Fakaʻilekitulōnika Pē: Kakai Lalahi Kei Talavoú
ʻOku Fakamanatu Mai ʻe Heʻeku Hoko Ko e Tāutahá Ke U Falala ki he Palani Kakato ʻa e ʻOtuá Maʻakú
Naʻá ku maʻu ʻa e fiefiá ʻi he taimi naʻe faifai peá u tukuange ai mo falala ki he palani kakato ʻa e Tamai Hēvaní.
ʻI hoku taʻu 30, ne ʻeke mai ʻe hoku kaungāmeʻá ha ngaahi fehuʻi kiate au ʻa ia naʻá ne liliu ai ʻeku moʻuí. Naʻá ne pehē mai, “Kapau te ke maʻu kotoa e paʻanga ʻi he māmaní, ko e hā e meʻa te ke faí?” Naʻá ku ʻoange ha ngaahi tali faingofua pē, hangē ko e fakatau mai ha fale, tauhi hoku fāmilí, fakafalala pē kiate au, mo e ngaahi meʻa kehe.
Ka naʻá ne toe ʻomi ha fehuʻi loloto ange ʻo pehē, “Fēfē kapau kuó ke ʻosi maʻu ʻe koe e ngaahi meʻa ko iá mo e paʻanga kotoa ʻi he māmaní, ko e hā leva e meʻa te ke faí?” Ko e taimi ia naʻá ku fakatokangaʻi ai ʻoku tatau ai pē pe ko e hā e tūkunga ʻoku ʻi ai ʻeku nofo-malí, ʻoku lahi ʻeku meʻa ke foaki ki he māmaní. Naʻá ku fakakaukau ki he ngaahi meʻa te u lava ʻo ako pea vahevahe atú mo e kehekehe mo e liliu te u lava ʻo fakahokó.
Liliu ʻEku Tokangá
Ko ʻeku fakaʻānaua ʻi heʻeku kei tāutahá ke maʻu ha hoa mali mo mali ʻi he temipalé pea kamata ha fāmili. Naʻá ku fakakaukau ko ʻeku taumuʻá pē ʻeni. ʻI he taimi naʻe ʻikai hoko ai ʻení, naʻá ku fifili, “Kapau ko e meʻa mahuʻinga taha ʻi he moʻuí ko e malí, ko e hā koā e ʻuhinga ʻoku ʻikai ke u maʻu ai e faingamālie ko iá?”
Ne toki mahino kiate au ʻa e taumuʻa totonu ʻo e moʻuí hili hono ʻeke mai ʻe hoku kaungāmeʻá ʻa e ngaahi fehuʻi ko iá. ʻOku ou kei tui pē ko e malí mo e maʻu ha fānaú ʻoku mahuʻinga ia ki he palani taʻengata ʻa e Tamai Hēvaní maʻatautolu kotoá, ka ʻoku ou ʻiloʻi ʻoku ʻikai ko e kakato ia ʻo e palaní.
ʻOku tau ʻi he māmaní ke tupulaki, vahevahe e moʻoní, muimui ʻia Sīsū Kalaisi pea toe foki hake ki he Tamai Hēvaní (vakai, ʻAlamā 34:32).
ʻI heʻeku maʻu ʻa e fakakaukau ko iá, naʻe kamata ke u lotu ʻo kole ki he ʻOtuá ke tokoni mai ke u ʻilo ʻeku taumuʻá mo hoku mālohingá. Naʻe fakahā mai ʻeku taumuʻá hili ha kiʻi taimi ʻo ʻeku lotu mo ʻeku feinga ʻiate au pē ke ʻahiʻahi ha ngaahi meʻa fakamānako foʻou mo fakatupulaki ʻeku tuí. Ne u ʻiloʻi naʻá ku maʻu ha tui lahi kia Sīsū Kalaisi. Pea ko e konga ʻo ʻeku taumuʻá mo e palani ʻi he māmaní ke tokoniʻi e niʻihi kehé ke fakatupulaki mo fakamālohia foki mo ʻenau tui kiate Iá. ʻOku ʻomi ʻe he moʻoni ko ʻení ha fakahinohino lahi ki heʻeku moʻuí mo tokoniʻi au ke u tokanga taha ki heʻeku aʻusia ʻa e meʻa ʻokú Ne finangalo ke u aʻusiá.
