Ilo Digital Wōt: Rūm̧m̧an Ded ro
5 Men ko Ralikkar ilo juon Laļ Ejjab Alikkar
Ļalem m̧ool ko remaron̄ jipan̄ eok ilo men otemjej.
Mour jet iien ejjab jejjōt n̄an karōk ko. Obrak kōn oktak ko, iaļ ko, im kailibōkbōk ko n̄an aolep. Kōn menin ewi wāween ad m̧aanjabpopo n̄an ilju im jekļaj eļan̄n̄e jejjab jeļā ta eo enaaj bōktok?
Jeraam̧m̧an, ewōr jejjo men ko jemaron̄ pedped ioer. M̧ool kein rej elaajrak rejjaminļo̧k wōt n̄an jidik oktak. Remaron̄ tōl jokāālet ko ad im rōjan̄ kōj n̄an bun̄ m̧aanļo̧k, men̄e iaļ eo im̧aan āinwōt emarok im jab laikkar.
Jemedwōj Ilan̄ ej iakwe eok.
Jekdo̧o̧n ta ko ej waļo̧k ilo mour in, ej iakwe eok. Eļap am̧ kanooj aorōk n̄an Jemedwōj Ilan̄ (lale Katak im Bujen ko 8:10). Aorōkūm̧ eļap jon̄an wōt laļ ko!1
Komaron̄ jab en̄jake am̧ lukkuun aorōk. Komaron̄ en̄jake am rup, make iaam̧ im mijak. Komaron̄ en̄jake am̧ jab erreo. Ak āinwōt an Sister Joy D. Jones, Būreejtōn eo Eutiej an Būraimere, kar kōmeļeļeik, aorōk im erreo rejjab juon wōt.2 Men̄e jej jerawiwi, ekanooj in ļap ad aorōk. En̄in ej juon un etke Rilo̧mo̧o̧r eo ekar kōm̧m̧ane Pinnuur eo (lale Katak im Bujen Ko 18:11-13). Kōnke E ejeļā wōn kōj im E ej iakwe kōj, E ekar letok juon iaļ n̄an bwe kwon bar juo alen erreo.
Jemād Ilan̄ ewōr juon an karōk n̄an kwe.
Kwoj pād ioon laļ in kōn juon un: n̄an erom ānwōt Jemed Ilan̄ im Jisōs Kraist im n̄an bar ro̧o̧l n̄an mour Ippāer. En̄in ej kōttōpar eo an Anij n̄an eok, im E enaaj jipan̄ eok kōtōprake!
Ejjab meļeļe in aolep men ko renaaj iien otemjej pidodo; jenaaj wōt jelm̧ae apan̄ ko. Bōtaab jemaron̄ in jeļā bwe “aolep men ko otemjeļo̧k renaaj jerbal ippān doon n̄an em̧m̧an eo n̄an ro rej etetal jim̧we” (Katak im Bujen Ko 100:15).
Karōk eo An n̄an mour eo am̧ emaron̄ oktak jān karōk eo am̧, ak komaron̄ lōke bwe karōk eo An enaaj em̧m̧an n̄an eok im tōl eok n̄an mōņōņō indeeo. Riiti bok in tōl ko n̄an mour: jeje ko rekwojarjar, kōjeraam̧m̧an in petriak eo am̧, im naan ko an rikanaan ro rainin. Renaaj jipan̄ eok meļeļe eļap kōn karōk eo An n̄an eok.
Innām ļoore tōl eo An. N̄e jej pokake kien ko An , enaaj wōr ippād aenōm̧m̧an im jeraam̧m̧an (Lale Mosaia 2:22). “Kwon m̧ōņōņō,” āinwōt an Būreejtōn Thomas S. Monson kar ba. “Ilju im jekļaj eo eromaakļo̧k āinwōt tōmak eo am̧.”3
Kōttōpar eo eļaptata ej mour indeeo.
Ilo an iaļ eo ad ilo mour emaron̄ in jab alikkar, mejān kajjik eo ealikkar. Ilo ad kōm̧m̧ani kāālet ko, jemaron̄ kajjitōk, “Ia eo menin enaaj tōlļo̧k n̄an e?”4 Eļan̄n̄e ej ukōtļo̧k eok jān iaļ eo n̄an mour indeeo, ejjab juon kāālet ejim̧we.
