōjeraam̧m̧an kōj kōn kijejeto ko ad, eļaptata ikdeleel ko an buruōd ej n̄an eddōkļo̧k im jerbal n̄an E im ajri ro Nejin. Ijeļā bwe n̄e Ej tōl ajri ro Nejin, “enaaj kōpooj juon iaļ n̄an aer kōtōprak men eo Ej kean̄ er” (1 Nipai 3:7). Ekōņaan bwe jen tōprak!
Kajjojo iaad rej aikuj kawōr tokjen kajjojo iien em̧m̧an n̄an jeļāļo̧kjeņ im eddōkļo̧k bwe Irooj ej likūt ilo iaļ ko ad, men̄e kōn BYU-Pathway ak jabdewōt iien ko rem̧m̧an ikkijeen jeļāļo̧kjeņ. Ej iakwe kōj im enaaj aolep iien tōl kōj. Ekōņaan bwe jen ekkatak aolep men ko jemaron̄i ilo laļ in. Aolep ijeļā bwe jemaron̄ en̄jake menin bwūlōn̄ eļap n̄e jej jerbal ilo lan̄lōn̄ im tiljek im lōke tōl eo An. Ijeļā ikar en̄jake eļap menin bwūlōn̄ ko reļļap.