Pija ko kōn Tōmak
Ignatius im Adelaide Baidoo
Accra, Ghana
Ignatius im Adelaide rekar lo wāween an burookraam̧ in riit im jeje an Kabun̄ in im kwaļo̧k aorōkin an m̧ōko pedped ioon ekkatak kōn gospel kar kōjeraam̧m̧an membōr ro ilo stake eo aer im baam̧le ko.
Christina Smith, ripija
Ignatius:
Ikar bōk koņaaō ilo burookraam in riit im jeje kōn gospel in āinwōt juon membōr in stake būreejtōnji eo. Ikar loļo̧k juon kūlaaj im kile bwe ejjab n̄an ro wōt me rejjab maron̄ riit im jeje. Ej n̄an aolep kōj n̄an kōkm̧anm̧anļo̧k jeļā eo ad kōn gospel eo an Jisōs Kraist.
Adelaide:
Ijeļā elōn̄ sister ro ilo ward eo ro me kūlaaj in jeje im riit an gospel eo ekar jipan̄ er. Juon sister ekar jab m̧ōņōņō kōnke ekar jab maron̄ riit, jeje, ak jipan̄ ajri ro nejin kōn homework ko aer. Ekar bōk juon kūlaaj im ej kiiō maron̄ riit im jipan̄. Elukkuun em̧ōņōņō. Jabdewōt iien ij lo e, aolep iien ij ba, “En̄in gospel eo em̧ool. Ej ukot im kōjeraam̧m̧an mour an armej ro.”
Ignatius:
Itok, Ļoor Eō im m̧ōko me rej mije ekkatak kōn gospel enaaj barāinwōt jipan̄ baam̧le ko riiti jeje ko rekwojarjar ippān doon im ekkatak jān doon.
Dōkā in jabōn em̧ an kabun̄ in ad ej Bok in Mormon. Ijin ilo Africa, jekar aolep rūttotak ilo ad jeļā kōn Baibōļ. Elōn̄, mekarta, rekar jab jeļā bwe Bok in Mormon epād ie m̧ool ko ralikkar im raorōk. Ilo ad kōjerbal Itok, Ļoor Eō n̄an ekkatak kōn Bok in Mormon ilo būrokraam̧ in jeje im riit kōn gospel eo im ilo an m̧ōko im̧ōd mije wōt ekkatak kōn gospel, jej ekkatak im meļeļe kōn aolep meļeļe ko jej aikuji n̄an jipan̄ kōj eddōkļo̧k ilo mour in.
Adelaide:
Ke rej kōjeļļāiki ilo kweilo̧k eo eļap kōn burokraam̧ kōn m̧ōko me rej mije ekkatak kōn gospel eo, ikar ļōmņak kōn jet iaan membōr ro ilo ward eo am im ikar inepata jidik. Ewi wāween aer nej kōm̧m̧ane menin? Ikar ļōmņak. Ikar jar bwe membōr ro ren ļoor revelesōn in. Ijeļā bwe eļan̄n̄e renaaj ļoor ta eo rikanaan eo ej ba, enaaj jipan̄ er ilo m̧ōko m̧weer.
Ilo baam̧le eo am, kōm ej kajjieon̄ im kōm̧m̧ane ta eo jemaron̄. Aolep rej bōk koņaer. Eļap aō m̧ōņōņō kōn wāween an ajri ro nejū jipan̄ doon ilo am riit Bok in Mormon ippān doon. Rej iakwe Bok in Mormon. Ekar wōr am iien ippān doon n̄an riit im kwaļo̧k naan in kam̧ool ko am ippān doon.
Ignatius:
Būreejtōn Russell M. Nelson ekar ba, “Mour eo ilōn̄tata ej an baam̧le.”1 Ij iakwe kōrā eo pāleeō im ajri ro nejū. Ikōņaan bwe in pād ippāer im Jemedwōj Ilan̄ n̄an indeeo, kōn menin jej aikuj jipan̄ doon.