Jet iien jej lokjak ilo jokāālet ko reddik, āinwōt katak ko ilo jikuul ak ta eo jej m̧ōn̄ā in rāelep. Jej jerwane kōļmenļo̧kjeņ eo an lukkuun un eo an mour—eromļo̧k āinwōt jinedwōj im jemedwōj ilan̄. Ilo lukkuun m̧ool, n̄e jej wōnm̧aanļo̧k ilo kōttōpar jab eo, aolep men renaaj EM̧M̧AN. Kōn menin bōk juon kōļmenļo̧kjeņ indeeo.
Mour emaron̄ in jab etal ekkar n̄an an karōk. Ilo m̧ool, elukkuun ban. Ak ijo jej jibadōk ej men eo aorōktata. Lale bwe en jim̧we iaļ eo kwoj etal ie ļo̧k, im kōn jipan̄ eo an Irooj, aolep men renaaj jerbal ekkar n̄an karōk eo. E enaaj tōl eok.
Ewōr am̧ anemkwoj in kāālet.
Ilo an Jemedwōj Ilan̄ tōl kōj ilo iaļ eo ad, E ejjab jiron̄ kōj aolep men ko jej aikuj kōm̧m̧ani. Em̧ōj an letok anemkwoj in kāālet, im E ej kōtmene bwe jen kōjerbale.
Āinwōt an Irooj kar ba, “Bwe lo ejjab ekkar bwe In aikuj jirōn kom̧ ilo men otemjeļo̧k; armej reaikuj kanooj m̧ōņōņō in poub kōn tokjān, im kōm̧m̧an elōn̄ men ko kōn wōt anemkwōj in kāālet ko aer” (Katak im Bujen Ko 58:26–27). Ilo wāween in, n̄an erom kanooj m̧ōņōņō ej meļeļe in n̄an lukkuun in niknik im leļo̧k aolepān am̧.
Jet iien, ewōr anemkwoj in kāālet eo emaron̄ jab āinwōt juon kaenōm̧m̧an. Jet iien jemaron̄ kōņaan wot n̄an ba ta ko jej aikuj kōm̧m̧ani. Ak ilo m̧ool, anemkwoj in kāālet ej juon kōjeraam̧m̧an eļap. Ej juon menin in letok jān Anij im juon iaan men ko ej kōm̧m̧an bwe jen ainwōt E. Ej letok n̄an kōj kajoor.
Ta eo kwoj kōņaan bōk koņam̧ ie?
Jemedwōj Ilan̄ ej kōņaan bwe jen eddōkļo̧k.
Juon iaan un ko rem̧m̧an n̄an bōk koņam ie emaron̄ kōn eddōkļo̧k eo ad make. Iien otemjej ewōr men ko jemaron̄ kōkōm̧anm̧aniļo̧k kōn kōj make, men ko jemaron̄ ekkatak, im kapeel ko jemaron̄ kōļapiļo̧k. Ebar wōr bujen ko me jej aikuj kōm̧m̧ani im kōjparoki.5
Elder Dale G. Renlund jān Doulul eo Jon̄oulruo Rijilōk ro ekar kōmeļeļe aorōk in eddōkļo̧k ilo wāween in: “Anij ejjab kōņaan bwe Ajri ro ren kaminene wōt im pokake āinwōt ‘menin mour ko’ ko me reban kijkiji mweik ko ilo jikin ko rej pād ie. Ejjab, Anij ekōņaan bwe ajri ro Nejin ren rūttoļo̧k ilo mour in jetōb im kobaļo̧k Ippān ilo aolep m̧akūtkūt ko an baam̧le.”6
M̧aanjabpopo eo n̄an mejān kajjik eo am̧ indeeo kōn erom em̧m̧antata eo am̧ kake. Kile kapeel ko kwoj kōņaan kōļapilo̧k im menin letok ko ilo jetōb kwoj aikuji n̄an eromļo̧k āinwōt Anij.7 Innām kōm̧m̧ane juon karōk n̄an kōļapļo̧k men ko! Kōkajoorļo̧k “m̧ajeļ in jetōb” ko am̧ kōn kaminene.8
N̄e mour eo epād im̧aan ej ānwōt ekamijak, keememej bwe ejjab pen kōm̧adm̧ōde. Kwoj jab make iaam̧. Kwe kokajoor. Im kōn Jisōs Kraist, epen kabōjrak eok. E enaaj jipan̄ eok erom aolepān ta ko kwaar ļotak n̄an erom̧.