Ngaahi ʻAta ʻo e Tuí
Lini Uilaʻau
Savaiʻi, Haʻamoa
Naʻe fefaʻuhi ʻa Lini mo e ongoʻi ʻitá pea mo e ʻikai faʻa kātakí. Ka ʻi heʻene kau mo hono husepānití ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe ongoʻi ʻe Lini e mōlia atu ʻa e ngaahi ongo ko iá ʻi heʻene moʻui ʻaki e ongoongoleleí.
Tokotaha faitaá, Leslie Nilsson
Naʻá ku kamata hono ako e ongoongoleleí pea ako fakafou ʻi he ngaahi akonaki ʻa e Siasí e ʻofa ʻa Sīsū ʻi he fānaú. Naʻá Ne angaʻofa maʻu pē kiate kinautolu.
Naʻá ku kamata feinga ke u hangē ange ko Sīsuú. ‘Oku ou feinga he taimí ni ke toe lelei ange ʻeku ʻofa ʻi he kau mēmipa kotoa hoku fāmilí. ʻOku ou tuku ha taimi lahi ange ke feohi ai mo kinautolu ke ʻiloʻi ʻenau ngaahi fie maʻú. ʻOku mau lau fakafāmili e folofolá mo lotu fakataha ʻi he pō kotoa pē.
‘Oku vaivai ange hoku lotó he taimí ni. ‘Oku ou ongoʻi ʻa e ʻofa, nonga, mo e fiefia lahi ange ʻi homau ʻapí ʻi heʻemau muimui ki he ngaahi akonaki ʻa Sīsū Kalaisí. ‘Oku ou fakamālō ko e founga kuo tokoniʻi ai au ʻe he ongoongoleleí ke u hoko ai ko ha uaifi, faʻē, mo e kui lelei ange.
ʻOku kau ha niʻihi ʻema fānau lalahi angé ki ha ngaahi tui fakalotu kehe, ka ʻokú ma kei ʻamanaki lelei pē te nau kau kotoa ki he Siasi moʻoní ʻi ha ʻaho. ʻOku ʻi ai haʻaku taumuʻa mo hoku husepānití ke hū ʻi he temipalé ʻi he taʻu ka hoko maí. Ka ko ʻema taumuʻa pē ia ke kamata ʻakí. ‘Okú ma loto ke hū kotoa homa fāmilí ʻi he temipalé pea silaʻi fakataha.
ʻE lava ke liliu ʻe he ongoongoleleí ʻetau moʻuí. ʻIkai ngata pē ʻi he ʻita vavé, ka naʻá ku faʻa fefaʻuhi mo ha ngaahi tafaʻaki ʻo e Lea ʻo e Potó. Ka ʻoku ʻikai ke nau hoko ko ha palopalema kiate au he taimí ni. Kapau ʻoku lava ʻa e ongoongoleleí ʻo tokoniʻi au ke u hoko ko ha tokotaha lelei ange, ʻoku ou ʻilo te ne lava ʻo fai e meʻa tatau ki hoku fāmilí kotoa.
Kuo fakatou fiefia ʻa Lini mo hono husepāniti ko ʻIoané ʻi he ngaahi tāpuaki ʻo e faaitaha e fāmilí ʻi heʻenau tali e ongoongolelei ʻo Sīsū Kalaisí.
ʻOku puke mai ʻe Lini hono makapuná ʻi he faingamālie kotoa pē. ʻOku ʻi ai ha taumuʻa ʻa Lini mo hono husepānití ke vakai ki hono silaʻi kotoa hona fāmilí ʻi he temipalé ʻi ha ʻaho.
Ko e ʻofa mo e melino lahi ange ʻi he ʻapí ʻa e taha pē ia ʻo e ngaahi tāpuaki kuo fakatokangaʻi ʻe Lini talu ʻene kau ki he Siasí mo moʻui ʻaki e ngaahi tefitoʻi moʻoni kuó ne akó.