Adelaide:
Sister ro ilo Doulul eo an Kōrā ro rej barāinwōt jipan̄ doon. N̄e jej ippān doon, jej ļōmņak, “Sister in ej aikuji eō” ak, “Ij aikuji.” Jej jijet turin doon im jipan̄ doon riit, meļeļe, im kwaļo̧k ta eo jej ekkatak. Jej kōm̧m̧an ijo koņaad em̧m̧an tata n̄an ļōmņak, “Eļan̄n̄e Rilo̧mo̧o̧r en kar pād ijin, Ta eo Enkar kōm̧m̧ane?
Ignatius:
Ewōr juon m̧ōttan ilo būrokraam̧ eo an gospel ikkijeen riit im jeje me ej kajjitōk ippān rijikuuļ ro n̄an jin̄n̄aik juon pija in ta eo rej tin kōm̧m̧ane n̄an kōkm̧anm̧anļo̧k ekkatak ko aer ilo gospel im jeje ko rekwojarjar. Juon pija juon armej ekar jin̄n̄aiki ej kwaļo̧k kōn juon baam̧le ej jepooļe juon tebōļ kōn bok ko aer rekwojarjar im̧aan mejāer im rej kōmeļeļe kōn gospel eo. Kar lukkuun im̧we eō kōn menin. Jeļāļo̧kjeņ eo kōn gospel eo ejjab wōt kōn riit im jeje. Bar loļo̧kjeņ ak men ko kwoj loi remaron̄ bar jipan̄ kōj ekkatak. Men̄e jej ļōmņak jejeļā aolep men, jemaron̄ ekkatak aolep iien eļapļo̧k kōn gospel eo im kōļapļo̧k naan in kam̧ool eo an ad kōn Irooj, Jisōs Kraist.
Jeje ko rekwojarjar rej ba bwe eo ekajoor ej aikuj bōk eo me em̧ōjņo bwe en maron̄ barāinwōt erom̧ kajoor (lale Katak im Bujen Ko 84:106). Eļan̄n̄e ewōr jejjo ro me rej en̄jake ke rem̧ōjņo̧ ilo gospel eo, jemaron̄ jerbal in karejar n̄an er, juon ilo̧k juon, im jipan̄ kōketak er. Jerbal in karejar ej pojen lukkuun ļap tokjen n̄an jipan̄ kōketak membōr ro.
Burokraam̧ eo etan m̧ōko me rej mije ekkatak kōn gospel ekar kakōjoorļo̧k naan in kam̧ool eo an ļaddik ro nejin baam̧le eo an Baidoo, Jayden im Hubert. Ekkā aer tōl kōnono ko an baam̧le eo kōn gospel.
Al al ko āinwōt juon baam̧le ej bōktok Jetōb n̄an nokon in jota ko ilo m̧weo.
Jar ko an baam̧le ko aolep iien ekar kōm̧m̧an bwe m̧weo im̧ōn baam̧le eo an Baidoo en juon jikin tōmak im iakwe.
Ignatia ekar ekkatak kōn aorōk in jar jān ro jinen im jemān im brother ro an.
Jipan̄ er kōn jerbal ko ilo m̧weo, ippān ļo̧k ekkatak kōn gospel, ej kōjeraam̧m̧an jem̧jerā eo ikōtaan jeim jen jeim jati ro ilo baam̧le eo an Baidoo.
Ekkatak gospel eo im jipan̄ doon ilowaan wōt baam̧le eo ekar kōkajoorļo̧k iakwe eo an Baidoo me rej en̄jake n̄an doon im ekar kōjeraam̧m̧an er ilo elōn̄ wāween ko jet.
Jar ko ikōtaan ļeo im lio pālele ekar jipan̄ Ignatius im Adelaide tōl ajri ro nejier ilo wāween eo me rikanaan ro im rijilōk ro rekar katakin er.