Mālō e lelei mei Siamane!
Malō e Lelei, ko Mako mo Paolo kimaua.
Kau mai ʻi heʻema ʻaʻahi ki Siamané!
Ko Siamane, pe Tasilení, ko ha fonua ia ʻi ʻIulope lotoloto. ʻOku ʻi ai ha ngaahi vaotā mo e vaitafe, ʻotu moʻunga mo e matātahi, mo e fanga kiʻi kolo iiki mo e kolo lalahi. ʻOku fakafuofua ʻoku ʻi ai ha fānau ʻe toko 13 miliona ʻoku nofo ʻi Siamane.
‘Oku ʻi ai ha ngaahi fale fakatuʻi (castle) ʻe 20,000 nai ʻi Siamane. ‘Oku lahi ha ngaahi fale fakatuʻi kuo taʻu ʻe laungeau honau motuʻá. Ko ha fale fakatuʻi ʻiloa ʻeni ʻoku ui ko Niusauanisitaini (Neuschwanstein).
Ko e sauakolotí, sōsisí, mo e Spätzle (nūtoló) ko ha meʻakai manakoa ia ʻi Siamane.
‘Oku ʻi ai ha temipale ʻe ua ʻi Siamane. Ko e taha ʻi Falaipeeki, pea taha ʻi Felengifooti, ʻa ia ʻoku ʻi ai e kiʻi tamasiʻi ko ʻení. ʻOku pehē ʻe he fakaʻilongá, “Tempel der Kirche Jesu Christi der Heiligen der Letzten Tage” (Temipale ʻo e Siasi ʻo Sīsū Kalaisi ʻo e Kau Máʻoniʻoni ʻi he Ngaahi ʻAho Kimuí Ní).
ʻOku fiefia e tamaiki fefiné mo e tamaiki tangatá he ‘alu ki he Palaimelí.
‘Oku ʻiloa ʻa Siamane ʻi honau ngaahi māketi faka-Kilisimasí. ‘Oku saiʻia e ngaahi fāmilí ke mamata ki he maama fakaʻofoʻofá mo kai e fanga kiʻi meʻakai ifó!
Ko e Tohi Fakahinohino ʻa e Fānaú ʻeni ʻi he lea faka-Siamané. ‘Oku fakaʻaongaʻi ia ʻe he fānau ʻi Siamané ke nau ako pea tupulaki ai. ‘Okú ke fakaʻaongaʻi fēfē hoʻo tohi fakahinohinó ʻi he feituʻu ʻokú ke nofo aí?
ʻI he ʻaho ʻuluaki ʻo e ako lautohí, ʻoku maʻu ʻe he kiʻi tamasiʻi/taʻahine takitaha ha satchel (kato naunau āfei), kiʻi kato peni, mo ha “kouni ako” (Schultüte pe Zuckertüte) kuo fakafonu ʻaki e lolé mo ha fanga kiʻi meʻaʻofa.
Feʻiloaki mo ha niʻihi ʻo hotau ngaahi kaungāmeʻa mei Siamané!
Ko e talanoa ʻoku ou saiʻia taha ai ʻi he Tohi ʻa Molomoná ʻa e taimi ne ʻaʻahi ai ʻa Kalaisi pea akoʻi e kakaí. ‘Oku ou fie muimui ki he fekau ʻa Kalaisi ke ʻoua ʻe fakamāú. Ko e lahi ange ʻeku lau fekauʻaki mo e ngaahi akonaki ʻa e Fakamoʻuí, ko e lahi ange ia ʻeku ongoʻi ʻa ʻEne ʻofá mo e melinó.
Lelia A., taʻu 10, Falanikonia, Siamane
‘Oku ou ʻilo kapau te u tauhi e ngaahi fekaú, ʻoku ou maʻu e fakapapau mo e malu ʻo e nofo ʻi he hala ʻoku fakatau ki he ʻOtuá. Te u lava maʻu pē ʻo ʻilo naʻá ku fai ha meʻa ʻoku tonu ʻi heʻeku ongoʻi e Laumālie Māʻoniʻoní.
Kēlepi A., taʻu 12, Falanikonia, Siamane
ʻOkú ke haʻu mei Siamane? Tohi mai kiate kimaua! ʻOkú ma fie fanongo meiate kimoutolu.
Fakamālō atu ʻi hoʻomou fie mamataʻi ʻa Siamane mo kimauá. Tau toki sio!
Ngaahi tā fakatātā ʻa Katie McDee; tā ʻo e kiʻi tamasiʻi ʻi muʻa ʻi he fakaʻilonga ʻo e Temipale Frankfurt Germany ne faitaaʻi ʻe Fernanda Rudloff; stock photography ʻe he AdobeStock mo e Getty Images