ʻIloʻi ʻEku Taumuʻá
ʻI hoku taʻu 20 tupu, ne meimei fakatefito pē ʻeku ngaahi fepōtalanoaʻakí ʻi heʻeku kei tāutahá. Naʻá ku tokanga taha pē ki hoku ngaahi tūkunga “fakaʻofá.” Kuó u ʻilo ʻi he taimí ni ʻoku lelei ke fakataumuʻa ki he nofo-malí, ka ʻi he taimi tatau pē ʻe lava ke u kumi ha ngaahi taumuʻa mo ha ngaahi faingamālie kehe.
Kapau ʻokú ke taʻepauʻia ʻi he meʻa ʻoku totonu ke ke fai ʻi he taimi ní, kuo ʻomi ʻe Palesiteni Lāsolo M. Nalesoni ha ngaahi faleʻi ki he feituʻu ke ke kamata aí:
“Kole ki homou Tamai Hēvaní, ʻi he huafa ʻo Sīsū Kalaisí, pe ko e hā ʻEne ongo kiate kimoutolu mo homou misiona ʻi he māmaní. Kapau te mou kole ʻi he loto moʻoni, ʻe fanafana atu e Laumālié ʻi ha vahaʻataimi e ngaahi moʻoni liliu moʻuí kiate kimoutolu. …
“ʻOku ou palōmesi atu ʻi he kamata ke ke ʻilo ha kiʻi konga ʻo e anga e ʻafio mai hoʻo Tamai Hēvaní kiate koé mo e meʻa ʻokú Ne falala te ke fai Maʻaná, he ʻikai toe tatau hoʻo moʻuí!” (“Tuʻu Ko ha Kau Nofotuʻi Moʻoni,” Liahona, ʻOka. 2016, 49).
ʻOku maʻongoʻonga fau ʻa e ngaahi lea ko iá.
Neongo ʻoku ʻi ai ʻeku ngaahi fakakaukau ki he meʻa ʻoku ou fie maʻu ʻi he moʻuí (ʻa ia ʻoku fakaʻofoʻofa ki heʻeku fakakaukaú!) ʻOku tokaʻimaʻananga ange ʻa e ʻOtuá ʻi heʻeku ʻiló. Pea ʻe hanga ʻe Heʻene palaní ʻo tataki au ʻi ha ngaahi hala ʻoku maʻongoʻonga ange ʻi he meʻa ne u fakakaukau ki ai maʻakú.
ʻAtā ki ha Ngaahi ʻAmanaki Foʻou
Naʻe tomuʻa faingataʻa ʻa hono fakafenāpasi au ki he palani ʻa e Tamai Hēvaní maʻakú. Naʻe fie maʻu ke u fakaʻatā ʻeku fakakaukaú ki ha ngaahi fakakaukau foʻou, vīsone foʻou, mo e ʻamanaki foʻou. ʻOku faʻa fakamamahi ʻi he taimi ʻe niʻihi ʻa e taimi ʻoku ʻikai ke aʻusia ai ʻe he moʻuí ʻa e meʻa ne u palaní. Naʻe ʻomi ʻe hoku tāpuaki fakapēteliaké ha ngaahi talaʻofa pau naʻe ʻikai hoko. Ka naʻe ʻikai te u hohaʻa ʻi he taimi naʻá ku siʻaki ai ʻeku ngaahi fakakaukaú kae fili ke falala ʻe fakahoko ʻa e ngaahi tāpuaki kotoa pē ne talaʻofa maí—he ʻoku ou ʻiloʻi ʻe fakahoko ia ʻi Hono taimí.
Kapau te tau falala pea tokanga taha ki he palani kakato ʻa e Tamai Hēvaní maʻatautolú, te tau maʻu ʻa e fiefia taʻengata ʻokú Ne talaʻofa mai maʻatautolú (vakai, 2 Nifai 2:25). Te tau maʻu hotau ngaahi misiona fakatāutahá. Te tau aʻusia e tuʻunga ʻokú Ne finangalo ke tau aʻusiá. Pea ʻi he taimi tatau, te tau teuteuʻi ai kitautolu ki hotau ngaahi tāpuaki taʻengata kotoa pē—kau ai ʻa e nofo-malí.
Koeʻuhí ko e liliu ko ʻeni ʻo e fakakaukaú, kuó u maʻu ai ʻa e fiefia moʻoni ʻi heʻeku moʻuí. ʻOku ʻikai ke u ʻilo kotoa e ngaahi talí, ka ʻokú Ne kei fakamaama tahataha mai pē ʻeku moʻuí.